ಗಾಂಧೀಜಿ ಆದರ್ಶದ ಸುತ್ತ ಗಾಂಧಿ ಮತ್ತು ನೋಟು

Team Udayavani, Oct 2, 2020, 4:19 PM IST

“ಗಾಂಧಿ ಮತ್ತು ನೋಟು’- ಹೀಗೆ ಹೇಳಿದ ನಂತರ ಇದು ಗಾಂಧೀಜಿಯವರ ತತ್ವ, ಸಿದ್ಧಾಂತ ಹಾಗೂ ಮೌಲ್ಯಗಳನ್ನು ಸಾರುವ ಚಿತ್ರ ಎಂದು ಪ್ರತ್ಯೇಕವಾಗಿ ಹೇಳುವ ಅಗತ್ಯವಿಲ್ಲ. ಈಗಾಗಲೇ ಈ ಚಿತ್ರ ಸದ್ದಿಲ್ಲದೇ ಚಿತ್ರೀಕರಣ ಮುಗಿಸಿದೆ.

ಇದೊಂದು ಗಾಂಧೀಜಿಯವರ ತತ್ವ,ಸಿದ್ಧಾಂತ,ಮೌಲ್ಯಗಳನ್ನು ಮಾಪನ ಮಾಡಲು ಯತ್ನಿಸುತ್ತಿರುವ ಕಥೆ. ಮಾಪನ ಅಂದರೆ ಈಗಿನ ಸಾಮಾಜಿಕ ಬದುಕಲ್ಲಿ ಜಗತ್ತು ಗಾಂಧೀಜಿಯರನ್ನು ಹೇಗೆ ನೋಡುತ್ತಿದೆ, ಮತ್ತು ಗಾಂಧೀಜಿಯವರ ಮೌಲ್ಯಗಳು ಮತ್ತು ಶಕ್ತಿಯನ್ನ ಹುಡುಕೋ ಒಂದು ಪ್ರಯತ್ನವಾಗಿ ಈ ಚಿತ್ರ ಮೂಡಿಬರುತ್ತಿದೆ.

ಕಥೆಯಲ್ಲಿ ಕಾಡಂಚಿನ ಹಳ್ಳಿಯಿಂದ ಓದಿಗಾಗಿ ನಡೆದುಬರುವ ಹುಡುಗಿ ಸುಕ್ರಿ. ಸುಕ್ರಿಯ ಜೊತೆ ತೆರೆದುಕೊಳ್ಳುವ ಗಾಂಧೀಜಿಯನ್ನ ಆವರಿಸಿಕೊಂಡು ಹೇಗೆ ಜಗತ್ತಿಗೆ ತನ್ನ ನಿಲುವುಗಳಿಗೆ ತೋರಿಸಿಕೊಡುವಳು ಎನ್ನುವುದು ಗಾಂಧಿ ಮತ್ತು ನೋಟು ಚಿತ್ರದ ಕಥವಸ್ತು.ಸುಕ್ರಿ ಪಾತ್ರದಲ್ಲಿ ಕುಮಾರಿ ದಿವಿಜಾ ನಾಗೇಂದ್ರ ಪ್ರಸಾದ್‌ ಅಭಿನಯಿಸಿದ್ದಾರೆ. ದಿವಿಜಾ ಗೀತ ಸಾಹಿತಿ ಡಾ.ವಿ.ನಾಗೇಂದ್ರ ಪ್ರಸಾದ್‌ ಅವರ ಪುತ್ರಿ. ಇವರೇ ಚಿತ್ರದ ಪಾತ್ರಧಾರಿ. ಇವರೊಂದಿಗೆ ಸಾಕಷ್ಟು ರಂಗಭೂಮಿ ಕಲಾವಿದರ ಅಭಿನಯ ಕೂಡ ಈ ಚಿತ್ರದಲ್ಲಿದೆ.

ಸುಧಾರಣಿ ಹೆಚ್‌ ಆರ್‌ ಮೇಲುಕೋಟೆ, ಹೆಚ್‌.ಕೆ.ವೀಣಾ ಪದ್ಮನಾಭ ಮತ್ತು ಮಂಜುನಾಥ್‌ ಬಿ.ಎನ್‌ ಈ ಚಿತ್ರದ ನಿರ್ಮಾಪಕರು. ಯೋಗಿ ದೇವಗಂಗೆ ನಿರ್ದೇಶನದ ಈ ಚಿತ್ರದ ಚಿತ್ರೀಕರಣ ಬಹುತೇಕ ಮುಕ್ತಾಯವಾಗಿದ್ದು, ಕ್ಲೈಮ್ಯಾಕ್ಸ್‌ ಭಾಗದ ಚಿತ್ರೀಕರಣ ಮಾತ್ರ ಬಾಕಿಯಿದೆ. ವಾಣಿ ಹರಿಕೃಷ್ಣ ಅವರ ಸಂಗೀತ ನಿರ್ದೇಶನವಿದೆ.