ಈ ವಾರ ತೆರೆಗೆ ‘ಗುಲಾಲ್‌ ಡಾಟ್‌ ಕಾಂ’

Team Udayavani, Nov 5, 2021, 11:27 AM IST

ಬಹುತೇಕ ಹೊಸ ಪ್ರತಿಭೆಗಳೆ ಸೇರಿ ನಿರ್ಮಿಸಿರುವ “ಗುಲಾಲ್‌ ಡಾಟ್‌ ಕಾಂ’ ಚಿತ್ರ ಈ ವಾರ ರಾಜ್ಯಾದ್ಯಂತ ಸುಮಾರು 70ಕ್ಕೂ ಹೆಚ್ಚು ಕೇಂದ್ರಗಳಲ್ಲಿ ತೆರೆಗೆ ಬರುತ್ತಿದೆ. ಔಟ್‌ ಆ್ಯಂಡ್‌ ಔಟ್‌ ಕಾಮಿಡಿ ಮತ್ತು ಥ್ರಿಲ್ಲರ್‌ ಕಥಾಹಂದರ ಹೊಂದಿರುವ “ಗುಲಾಲ್‌ ಡಾಟ್‌ ಕಾಂ’ ಚಿತ್ರಕ್ಕೆ ಶಿವು ಜಮಖಂಡಿ ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯ ಬರೆದು ಸಂಗೀತ ನೀಡಿ, ನಿರ್ದೇಶನ ಮಾಡಿದ್ದಾರೆ.

ಚಿತ್ರರಂಗದಲ್ಲಿ ಮಿಂಚಬೇಕು, ಸ್ಟಾರ್ ಆಗಬೇಕು ಎಂಬ ಕನಸನ್ನು ಹೊತ್ತು ಕರ್ನಾಟಕದ ಬೇರೆ ಬೇರೆ ಭಾಗಗಳಿಂದ ಗಾಂಧಿನಗರಕ್ಕೆ ಬರುವ ಆರು ಜನ ಹುಡುಗರು ಇಲ್ಲಿ ಹೇಗೆ ಹಾದಿ ತಪ್ಪುತ್ತಾರೆ. ಅದರಿಂದ ಏನೇನಾಗುತ್ತದೆ. ಇದರಿಂದ ಆ ಹುಡುಗರು ಹೊರಗೆ ಬರುತ್ತಾರಾ? ಇಲ್ಲವಾ ಎನ್ನುವ ಒಂದು ಎಳೆಯ ಸುತ್ತ “ಗುಲಾಲ್‌ ಡಾಟ್‌ ಕಾಂ’ ಚಿತ್ರದ ಕಥಾಹಂದರ ಸಾಗುತ್ತದೆ.

ಇದನ್ನೂ ಓದಿ:ಪುನೀತ್‌ ಇಲ್ಲದ ಮೇಲೆ… ಹೊಸಬರ ಕನಸುಗಳು ಅರ್ಧಕ್ಕೆ ನಿಂತಿವೆ…

“ಜವಾರಿ ಜಂಕ್ಷನ್‌ ಮೂವೀಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾದ ಚಿತ್ರದಲ್ಲಿ ತಬಲ ನಾಣಿ, ಬಿಗ್‌ಬಾಸ್‌ ದಿವಾಕರ್‌, ಜೋಕರ್‌ ಹನುಮಂತು, ಸದಾನಂದ್‌, ಮನು ಜಮಖಂಡಿ, ಶಂಕರ್‌ ಅಂಬಿಕೇರ್‌, ನೇತ್ರಾ ಗಗನ್‌, ಸೋನು ಪಾಟೀಲ್‌, ಪೂಜಾ, ಶೋಭರಾಜ್‌, ಮೋಹನ್‌ ಜುನೇಜಾ ಮೊದಲಾದವರು ಈ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಇದಲ್ಲದೆ ಬಹುತೇಕ ಹೊಸ ಪ್ರತಿಭೆಗಳೆ ಸೇರಿ ನಿರ್ಮಿಸಿರುವ “ಆಟೋ ರಾಮಣ್ಣ’ ಎಂಬ ಮತ್ತೂಂದು ಚಿತ್ರ ಕೂಡ ಈ ವಾರ ಬಿಡುಗಡೆಯಾಗುತ್ತಿದೆ.