ಕಿರುತೆರೆಯಿಂದ ಹಿರಿತೆರೆಗೆ ಮೇಘಾ ಸಿನಿ ರೈಡ್‌

Team Udayavani, Oct 23, 2020, 1:19 PM IST

ಕಿರುತೆರೆಯ “ಜೊತೆ ಜೊತೆಯಲಿ…’ ಧಾರಾವಾಹಿಯ ಮೂಲಕ ಮನೆಮಾತಾಗಿರುವ ಹುಡುಗಿ ಮೇಘಾ ಶೆಟ್ಟಿ ಉರೂಫ್ ಅನು ಸಿರಿಮನೆ ಅತೀ ಕಡಿಮೆ ಅವಧಿಯಲ್ಲಿ ಕಿರುತೆರೆ ಪ್ರೇಕ್ಷಕರಿಗೆ ಹತ್ತಿರವಾದವರು. ತನ್ನ ಸೌಂದರ್ಯ, ಸಹಜ ಅಭಿನಯದ ಮೂಲಕ ಕಿರುತೆರೆ ಪ್ರೇಕ್ಷಕರ ಮನ ಮತ್ತು ಗಮನ ಎರಡನ್ನೂ ಸೆಳೆದಿರುವ ಮೇಘಾ ಶೆಟ್ಟಿ, ಸದ್ಯದ ಮಟ್ಟಿಗೆ ಕನ್ನಡ ಕಿರುತೆರೆಯ ಸ್ಟಾರ್‌ ನಟಿ ಎಂದೇ ಹೇಳಬಹುದು. ಕಿರುತೆರೆಯಲ್ಲಿ ಬಹುಬೇಡಿಕೆಯಲ್ಲಿರುವ ಮೇಘಾ ಶೆಟ್ಟಿ, ಈಗ ಹಿರಿತೆರೆಯತ್ತಲೂ ಮುಖ ಮಾಡುತ್ತಿದ್ದಾರೆ.

ಹೌದು, ಮೇಘಾ ಶೆಟ್ಟಿ ಸದ್ಯ ಗೋಲ್ಡನ್‌ ಸ್ಟಾರ್‌ ಗಣೇಶ್‌ ನಾಯಕ ನಟನಾಗಿ ಅಭಿನಯಿಸುತ್ತಿರುವ “ತ್ರಿಬಲ್‌ ರೈಡಿಂಗ್‌’ ಚಿತ್ರದಲ್ಲಿ ನಾಯಕಿಯಾಗುವ ಮೂಲಕ ಬಿಗ್‌ ಸ್ಕ್ರೀನ್‌ಗೆ ಎಂಟ್ರಿಯಾಗುತ್ತಿದ್ದಾರೆ. ತಮ್ಮ ಬಣ್ಣದ ಬದುಕಿನ ಬಗ್ಗೆ ಮಾತನಾಡುವ ಮೇಘಾ, “ನನ್ನ ತಂದೆ, ಚಿಕ್ಕಪ್ಪ ಎಲ್ಲರೂ ರಂಗಭೂಮಿ ಕಲಾವಿದರು. ಬಹುಶಃ ಅದೇ ಆಸಕ್ತಿ ನನಗೂ ಬಂದಿರಬಹುದು. ಆದ್ರೆ ನಾನು ಯಾವತ್ತೂ ಆ್ಯಕ್ಟಿಂಗ್‌ ಮಾಡ್ತೀನಿ, ನಟಿಯಾಗ್ತೀನಿ ಅಂಥ ಅಂದುಕೊಂಡಿರಲಿಲ್ಲ. ನಿಜ ಹೇಳಬೇಕು ಅಂದ್ರೆ, ಆ್ಯಕ್ಟಿಂಗ್‌ ಕಡೆಗೆ ಆಸಕ್ತಿಯಿದ್ರೂ, ಅದರ ಬಗ್ಗೆ ಒಂಚೂರು ಗಂಧಗಾಳಿ ಗೊತ್ತಿರಲಿಲ್ಲ. ಎಲ್ಲವೂ ಅಂದುಕೊಳ್ಳದೇನೆ ಆಯಿತು ಅಂಥ ಅನಿಸ್ತಿದೆ’ ಎನ್ನುವುದು ಮೇಘಾ ಮಾತು.

ತ್ರಿಬಲ್‌ ರೈಡಿಂಗ್‌ ಚಿತ್ರದ ಬಗ್ಗೆ ಮಾತನಾಡುವ ಮೇಘಾ, ಜೊತೆ ಜೊತೆಯಲಿ…’ ಸೀರಿಯಲ್‌ ಮಾಡುತ್ತಿರುವಾಗಲೇ, “ತ್ರಿಬಲ್‌ ರೈಡಿಂಗ್‌’ ಸಿನಿಮಾದ ಆಫ‌ರ್‌ ಬಂತು. ಸಬ್ಜೆಕ್ಟ್ ಇಷ್ಟವಾಗಿದ್ದರಿಂದ ಈ ಸಿನಿಮಾ ಮಾಡೋದಕ್ಕೆ ಒಪ್ಪಿಕೊಂಡೆ. ಇದರಲ್ಲಿ ಗಣೇಶ್‌ ಅವರಿಗೆ ಹೀರೋಯಿನ್‌ ಆಗಿ ಆ್ಯಕ್ಟ್ ಮಾಡುತ್ತಿದ್ದೇನೆ. ಸಿನಿಮಾದಲ್ಲಿ ನನ್ನದು ತುಂಬ ಇನೋಸೆಂಟ್‌ ಆಗಿರುವಂಥ ಡಾಕ್ಟರ್‌ ಕ್ಯಾರೆಕ್ಟರ್‌. ನಾನು ರಿಯಲ್‌ ಲೈಫ್ ನಲ್ಲಿ ಹೇಗಿದ್ದೇನೋ, ಸಿನಿಮಾದಲ್ಲೂ ಹಾಗೇ ಇರುತ್ತೇನೆ. ಗಣೇಶ್‌ ಅವರ ಸಿನಿಮಾಗಳು ಅಂದ್ರ ನನಗೆ ಇಷ್ಟ. ಫ‌ಸ್ಟ್‌ ಟೈಮ್‌ ಅವರ ಜೊತೆ ವರ್ಕ್‌ ಮಾಡೋದಕ್ಕೆ, ಸ್ಕ್ರೀನ್‌ ಶೇರ್‌ ಮಾಡೋದಕ್ಕೆ ತುಂಬ ಖುಷಿಯಾಗ್ತಿದೆ. ಆಡಿಯನ್ಸ್‌ಗೆ ಒಂದೊಳ್ಳೆ ಎಂಟರ್‌ಟೈನ್ಮೆಂಟ್‌ ಕೊಡುವಂಥ ಸಿನಿಮಾ ಇದಾಗುತ್ತದೆ ಅನ್ನೋ ಭರವಸೆ ಇದೆ. ಇದೇ ದಸರಾದಿಂದ ಮೈಸೂರಿನಲ್ಲಿ ಇದರ ಶೂಟಿಂಗ್‌ ಶುರುವಾಗಿದ್ದು, ನಾನು ಶೂಟಿಂಗ್‌ನಲ್ಲಿ ಭಾಗವಹಿಸುತ್ತಿದ್ದೇನೆ. ಕಾಮಿಡಿ, ಸಸ್ಪೆನ್ಸ್‌, ಥ್ರಿಲ್ಲರ್‌ ಎಲ್ಲವೂ ಈ ಸಿನಿಮಾದಲ್ಲಿದೆ. ಈಗಲೇ ಇದಕ್ಕಿಂತ ಹೆಚ್ಚು ಈ ಸಿನಿಮಾದ ಬಗ್ಗೆ ಹೇಳಲಾರೆ’ ಎನ್ನುತ್ತಾರೆ.

-ಜಿ.ಎಸ್‌.ಕಾರ್ತಿಕ ಸುಧನ್‌