ನ್ಯಾಯ ನಮ್ಮದೇ

Team Udayavani, Apr 27, 2018, 3:45 PM IST

“ಕೋಟೆ ಹುಡುಗ್ರು’ ಎಂಬ ಚಿತ್ರ ಶುರುವಾಗಿ ಒಂದು ವರ್ಷದ ಮೇಲಾಗಿದೆ. ಈ ಒಂದು ವರ್ಷದಲ್ಲಿ ಚಿತ್ರತಂಡದವರು ಸದ್ದಿಲ್ಲದೆ ಚಿತ್ರೀಕರಣ ಮಾಡಿ ಮುಗಿಸಿರುವ ಚಿತ್ರತಂಡವು, ಇದೀಗ ಹಾಡುಗಳನ್ನು ಬಿಡುಗಡೆ ಮಾಡಲಾಯಿತು. ಇತ್ತೀಚೆಗೆ ನಡೆದ ಹಾಡುಗಳ ಬಿಡುಗಡೆ ಸಮಾರಂಭಕ್ಕೆ ಹಿರಿಯ ನಿರ್ಮಾಪಕ ಕನಕಪುರ ಶ್ರೀನಿವಾಸ್‌ ಅವರು ಬಂದು, ಹಾಡುಗಳನ್ನು ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಇಷ್ಟಕ್ಕೂ ಈ “ಕೋಟೆ ಹುಡುಗ್ರು’ ಏನೆಲ್ಲಾ ಮಾಡುತ್ತಾರೆ ಎಂಬ ಪ್ರಶ್ನೆ ಬರಬಹುದು. ಈ ಪ್ರಶ್ನೆಗೆ, ಅನ್ಯಾಯ, ಭ್ರಷ್ಟಚಾರದ ವಿರುದ್ದ ಹೋರಾಡುತ್ತಾರೆ ಎಂಬ ಉತ್ತರ ಚಿತ್ರತಂಡದವರಿಂದ ಬರುತ್ತದೆ. ವ್ಯಾಪಾರಿಗಳು ಮೋಸ ಮಾಡಿದಲ್ಲಿ, ನಿರ್ವಾಹಕ ಸರಿಯಾದ ಚಿಲ್ಲರೆ ನೀಡದೆ ಇದ್ದಲ್ಲಿ, ಸ್ಥಳೀಯರಿಗೆ ಪುಂಡಾಟಿಕೆ ಮಾಡುವವರನ್ನು ಈ ಕೋಟೆ ಹುಡುಗ್ರು ಪಾಠ ಕಲಿಸುತ್ತಾರಂತೆ. ಕ್ರಮೇಣ ಅವರ ಹೋರಾಟ ರಾಜ್ಯ ವ್ಯಾಪಿವಿಸ್ತಾರವಾಗುತ್ತದೆ. ನಮ್ಮ ನ್ಯಾಯವನ್ನು ನಾವೇ ಸರಿಪಡಿಸಿಕೊಳ್ಳಬೇಕೆಂದು ತೀರ್ಮಾನಿಸುವ ಹುಡುಗರು ಮುಂದೆ ಏನೆಲ್ಲಾ ಮಾಡುತ್ತಾರೆ ಎನ್ನುವುದೇ ಚಿತ್ರದ ಕಥೆ.

ಕಿರುತೆರೆಯಲ್ಲಿ ಕಾಣಿಸಿಕೊಂಡಿದ್ದ ಅಮೃತಕುಮಾರ್‌ ನಾಯಕ.  ಪ್ರಾರಂಭದಲ್ಲಿ ನಾಯಕನ ಮೇಲೆ ಸಂಶಯಗೊಂಡು, ಮುಂದೆ ಆತನ ಕೆಲಸವನ್ನು ಕಂಡು ಪೋ›ತ್ಸಾಹ ನೀಡುವ ಪಾತ್ರದಲ್ಲಿ ಅಮಿತಾಶ್ರೀ ನಾಯಕಿ. ಇಬ್ಬರಿಗೂ ಚಿತ್ರರಂಗ ಹೊಸ ಅನುಭವ. ಇವರೊಂದಿಗೆ ಖಳನಟನಾಗಿ ಜಯ್‌ಸೂರ್ಯ, ಅಭಯ್‌, ತೊಂಟೇಶ್‌, ಚೇತನ್‌, ಅನಿಲ್‌, ಸುಂದರ್‌, ಗುರುರಾಜ ಹೊಸಕೋಟೆ ಮುಂತಾದವರಿದ್ದಾರೆ.

ಚಿತ್ರಕ್ಕೆ ಐದು ಹಾಡುಗಳಿಗೆ ಸಂಗೀತ ಸಂಯೋಜಿಸಿ, ಸಾಹಿತ್ಯ, ಸಂಭಾಷಣೆ, ಕತೆ ಬರೆಯುವುದರ ಜೊತೆಗೆ ನಿರ್ದೇಶನ ಮಾಡಿರುವುದು ಸಂಗೀತ್‌ ಸಾಗರ್‌. ಆರು ಚಿತ್ರಗಳನ್ನು ನಿರ್ಮಾಣ ಮಾಡಿ ಕೈಸುಟ್ಟುಕೊಂಡಿರುವ ಆರ್‌. ಮಲ್ಲಿಕಾರ್ಜುನಯ್ಯ  ಕಳೆದ ಹಣವನ್ನು ಅದೇ ಜಾಗದಿಂದ ಪಡೆಯಬೇಕಂಬ ಉದ್ದೇಶದಿಂದ ಮತ್ತೂಮ್ಮೆ ಧೈರ್ಯ ಮಾಡಿ ಸಿನಿಮಾಕ್ಕೆ ಹಣ ಹೂಡಿದ್ದಾರೆ.