ದಿನ ಚೆನ್ನಾಗಿದೆ ಅಂತ ಚಿತ್ರ ಶುರು ಆಯ್ತು!

Team Udayavani, Sep 1, 2017, 6:05 AM IST

“ದಿನ ಚೆನ್ನಾಗಿತ್ತು, ಅದಕ್ಕೆ ಮುಹೂರ್ತ ಮಾಡಿದೆವು. ಕಥೆಯ ಒನ್‌ಲೈನ್‌ ಅಷ್ಟೇ ಇದೆ. ಮಿಕ್ಕಿದ್ದೆಲ್ಲಾ ಇನ್ನಷ್ಟೇ ಆಗಬೇಕು …’

– ಹೀಗೆ ಹೇಳಿದರು ನಿರ್ದೇಶಕ ಎಂ.ಡಿ.ಶ್ರೀಧರ್‌. ಸಾಮಾನ್ಯವಾಗಿ ನಿರ್ದೇಶಕ ಎಂ.ಡಿ.ಶ್ರೀಧರ್‌ ಸಿನಿಮಾ ಎಂದರೆ ಸಿನಿಮಾ ಬಗ್ಗೆ ಒಂದಷ್ಟು ಮಾಹಿತಿ ಸಿಗುತ್ತದೆ ಎಂಬ ನಿರೀಕ್ಷೆ ಇರುತ್ತದೆ. ಆದರೆ, ಈ ಬಾರಿ ಮಾತ್ರ ಶ್ರೀಧರ್‌ ಅವರಲ್ಲೂ ಸಿನಿಮಾ ಬಗ್ಗೆ ಹೆಚ್ಚಿನ ಮಾಹಿತಿ ಇರಲಿಲ್ಲ. ಅಂದಹಾಗೆ, ಅವರ ನಿರ್ದೇಶನದ ಹೊಸ ಸಿನಿಮಾಕ್ಕೆ ಇನ್ನೂ ಹೆಸರಿಟ್ಟಿಲ್ಲ.

ಕಥೆಯೂ ಅಂತಿಮವಾಗಿಲ್ಲ, ಒನ್‌ಲೈನ್‌ ಕಥೆಯಷ್ಟೇ ಇದ್ದು, ಅದನ್ನು ಮುಂದೆ ಬೆಳೆಸಿಕೊಂಡು ಹೋಗಬೇಕಷ್ಟೇ. ಈ ಚಿತ್ರದಲ್ಲಿ ಸುಶೀಲ್‌ ಎಂಬ ಹೊಸ ನಟ ನಟಿಸುತ್ತಿದ್ದಾರೆ. ವೆಂಕಟೇಶ್‌ ಎನ್ನುವವರು ಈ ಸಿನಿಮಾದ ನಿರ್ಮಾಪಕರು.
“ದಿನ ಚೆನ್ನಾಗಿದೆ ಎಂಬ ಕಾರಣಕ್ಕೆ ಇವತ್ತು ಮುಹೂರ್ತ ಮಾಡಿದ್ದೇವೆ. ಒನ್‌ಲೈನ್‌ ಅಷ್ಟೇ ರೆಡಿ ಇದೆ. ರಗಡ್‌ ಆಗಿರುವಂತಹ ಥ್ರಿಲ್ಲರ್‌ ಸಿನಿಮಾ. ಹೀರೋ ಸುಶೀಲ್‌ ಜೊತೆಗೆ ಹೊಸ ಹುಡುಗರು ಇರುತ್ತಾರೆ. ಉಳಿದಂತೆ ಯಾವುದೂ ಅಂತಿಮವಾಗಿಲ್ಲ. ನಮ್ಮದೇ ಒಂದು ತಂಡವಿದೆ. ಎಲ್ಲರು ಸೇರಿ ಕಥೆಗೊಂದು ಅಂತಿಮ ರೂಪ ಕೊಡಬೇಕಿದೆ. ಆ ನಂತರ ಎಲ್ಲವೂ ಅಂತಿಮವಾಗಲಿದೆ. ಕಥೆ, ಚಿತ್ರಕಥೆಯ ಕೆಲಸ ಪೂರ್ಣವಾದ ಬಳಿಕ ಚಿತ್ರೀಕರಣಕ್ಕೆ ಹೋಗುತ್ತೇವೆ. ಇದಲ್ಲದೇ ಇನ್ನೆರಡು ಪ್ರಾಜೆಕ್ಟ್ಗಳಿವೆ. ದರ್ಶನ್‌ ಅವರಿಗೊಂದು ಸಿನಿಮಾ ಮಾಡುತ್ತಿದ್ದೇನೆ. ಈ ಎರಡು ಸಿನಿಮಾಗಳನ್ನು ಮುಗಿಸಿಕೊಂಡು ದರ್ಶನ್‌ ಸಿನಿಮಾ ಮಾಡುತ್ತೇನೆ’ ಎನ್ನುವ ಮೂಲಕ ಶ್ರೀಧರ್‌ ತಮ್ಮ ಹೊಸ ಸಿನಿಮಾದ ಬಗ್ಗೆ ಹೆಚ್ಚು ಮಾತನಾಡಲಿಲ್ಲ.

ಚಿತ್ರದ ನಾಯಕ ಸುಶೀಲ್‌ಗೆ ಇಲ್ಲಿ ರಗಡ್‌ ಪಾತ್ರವಿದೆಯಂತೆ. ಶ್ರೀಧರ್‌ ಅವರು ಅನೇಕ ಯಶಸ್ವಿ ಚಿತ್ರಗಳನ್ನೇ ಕೊಟ್ಟಿದ್ದು, ಅವರು ಹೇಳಿದ ಒನ್‌ಲೈನ್‌ ಇಷ್ಟಪಟ್ಟು ಸಿನಿಮಾ ಮಾಡುತ್ತಿರುವುದಾಗಿ ಹೇಳಿದರು. ಪೂರ್ವತಯಾರಿಯ ಮೂಲಕ ಪಾತ್ರಕ್ಕೆ ನ್ಯಾಯ ಒದಗಿಸುವುದಾಗಿ ಹೇಳಿಕೊಂಡರು. ಚಿತ್ರಕ್ಕೆ ಕವಿರಾಜ್‌ ಹಾಗೂ ಕೃಷ್ಣಕುಮಾರ್‌ ಅವರ ಛಾಯಾಗ್ರಹಣವಿದೆ. ಮತ್ತೂಮ್ಮೆ ಒಂದೇ ತಂಡವಾಗಿ ಕೆಲಸ ಮಾಡುತ್ತಿರುವ ಖುಷಿ ಹಂಚಿಕೊಳ್ಳುವಷ್ಟಕ್ಕೆ ಅವರ ಮಾತು ಮುಗಿದು ಹೋಯಿತು. ನಿರ್ಮಾಪಕ ವೆಂಕಟೇಶ್‌ ಕೂಡಾ ಸಿನಿಮಾ ಬಗ್ಗೆ ಖುಷಿ ಹಂಚಿಕೊಂಡರು.