‘ನಿನ್ನ ಸನಿಹಕೆ’ ಎಂಬ ಫ್ರೆಶ್‌ ಲವ್‌ ಸ್ಟೋರಿ! ಮೋಡಿ ಮಾಡಲು ಸೂರಜ್‌, ಧನ್ಯಾ ರೆಡಿ

Team Udayavani, Oct 1, 2021, 2:47 PM IST

‘ನಿನ್ನ ಸನಿಹಕೆ’ ಚಿತ್ರ ಬಿಡುಗಡೆಯ ಹಂತಕ್ಕೆ ಬಂದಿದೆ. ಈ ಚಿತ್ರದಲ್ಲಿ ನಾಯಕರಾಗಿ ನಟಿಸುವ ಜೊತೆಗೆ ನಿರ್ದೇಶನದ ಜವಾಬ್ದಾರಿ ಕೂಡಾ ಸೂರಜ್‌ ಮೇಲಿದೆ. ಈಗಾಗಲೇ ಚಿತ್ರದ ಹಾಡುಗಳು, ಟ್ರೇಲರ್‌ ಬಿಡುಗಡೆಯಾಗಿ ಮೆಚ್ಚುಗೆ ಪಡೆಯುತ್ತಿದೆ.

ಈಗ ಚಿತ್ರ ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಅಕ್ಟೋಬರ್‌ 8 ರಂದು ಬಿಡುಗಡೆಯಾಗುತ್ತಿದೆ. ಬಿಡುಗಡೆಯ ಬಗ್ಗೆ ಮಾಹಿತಿ ಹಂಚಿಕೊಳ್ಳಲು ಚಿತ್ರತಂಡ ಮಾಧ್ಯಮ ಮುಂದೆ ಬಂದಿತ್ತು. ಚಿತ್ರವನ್ನು “ವೈಟ್‌ ಅಂಡ್‌ ಗ್ರೇ ಮೀಡಿಯಾ’ ಸಂಸ್ಥೆ ನಿರ್ಮಾಣ ಮಾಡುತ್ತಿದೆ.

ಚಿತ್ರದ ಬಗ್ಗೆ ಮಾತನಾಡಿದ ನಿರ್ಮಾಪಕರಾದ ಅಕ್ಷಯ್‌ ಹಾಗೂ ರಂಗನಾಥ್‌, “ಸಿನಿಮಾ ತುಂಬಾ ಚೆನ್ನಾಗಿ ಮೂಡಿಬಂದಿದೆ. ಈ ಹಿಂದೆ ಎರಡು ಬಾರಿ ಬಿಡುಗಡೆಗೆ ತಯಾರಿ ಮಾಡಿಕೊಂಡೆವು. ಆದರೆ, ಕೋವಿಡ್‌, ಚಿತ್ರಮಂದಿರದ ಸಮಸ್ಯೆಯಿಂದ ಆಗಿರಲಿಲ್ಲ. ಈಗ ಬಿಡುಗಡೆ ಮಾಡುತ್ತಿದ್ದೇವೆ’ ಎಂದರು.

ಇದನ್ನೂ ಓದಿ:“ಕಾಗೆ ಮೊಟ್ಟೆ” ಚಿತ್ರ ನೋಡಿ ಭಾವುಕರಾದ ನಟ ಜಗ್ಗೇಶ್

ಚಿತ್ರದ ಬಗ್ಗೆ ಮಾತನಾಡುವ ನಾಯಕ ನಟ, ನಿರ್ದೇಶಕ ಸೂರಜ್‌, “ಇದೊಂದು ಬ್ಯೂಟಿಫ‌ುಲ್‌ ಲವ್‌ಸ್ಟೋರಿ ಹೊಂದಿರುವ ಚಿತ್ರ. ಮನರಂಜನಾತ್ಮಕ ಅಂಶಗಳಿರುವ ಚಿತ್ರ ಇದಾಗಲಿದೆ. ವಿನಾಕಾರಣ ಇಲ್ಲಿ ಬಿಲ್ಡಪ್ಸ್‌ಗಳಿಲ್ಲ. ಸಿನಿಮಾ ನೋಡಿದವರಿಗೆ ಇದು ಎಲ್ಲೋ ನೋಡಿದ, ಕೇಳಿದ ಲವ್‌ಸ್ಟೋರಿ ಎನಿಸುವಷ್ಟರ ಮಟ್ಟಿಗೆ ಚಿತ್ರ ಮೂಡಿಬಂದಿದೆ. ಇಲ್ಲಿ ನನ್ನದು ಲವ್ವರ್‌ ಬಾಯ್‌ ಪಾತ್ರ. ಚಿತ್ರದ ಮತ್ತೂಂದು ವಿಶೇಷವೆಂದರೆ, ಈ ಚಿತ್ರದಲ್ಲಿ ನನಗೆ ನಾಯಕಿಯಾಗಿ ಡಾ.ರಾಜಕುಮಾರ್ ಅವರ ಮೊಮ್ಮಗಳು, ನಟ ರಾಮ್‌ ಕುಮಾರ್‌ ಅವರ ಪುತ್ರಿ ಧನ್ಯಾ ರಾಮ್‌ಕುಮಾರ್‌ ನಟಿಸಿದ್ದಾರೆ. ಚಿತ್ರದಲ್ಲಿ ನನ್ನದು ಮೂರು ಶೇಡ್‌ ಇರುವ ಪಾತ್ರವಿದೆ’ ಎಂದು ವಿವರ ಕೊಡುತ್ತಾರೆ ಸೂರಜ್‌ಗೌಡ.

ಇನ್ನು, ಈ ಚಿತ್ರದಲ್ಲಿ ಲಿವಿಂಗ್‌ ರಿಲೇಶನ್‌ಶಿಪ್‌ ಬಗ್ಗೆಯೂ ಹೇಳಲಾಗಿದೆ ಯಂತೆ. ಈ ಬಗ್ಗೆ ಮಾತನಾಡುವ ಸೂರಜ್‌, “ಚಿತ್ರದಲ್ಲಿ ಲಿವಿಂಗ್‌ ರಿಲೇಶನ್‌ ಶಿಪ್‌ ಬಗ್ಗೆಯೂ ಹೇಳಿದ್ದೇವೆ. ಇವತ್ತಿಗೆ ಸಮಾಜ ಆ ಸಂಬಂಧವನ್ನು ಹೇಗೆ ನೋಡುತ್ತಾರೆ ಎಂಬ ಅಂಶದ ಜೊತೆಗೆ ಅದಕ್ಕೆ ನಮ್ಮ ಸಿನಿಮೇಟಿಕ್‌ ಆ್ಯಂಗಲ್‌ ಕೂಡಾ ನೀಡಲಾಗಿದೆ. ಈ ಚಿತ್ರದ ಹೈಲೈಟ್‌ಗಳಲ್ಲಿ ಕಥೆ ಹಾಗೂ ಚಿತ್ರಕಥೆ ಕೂಡಾ ಒಂದು’ ಎನ್ನುತ್ತಾರೆ ಸೂರಜ್‌.

ನಾಯಕಿ ಧನ್ಯಾ ರಾಮ್‌ಕುಮಾರ್‌ ಅವರು ಸಿಕ್ಕಾಪಟ್ಟೆ ಎಕ್ಸೆ„ಟ್‌ ಆಗಿದ್ದಾರೆ. ಅದಕ್ಕೆ ಕಾರಣ ಸಿನಿಮಾದ ಬಿಡುಗಡೆಯ ದಿನ ಘೋಷಣೆಯಾಗಿರೋದು. “ನಾನು ಹಾಗೂ ನನ್ನ ಅಮ್ಮ ಈಗಾಗಲೇ ಈ ಸಿನಿಮಾವನ್ನು ನೋಡಿದ್ದೇವೆ. ಆದರೆ, ಜನ ಹೇಗೆ ಸ್ವೀಕರಿಸುತ್ತಾರೆ ಎಂಬ ಕುತೂಹಲವಿದೆ. ಸಾಕಷ್ಟು ಕಥೆ ಕೇಳಿದ್ದೆ. ಆದರೆ ನನಗೆ ಈ ಸಿನಿಮಾದ ಕಥೆ ಇಷ್ಟವಾಗಿ ಒಪ್ಪಿಕೊಂಡೆ’ ಎನ್ನುತ್ತಾರೆ.

ಇನ್ನು ಚಿತ್ರಕ್ಕೆ ಸಂಗೀತ ನೀಡಿದ ರಘು ದೀಕ್ಷಿತ್‌ ಹಾಗೂ ಚಿತ್ರತಂಡ ತಮ್ಮ ಅನುಭವ ಹಂಚಿಕೊಂಡಿತು.