Premaloka 2; ಪ್ರೇಮಲೋಕದಿಂದ ಸಂದೇಶ ಬರಲೇ ಇಲ್ಲ!

Team Udayavani, Aug 2, 2024, 2:39 PM IST

ಕೆಲವು ಸಿನಿಮಾಗಳು ಸೆಟ್ಟೇರುತ್ತವೆ ಅಥವಾ ರಿಲೀಸ್‌ ಹಂತಕ್ಕೆ ಬರುತ್ತಿವೆ ಎಂದರೆ ಆ ಸಿನಿಮಾ ಮೇಲೆ ಫ್ಯಾನ್ಸ್‌ ಒಂದು ಕಣ್ಣಿಟ್ಟಿರುತ್ತಾರೆ. ಅದರಲ್ಲೂ ಸೂಪರ್‌ ಹಿಟ್‌ ಸಿನಿಮಾದ ಮುಂದುವರೆದ ಭಾಗ ಅಥವಾ ಅದೇ ನಿರ್ದೇಶಕ, ನಾಯಕ ನಟಿಸುವ ಸಿನಿಮಾ ಎಂದಾಗ ಆ ಚಿತ್ರದ “ಕ್ರೇಜ್‌’ ಕೂಡಾ ಹೆಚ್ಚಿರುತ್ತದೆ. ಇತ್ತೀಚೆಗೆ ಆ ತರಹದ ಒಂದು ಕುತೂಹಲ ಹುಟ್ಟಿಸಿದ್ದ ಸಿನಿಮಾ “ಪ್ರೇಮಲೋಕ-2′.

ಕ್ರೇಜಿಸ್ಟಾರ್‌ ರವಿಚಂದ್ರನ್‌ ಅವರ ಸೂಪರ್‌ ಹಿಟ್‌ ಸಿನಿಮಾ “ಪ್ರೇಮಲೋಕ’. ಕನ್ನಡ ಚಿತ್ರರಂಗದ ಬಗ್ಗೆ ಮಾತನಾಡುವಾಗ ಆ ಚಿತ್ರವನ್ನು ಬಿಟ್ಟು ಮಾತನಾಡುವಂತಿಲ್ಲ. ಹಾಗಾಗಿ, ರವಿಚಂದ್ರನ್‌ ಅವರು “ಪ್ರೇಮಲೋಕ-2′ ಘೋಷಿಸಿದಾಗ ಜನ ಅದರ ಅಪ್‌ ಡೇಟ್‌ಗಾಗಿ ಕಾಯುತ್ತಲೇ ಇದ್ದರು. ಅವರ ಹುಟ್ಟುಹಬ್ಬ ಮೇ 30ರಂದು ಹೊಸ ಅಪ್‌ಡೇಟ್‌ ಸಿಗಬಹುದು ಎಂದು ನಿರೀಕ್ಷಿಸಿದ್ದರು. ಆದರೆ, ಅಂದು ಸಿಗಲಿಲ್ಲ.

ಆದರೆ, ರವಿಚಂದ್ರನ್‌ ಅಂದು, “ಪ್ರೇಮಲೋಕ-2 ಚಿತ್ರದ ಟ್ರೇಲರ್‌ ರೆಡಿ. ಒಂದೇ ದಿನ ಗೊಂದಲ ಆಗೋದು ಬೇಡ ಎಂಬ ಕಾರಣಕ್ಕೆ ಬರ್ತ್‌ಡೇ ದಿನ ಬಿಟ್ಟಿಲ್ಲ. ಅದಕ್ಕಾಗಿ ಒಂದು ದೊಡ್ಡ ಸಮಾರಂಭವಿದೆ. ಆ ಕುರಿತಾದ ಸಾಕಷ್ಟು ವಿಚಾರಗಳನ್ನು ನಾನು ಹಂಚಿಕೊಳ್ಳಲಿದ್ದೇನೆ. ಇನ್ನೇನು 10 ದಿನಗಳಲ್ಲಿ ನಿಮ್ಮ ಕುತೂಹಲ, ಪ್ರಶ್ನೆಗಳಿಗೆ ತೆರೆ ಎಳೆಯುತ್ತೇನೆ’ ಎಂದಿದ್ದರು.

ಆದರೆ, ಕ್ರೇಜಿಸ್ಟಾರ್‌ ಆ ಮಾತು ಹೇಳಿ ಎರಡು ತಿಂಗಳು ಆಗಿದೆ. ಯಾವ ಅಪ್‌ಡೇಟ್‌ ಬಂದಿಲ್ಲ. ಮತ್ತೆ ಅಭಿಮಾನಿಗಳಲ್ಲಿ ಪ್ರಶ್ನೆ ಹುಟ್ಟಿಕೊಂಡಿದೆ. “ಕ್ರೇಜಿ ದುನಿಯಾದಲ್ಲಿ ಏನು ನಡೆಯುತ್ತಿದೆ, ಪ್ರೇಮಲೋಕ-2 ಅಪ್‌ಡೇಟ್‌ ಯಾವಾಗ, ಯಾಕಾಗಿ ತಡ ಮಾಡುತ್ತಿದ್ದಾರೆ’ ಎಂಬ ಮಾತುಗಳು ಅಭಿಮಾನಿಗಳದ್ದು. ಯಾವುದಾದರೂ ದೊಡ್ಡ ಸಿನಿಮಾದ ಟೀಸರ್‌, ಟ್ರೇಲರ್‌ ಬಂದಾಗ ಚಿತ್ರರಂಗಕ್ಕೊಂದು ಹೊಸ ಜೋಶ್‌ ಬರುತ್ತದೆ, ಏನೋ ಒಂದು ಹೊಸದು ಬರಲಿದೆ ಎಂಬ ವಿಶ್ವಾಸ ಬರುತ್ತದೆ. ಇದೇ ಕಾರಣದಿಂದ “ಪ್ರೇಮಲೋಕ-2′ ಮೇಲೆ ನಿರೀಕ್ಷೆ ಇಟ್ಟಿದ್ದಾರೆ. ಸ್ವಲ್ಪ ತಡವಾದರೂ ರವಿಚಂದ್ರನ್‌ ಅವರು ಏನೇ ಮಾಡಿದರೂ ಭಿನ್ನವಾಗಿ, ಹೊಸತನದಿಂದ ಮಾಡುತ್ತಾರೆ ಎಂಬ ನಂಬಿಕೆಯೊಂದಿಗೆ ಅಭಿಮಾನಿಗಳು “ಕಾಯುವಿಕೆ’ಯನ್ನು ಮುಂದುವರೆಸಿದ್ದಾರೆ.