ವಿಭಿನ್ನ ಗೆಟಪ್‌ನಲ್ಲಿ ನಟಿ ಶ್ರುತಿ ಭಜರಂಗಿ 2ನಲ್ಲಿ ರಗಡ್‌ ಲುಕ್‌

Team Udayavani, Jul 17, 2020, 4:19 PM IST

ಹ್ಯಾಟ್ರಿಕ್‌ ಹೀರೋ ಶಿವರಾಜಕುಮಾರ್‌ ಅಭಿನಯದ “ಭಜರಂಗಿ-2′ ಚಿತ್ರ ತೆರೆಗೆ ಬರಲು ಸಿದ್ಧವಾಗುತ್ತಿದೆ. ಇತ್ತೀಚೆಗೆ ನಡೆದ ನಟ ಶಿವರಾಜಕುಮಾರ್‌ ಅವರ 58ನೇ ಹುಟ್ಟುಹಬ್ಬದಂದು ಚಿತ್ರತಂಡ “ಭಜರಂಗಿ-2′ ಚಿತ್ರದ ಟೀಸರ್‌ ಅನ್ನು ಅದ್ದೂರಿಯಾಗಿ ಬಿಡುಗಡೆ ಮಾಡಿತ್ತು. 2013ರಲ್ಲಿ ಬಿಡುಗಡೆಯಾದ “ಭಜರಂಗಿ’ ಚಿತ್ರದ ಮುಂದುವರಿದ ಭಾಗವೇ “ಭಜರಂಗಿ-2′ ಎನ್ನಲಾಗುತ್ತಿದ್ದು, ಸದ್ಯ ಬಿಡುಗಡೆಯಾಗಿರುವ ಟೀಸರ್‌ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.

ಇನ್ನು ಬಿಡುಗಡೆಯಾಗಿರುವ “ಭಜರಂಗಿ-2′ ಟೀಸರ್‌ನಲ್ಲಿ ಶಿವರಾಜಕುಮಾರ್‌ ಅವರ ಗೆಟಪ್‌ ಜೊತೆಗೆ ಹಿರಿಯ ನಟಿ ಶ್ರುತಿ, ಭಜರಂಗಿ ಲೋಕಿ, ಭಾವನಾ ಅವರ ಪಾತ್ರಗಳ ಲುಕ್‌ ಕೂಡ ಸಾಕಷ್ಟು ಗಮನ ಸೆಳೆಯುತ್ತಿವೆ. ಸೋಶಿಯಲ್‌ ಮೀಡಿ ಯಾಗಳಲ್ಲೂ ಕೂಡ ಶಿವಣ್ಣ, ಶ್ರುತಿ, ಭಜರಂಗಿ ಲೋಕಿ ಮೊದಲಾದ ಕಲಾವಿದರ ಪಾತ್ರಗಳ ಬಗ್ಗೆ ಸಾಕಷ್ಟು ಮೆಚ್ಚುಗೆಯ ಮಾತುಗಳು ಕೇಳಿ ಬರುತ್ತಿದೆ. ಈ ಬಗ್ಗೆ ಮಾತನಾಡುವ ಚಿತ್ರದ ನಿರ್ದೇಶಕ ಎ. ಹರ್ಷ, “ಶಿವಣ್ಣ ಅವರ ಬರ್ತ್‌ಡೇ ಪ್ರಯುಕ್ತ ಇತ್ತೀಚೆಗೆ “ಭಜರಂಗಿ-2′ ಟೀಸರ್‌ ಬಿಡುಗಡೆ ಮಾಡಿದ್ದೆವು. ಆ ಟೀಸರ್‌ ಈ ಮಟ್ಟದಲ್ಲಿ ವೈರಲ್‌ ಆಗುತ್ತದೆ ಎಂದು ನಾವೂ ಅಂದುಕೊಂಡಿರಲಿಲ್ಲ. ಇಡೀ ಇಂಡಸ್ಟ್ರಿ ಕಡೆಯಿಂದ, ಶಿವಣ್ಣ ಅಭಿಮಾನಿಗಳ ಕಡೆಯಿಂದ, ಒಳ್ಳೆಯ ರೆಸ್ಪಾನ್ಸ್‌ ಸಿಗುತ್ತಿದೆ. ಟೀಸರ್‌ ರಿಲೀಸ್‌ ಆದ ಕೇವಲ 48 ಗಂಟೆಗಳಲ್ಲಿ 1.5 ಮಿಲಿಯನ್‌ ವೀವ್ಸ್‌ ಪಡೆದುಕೊಂಡಿದೆ.

ಇನ್ನು ಸಿನಿಮಾದಲ್ಲಿ ಶಿವಣ್ಣ, ಶ್ರುತಿ, ಭಾವನಾ, ಭಜರಂಗಿ ಲೋಕಿ ಹೀಗೆ ಪ್ರತಿಯೊಬ್ಬರ ಪಾತ್ರಗಳೂ ವಿಭಿನ್ನವಾಗಿದೆ. ಟೀಸರ್‌ನಲ್ಲಿ ಆ ಪಾತ್ರಗಳ ಸಣ್ಣ ಝಲಕ್‌ ತೋರಿಸಿದ್ದೇವೆ ಅಷ್ಟೇ. ಈ ಪಾತ್ರಗಳು ಸಾಕಷ್ಟು ಕುತೂಹಲಭರಿತವಾಗಿರುವುದರಿಂದ, ಈಗಲೇ ಇವರ ಪಾತ್ರಗಳ ಬಗ್ಗೆ ಹೆಚ್ಚೇನೂ ಹೇಳಲಾಗದು.
ಮುಂದೆ ಟ್ರೇಲರ್‌, ಹಾಡುಗಳ ಮೂಲಕ ಹೀಗೆ ಹಂತ ಹಂತವಾಗಿ ಪ್ರತಿ ಪಾತ್ರಗಳ ವೈಶಿಷ್ಟ್ಯತೆಗಳನ್ನು  ರಿವೀಲ್‌ ಮಾಡುತ್ತೇವೆ’ ಎನ್ನುತ್ತಾರೆ.

“ಭಜರಂಗಿ-2′ ಚಿತ್ರದ ಬಿಡುಗಡೆಯ ಬಗ್ಗೆ ಮಾತನಾಡಿರುವ ಎ. ಹರ್ಷ, “ಸದ್ಯ ನಮ್ಮ ಸಿನಿ ಮಾದ ಬಹುತೇಕ ಕೆಲಸಗಳು ಪೂರ್ಣಗೊಂಡಿದ್ದು, ಸಿನಿಮಾ ಪೋಸ್ಟ್‌ ಪ್ರೊಡಕ್ಷನ್‌ ಕೊನೆ ಹಂತದಲ್ಲಿದೆ. ಇಷ್ಟೊತ್ತಿಗಾಗಲೇ ಸಿನಿಮಾ ರಿಲೀಸ್‌ ಆಗಿರಬೇಕಿತ್ತು. ಆದ್ರೆ ಕೊರೊನಾ ಕಾರಣದಿಂದ ಎಲ್ಲವೂ ಮುಂದಕ್ಕೆ ಹೋಗುತ್ತಿದೆ. ಸದ್ಯ
ಸಿನಿಮಾದ ಡಬ್ಬಿಂಗ್‌ ಮತ್ತು ರಿಮೇಕ್‌ ರೈಟ್ಸ್‌ಗಳಿಗೆ ಬೇರೆ ಭಾಷೆಗಳಿಂದಲೂ ಸಾಕಷ್ಟು ಬೇಡಿಕೆ ಬರುತ್ತಿದೆ. ಕೊರೊನಾ ಸಂಕಷ್ಟ ಮುಗಿದ ಬಳಿಕ
ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ಸಿನಿಮಾವನ್ನು ರಿಲೀಸ್‌ ಮಾಡುವ ಯೋಚನೆಯಿದೆ’ ಎಂದಿದ್ದಾರೆ. ಜಯಣ್ಣ ಮತ್ತು ಭೋಗೇಂದ್ರ ನಿರ್ಮಾಣದಲ್ಲಿ ಮೂಡಿಬರುತ್ತಿರುವ “ಭಜರಂಗಿ-2′ ಚಿತ್ರಕ್ಕೆ ಅರ್ಜುನ್‌ ಜನ್ಯಾ ಸಂಗೀತ ಸಂಯೋಜಿಸಿದ್ದಾರೆ.