ಟ್ರೈಲರ್ ನಲ್ಲಿ ಝಳಪಿಸಿದ ಬಿಚ್ಚುಗತ್ತಿ

Team Udayavani, Feb 21, 2020, 5:55 AM IST

ಹಿರಿಯ ಸಾಹಿತಿ ಡಾ.ಬಿ.ಎಲ್‌.ವೇಣು ಅವರ ಐತಿಹಾಸಿಕ ಕಾದಂಬರಿ “ದಳವಾಯಿ ಮುದ್ದಣ’ ಈಗ ದೃಶ್ಯರೂಪ ಪಡೆದುಕೊಂಡಿದೆ. “ದಳವಾಯಿ ಮುದ್ದಣ್ಣ’ ಕಾದಂಬರಿ ಈಗ ಚಲನಚಿತ್ರಕ್ಕೆ ರೂಪಾಂತರಗೊಂಡು, “ಬಿಚ್ಚುಗತ್ತಿ’ ಹೆಸರಿನಲ್ಲಿ ತೆರೆಗೆ ಬರುತ್ತಿದೆ. ಸದ್ಯ ಈ ಚಿತ್ರದ ಬಹುತೇಕ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳು ಪೂರ್ಣಗೊಂಡಿದ್ದು, ಇತ್ತೀಚೆಗೆ ನಡೆದ ಸಮಾರಂಭದಲ್ಲಿ ಚಿತ್ರದ ಟೀಸರ್‌ ಅದ್ಧೂರಿಯಾಗಿ ಹೊರಬಂದಿದೆ.

ಕಲಾವಿದರುಗಳಾದ ಧನಂಜಯ್‌, ವಿಕ್ಕಿ, ವೈಭವ್‌, ಸಚ್ಚಿನ್‌, ಶ್ರೀಲೀಲಾ, ಅಪೂರ್ವ, ನಿರ್ದೇಶಕರುಗಳಾದ ಎ.ಪಿ.ಅರ್ಜುನ್‌, ವಾಸು, ಸಹನಾ ಮೂರ್ತಿ, ನವೀನ್‌ ರೆಡ್ಡಿ, ಸಿಂಪಲ್‌ ಸುನಿ, ನಿರ್ಮಾಪಕರಾ ಸುಪ್ರೀತ್‌, ಜಾಗ್ವಾರ್‌ ಮನೋಹರ್‌ ಸೇರಿದಂತೆ ಚಿತ್ರರಂಗದ ಹಲವು ಗಣ್ಯರು ಸಮಾರಂಭದಲ್ಲಿ ಹಾಜರಿದ್ದು, ಚಿತ್ರದ ಟೀಸರ್‌ ಬಿಡುಗಡೆಗೊಳಿಸಿ ಚಿತ್ರತಂಡಕ್ಕೆ ಶುಭ ಹಾರೈಸಿದರು.

ಇದೇ ವೇಳೆ ಮಾತನಾಡಿದ ಚಿತ್ರದ ಸಂಗೀತ ನಿರ್ದೇಶಕ ಹಂಸಲೇಖಾ, “ಐತಿಹಾಸಿಕ ಚಿತ್ರ ಮಾಡುವುದು ಅಷ್ಟು ಸುಲಭವಲ್ಲ. ಮೊದಲು ಇದನ್ನು ನಾನೇ ಮಾಡಬೇಕಾಗಿತ್ತು. ಆದರೆ ನನ್ನ ಬಜೆಟ್‌ಗೆ ತಕ್ಕಂತೆ ನಿರ್ಮಾಪಕರು ಸಿದ್ಧರಿರಲಿಲ್ಲ. ಆನಂತರ ನಿರ್ದೇಶಕ ಸಂತುಗೆ ಒಳ್ಳೆ ಚಿತ್ರ ಕೊಡಿಸುತ್ತೇನೆಂದು ಮಾತು ಕೊಟ್ಟಿದ್ದೆ. ಅದರಂತೆ ಅವರಿಗೆ ಜವಾಬ್ದಾರಿ ವಹಿಸಲಾಯಿತು. ಅದನ್ನು ಅವರು ಚೆನ್ನಾಗಿ ನಿಭಾಯಿಸಿದ್ದಾರೆ. ರಾಜವರ್ಧನ್‌ ಭವಿಷ್ಯದ ನಟನಾಗಲಿದ್ದಾರೆ. ಬುದ್ಧಿ ಉಪಯೋಗಿಸಿ ಒಳ್ಳೆಯ ಸಿನಿಮಾಗಳಲ್ಲಿ ನಟಿಸಬೇಕು. ಯಾವುದೇ ಕಾರಣಕ್ಕೂ ನಿರ್ದೇಶಕ, ನಿರ್ಮಾಪಕರಿಗೆ ಹೊರೆಯಾಗಬಾರದು. ದೇಸಿಯ ಸಂಗೀತದಲ್ಲಿ ಬಂದಿರುವ ಹಾಡು ಚೆನ್ನಾಗಿದೆ. ಕರ್ನಾಟಕದಲ್ಲಿ ಇನ್ನೂ ಅನೇಕ ಸಾಧಕರು, ಪಾಳೇಗಾರರ ಕಥೆಗಳು ಇದೆ. ಈಗಿನ ತಂತ್ರಜ್ಞಾನಕ್ಕೆ ಹೊಂದಿಕೊಳ್ಳುವಂತೆ, ಇಂಥ ಚಿತ್ರಗಳನ್ನು ಮಾಡಬಹುದೆಂದು’ ಎಂದು ಹೇಳಿದರು.

ನಾಯಕ ನಟ ರಾಜವರ್ಧನ್‌ ತಂದೆ, ಹಿರಿಯ ಹಾಸ್ಯ ನಟ ಡಿಂಗ್ರಿ ನಾಗರಾಜ್‌ ಮಾತನಾಡಿ, “ಸುಮಾರು 45 ವರ್ಷಗಳಿಂದ ಚಿತ್ರರಂಗದಲ್ಲಿ ಸಕ್ರಿಯನಾಗಿ, 560 ಚಿತ್ರಗಳಲ್ಲಿ ನಟಿಸಿದ್ದೇನೆ. ಎಲ್ಲರ ಸಹಕಾರ- ಪ್ರೋತ್ಸಾಹದಿಂದ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿದ್ದೇನೆ. ಈಗ ನನ್ನ ಮಗ ರಾಜವರ್ಧನ್‌ ಸ್ವ ಪ್ರತಿಭೆಯಿಂದ ಇಲ್ಲಿಯವರೆಗೂ ಬಂದಿದ್ದಾನೆ. ನನಗೆ ನೀಡಿದ ಸಹಕಾರವನ್ನು ಇವನಿಗೂ ಕೊಡಬೇಕೆಂದು’ ಪ್ರೇಕ್ಷಕರಲ್ಲಿ ಕೋರಿದರು.

“ಬಿಚ್ಚುಗತ್ತಿ’ ಚಿತ್ರದಲ್ಲಿ ಭರಮಣ್ಣ ನಾಯಕನಾಗಿ ನಟ ರಾಜವರ್ಧನ್‌, ಸಿದ್ದಾಂಬೆಯಾಗಿ ನಟಿ ಹರಿಪ್ರಿಯಾ “ಬಾಹುಬಲಿ’ ಖ್ಯಾತಿಯ ಪ್ರಭಾಕರ್‌ ದಳವಾಯಿ ಮುದ್ದಣ್ಣನಾಗಿ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ. ಉಳಿದಂತೆ ಶರತ್‌ ಲೋಹಿತಾಶ್ವ, ಶ್ರೀನಿವಾಸ ಮೂರ್ತಿ, ಸ್ಪಶಾì ರೇಖಾ, ಡಿಂಗ್ರಿ ನಾಗರಾಜ್‌, ಕಲ್ಯಾಣಿ, ಪ್ರಕಾಶ್‌ ಹೆಗ್ಗೊಡು, ರಮೇಶ್‌ ಪಂಡಿತ್‌, ಸುನೇತ್ರಾ ಪಂಡಿತ್‌, ಉಗ್ರಂ ರವಿ ಮುಂತಾದವರು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಹಿರಿಯ ಸಾಹಿತಿ ಡಾ.ಬಿ.ಎಲ್‌.ವೇಣು ಅವರೇ “ದಳವಾಯಿ ಮುದ್ದಣ’ ಕಾದಂಬರಿಯನ್ನು ಚಿತ್ರರೂಪಕ್ಕೆ ರೂಪಾಂತರಿಸಿದ್ದು, “ಬಿಚ್ಚುಗತ್ತಿ’ ಚಿತ್ರಕ್ಕೆ ಚಿತ್ರಕತೆ, ಸಂಭಾಷಣೆ ಬರೆದಿದ್ದಾರೆ. ಈ ಹಿಂದೆ “ಅಲೆಮಾರಿ’, “ಕಾಲೇಜ್‌ ಕುಮಾರ್‌’ ಮೊದಲಾದ ಪಕ್ಕಾ ಔಟ್‌ ಆ್ಯಂಡ್‌ ಔಟ್‌ ಕಮರ್ಶಿಯಲ್‌ ಚಿತ್ರಗಳನ್ನು ನಿರ್ದೇಶಿಸಿ ಸೈ ಎನಿಸಿಕೊಂಡಿದ್ದ ನಿರ್ದೇಶಕ ಹರಿ ಸಂತೋಷ್‌ ಮೊದಲ ಬಾರಿಗೆ ಇಂಥದ್ದೊಂದು ಐತಿಹಾಸಿಕ ಕಥಾಹಂದರದ ಚಿತ್ರಕ್ಕೆ ಆಕ್ಷನ್‌-ಕಟ್‌ ಹೇಳಿದ್ದಾರೆ. “ಓಂ ಸಾಯಿ ಕೃಷ್ಣ ಪೊ›ಡಕ್ಷನ್ಸ್‌’ ಬ್ಯಾನರ್‌ ಮೂಲಕ ನಿರ್ಮಾಣವಾಗಿರುವ “ಬಿಚ್ಚುಗತ್ತಿ’ ಮಾರ್ಚ್‌ ಕೊನೆಯೊಳಗೆ ತೆರೆ ಕಾಣುವ ಸಾಧ್ಯತೆ ಇದೆ.