ಕೆಜಿಎಫ್ ಎಂಟ್ರಿಗೆ ಸಂಜಯ್‌ ದತ್‌ ರೆಡಿ

ಗಡ್ಡ ಬಿಟ್ಟಿರೋದು ಅಧೀರನಿಗಾಗಿ ಎಂದ ನಟ

Team Udayavani, Oct 16, 2020, 1:04 PM IST

ಕೆಜಿಎಫ್-2′ ಸಿನಿಮಾಕ್ಕಾಗಿ ಕಾಯುತ್ತಿರುವ ಅಭಿಮಾನಿಗಳಿಗೊಂದು ಗುಡ್‌ ನ್ಯೂಸ್‌ ಸಿಕ್ಕಿದೆ. ಅದು ಸಂಜಯ್‌ ದತ್‌ ಅವರಕಡೆಯಿಂದ. ನವೆಂಬರ್‌ನಲ್ಲಿ ತಾನು “ಕೆಜಿಎಫ್-2′ ಸೆಟ್‌ಗೆ ಮರಳುವುದಾಗಿ ಸ್ವತಃ ಸಂಜಯ್‌ ದತ್‌ ಹೇಳಿರುವುದರಿಂದ ಅಭಿಮಾನಿಗಳು ನಿಟ್ಟುಸಿರು ಬಿಟ್ಟಿದ್ದಾರೆ.

ಹೌದು, ಸಂಜಯ್‌ ದತ್‌ “ಕೆಜಿಎಫ್-2′ ಚಿತ್ರದಲ್ಲಿ ನಟಿಸುತ್ತಿದ್ದಾರೆ ಎಂಬ ಸುದ್ದಿ ಹೊರಬಿದ್ದಾಗ ಸಿನಿಪ್ರೇಮಿಗಳು ಸಂಭ್ರಮಿಸಿದ್ದರು. ಮೊದಲ ಬಾರಿಗೆ ಬಾಲಿವುಡ್‌ನ‌ ಸ್ಟಾರ್‌ ನಟ ಸಂಜಯ್‌ ದತ್‌ ಕನ್ನಡ ಚಿತ್ರದಲ್ಲಿ ನಟಿಸುತ್ತಿರುವುದರಿಂದ ಚಿತ್ರದ ಕ್ರೇಜ್‌ ಕೂಡಾ ಹೆಚ್ಚಾಗಿತ್ತು. ಆದರೆ, ಆಗಸ್ಟ್‌ನಲ್ಲಿ ಸಂಜಯ್‌ ದತ್‌ ಅವರಕ್ಯಾನ್ಸರ್‌ ಕುರಿತಾದ ಸುದ್ದಿ ಹೊರಬಿದ್ದ ನಂತರ, ಅಭಿಮಾನಿಗಳು ಕಸಿವಿಸಿಗೊಂಡಿದ್ದರು. ವಿದೇಶಕ್ಕೆ ತೆರಳಿದ್ದ ಸಂಜಯ್‌ ದತ್‌, ಗುಣಮುಖರಾಗಿ ಮತ್ತೆ ಯಾವಾಗ “ಕೆಜಿಎಫ್-2’ಗೆ ಬರುತ್ತಾರೆ ಎಂಬ ಲೆಕ್ಕಾಚಾರಆರಂಭವಾಗಿತ್ತು. ಆದರೆ, ಈಗ ಸ್ವತಃ ಸಂಜಯ್‌ ದತ್‌ ತಾನು ನವೆಂಬರ್‌ನಲ್ಲಿ “ಕೆಜಿಎಫ್-2′ ಸೆಟ್‌ಗೆ ಮರಳುತ್ತಿರುವುದಾಗಿ ಹೇಳಿದ್ದಾರೆ. ಈ ಮೂಲಕ “ಅಧೀರ’ ಎಂಟ್ರಿಯಾಗುತ್ತಿರುವುದು ಪಕ್ಕಾ ಆಗಿದೆ.

ಬಾಲಿವುಡ್‌ನ‌ ಖ್ಯಾತ ಹೇರ್‌ ಸ್ಟೈಲಿಸ್ಟ್‌ ಆಲೀಮ್‌ ಹಕೀಮ್‌ ಅವರು ಹೊಸದಾಗಿ ಆರಂಭಿಸಿರುವ ಸಲೋನ್‌ಗೆ ಬಂದು ಹೇರ್‌ ಕಟ್ಟಿಂಗ್‌ ಮಾಡಿಸಿಕೊಂಡು ಸಂಜಯ್‌ ದತ್‌ ಈ ವೇಳೆ ಒಂದು ವಿಡಿಯೋ ಮಾಡಿದ್ದಾರೆ. ಈವಿಡಿಯೋದಲ್ಲಿ ನವೆಂಬರ್‌ನಿಂದ ಸಿನಿಮಾ ಕೆಲಸದಲ್ಲಿ ತೊಡಗಿಕೊಳ್ಳುವ ಬಗ್ಗೆ ಮಾತ ನಾಡಿದ್ದಾರೆ. ಜೊತೆಗೆ ಸದ್ಯ ಗಡ್ಡ ಬಿಟ್ಟಿರುವ ಸಂಜಯ್‌, “ಈ ಗಡ್ಡ ಕೆಜಿಎಫ್-2ನ ಅಧೀರ ಪಾತ್ರಕ್ಕಾಗಿ’ ಎಂದಿದ್ದಾರೆ.

ತಾನು ಕ್ಯಾನ್ಸರ್‌ ಗೆದ್ದು ಬರುವ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ. “ಜೀವನದಲ್ಲಿ ಸಾಕಷ್ಟು ಸಮಸ್ಯೆಗಳನ್ನು ಎದುರಿಸಿ ಗೆದ್ದು ಬಂದಿದ್ದೇನೆ. ಈ ಸಮಸ್ಯೆಯನ್ನೂ ಗೆದ್ದು ಬರುತ್ತೇನೆ’ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಸದ್ಯ “ಕೆಜಿಎಫ್-2′ ಚಿತ್ರೀಕರಣ ಆರಂಭವಾಗಿದ್ದು, ಮಂಗಳೂರು ಸುತ್ತಮುತ್ತ ಚಿತ್ರೀಕರಣ ಮಾಡಿರುವ ಚಿತ್ರತಂಡ ಈಗ ಹೈದರಾಬಾದ್‌ನತ್ತ ಮುಖ ಮಾಡಿದೆ. ಬಹುತೇಕ ಚಿತ್ರೀಕರಣ ಪೂರ್ಣಗೊಳಿಸಿರುವ ಚಿತ್ರತಂಡ, ನವೆಂಬರ್‌ನಲ್ಲಿ ಸಂಜಯ್‌ ದತ್‌ ಅವರನ್ನು ಬರಮಾಡಿಕೊಳ್ಳಲಿದೆ.

-ರವಿಪ್ರಕಾಶ್‌ ರೈ