ಸಿಂಗನ ಹಬ್ಬದೂಟ

Team Udayavani, Jul 12, 2019, 5:00 AM IST

ಅಂದು ಇಡೀ ಚಿತ್ರತಂಡದ ಮೊಗದಲ್ಲಿ ಸಂತಸ ಎದ್ದು ಕಾಣುತ್ತಿತ್ತು. ಜೊತೆಗೆ ಇನ್ನೊಂದು ಸಂಭ್ರಮಕ್ಕಾಗಿ ಸಾಕ್ಷಿಯಾಗುವ ಕಾತರ ಕೂಡಾ ಇತ್ತು. ಅದೇ ಕಾರಣದಿಂದ ಎಲ್ಲರೂ ಕಣ್ಣು ಸಭಾಂಗಣದ ಬಾಗಿಲತ್ತ ನೆಟ್ಟಿತ್ತು. ಅಷ್ಟೊತ್ತಿಗೆ ಮ್ಯೂಸಿಕ್‌ ಆನ್‌ ಆಯಿತು. “ಬಂದ ಚಕ್ರವರ್ತಿ ….’ ಹಾಡಿನ ಸದ್ದು. ಅತ್ತ ಕಡೆಯಿಂದ ದರ್ಶನ್‌ ಎಂಟ್ರಿ. ಇದು “ಸಿಂಗ’ ಚಿತ್ರದ ಆಡಿಯೋ ಸಕ್ಸಸ್‌ಮೀಟ್‌ನಲ್ಲಿ ಕಂಡುಬಂದಿದ್ದು. ಚಿರಂಜೀವಿ ಸರ್ಜಾ ನಾಯಕರಾಗಿರುವ “ಸಿಂಗ’ ಚಿತ್ರ ಮುಂದಿನ ವಾರ (ಜುಲೈ 19) ತೆರೆಕಾಣುತ್ತಿದೆ.

ಚಿತ್ರ ತೆರೆಕಾಣುವ ಮೊದಲೇ ಚಿತ್ರತಂಡ ಖುಷಿಯಾಗಿರಲು ಕಾರಣ, ಚಿತ್ರದ ಹಾಡು ಹಿಟ್‌ ಆಗಿರೋದು. ಚಿತ್ರದ “ಶ್ಯಾನೆ ಟಾಪಾಗವೆ …’ ಹಾಡು ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗಿದೆ. ಆ ಸಂಭ್ರಮದ ಜೊತೆಗೆ ಚಿತ್ರದ ಮತ್ತೂಂದು ಹಾಡು “ಬ್ಯೂಟಿಪುಲ್‌ ಹುಡುಗಿ’ ಹಾಡಿನ ಬಿಡುಗಡೆಯ ಸಮಾರಂಭಕ್ಕೆ ದರ್ಶನ್‌ ಅತಿಥಿಯಾಗಿ ಬಂದಿದ್ದರು. ಚಿತ್ರದ ಹಾಡು ಬಿಡುಗಡೆ ಮಾಡಿ, ಚಿತ್ರತಂಡಕ್ಕೆ ಶುಭಕೋರುವ ಜೊತೆಗೆ ಹಾಡಿಗೆ ಮೆಚ್ಚುಗೆ ಸೂಚಿಸಿದರು.

ಈ ಚಿತ್ರವನ್ನು ಉದಯ್‌ ಮೆಹ್ತಾ ನಿರ್ಮಿಸಿದ್ದಾರೆ. ನಿರ್ಮಾಣದಿಂದ ಒಂದೆರಡು ವರ್ಷ ಗ್ಯಾಪ್‌ ತೆಗೆದುಕೊಂಡಿದ್ದ ಮೆಹ್ತಾ ಈಗ “ಸಿಂಗ’ ಮೇಲೆ ನಂಬಿಕೆ ಇಟ್ಟಿದ್ದು, ಒಂದು
ಕಮರ್ಷಿಯಲ್‌ ಸಿನಿಮಾವಾಗಿ ಎಲ್ಲರಿಗೂ ಇಷ್ಟವಾಗುತ್ತದೆ ಎಂಬ ವಿಶ್ವಾಸವಿದೆ. ಚಿತ್ರವನ್ನು ವಿಜಯ್‌ ಕಿರಣ್‌ ನಿರ್ದೇಶಿಸಿದ್ದಾರೆ. ಈ ಹಿಂದೆ “ರಾಮ್‌ಲೀಲಾ’ ಚಿತ್ರ
ಮಾಡಿದ್ದ ವಿಜಯ್‌ ಕಿರಣ್‌ ಈಗ “ಸಿಂಗ’ ಮಾಡಿದ್ದಾರೆ. ನಾಯಕ ಚಿರಂಜೀವಿ ಸರ್ಜಾ ಅವರಿಗೂ ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಹಿಟ್‌ ಆಗುವ ವಿಶ್ವಾಸ. ಚಿರು ಹೇಳುವಂತೆ ಇದು
ಅಭಿಮಾನಿಗಳಿಗೆ ಹಬ್ಬದ ಊಟವಿದ್ದಂತೆ. ಎಲ್ಲಾ ಅಂಶಗಳು ಇರುವ ಸಿನಿಮಾವಾಗಿ ಇಷ್ಟವಾಗಲಿದೆಯಂತೆ. ಚಿತ್ರದ ಹಾಡೊಂದನ್ನು ಮೇಘನಾರಾಜ್‌ ಹಾಡಿದ್ದಾರೆ. ಚಿತ್ರದಲ್ಲಿ
ಅದಿತಿ ಪ್ರಭುದೇವ ನಾಯಕಿಯಾಗಿದ್ದು, ಒಳ್ಳೆಯ ಬ್ಯಾನರ್‌ನಲ್ಲಿ ಕೆಲಸ ಮಾಡಿದ ಖುಷಿ ಇದೆಯಂತೆ. ಚಿತ್ರದಲ್ಲಿ ತಾರಾ ತಾಯಿ ಪಾತ್ರ ಮಾಡಿದ್ದು, ಸೆಟ್‌ನಲ್ಲಿ
ಒಳ್ಳೆಯ ವಾತಾವರಣವಿತ್ತಂತೆ. ಚಿತ್ರದಲ್ಲಿ ಶಿವರಾಜ್‌ ಕೆ.ಆರ್‌.ಪೇಟೆ, ರವಿಶಂಕರ್‌ ಸೇರಿದಂತೆ ಅನೇಕರು ನಟಿಸಿದ್ದಾರೆ. ಚಿತ್ರಕ್ಕೆ ಕಿರಣ್‌ ಹಂಪಾಪುರ ಛಾಯಾಗ್ರಹಣವಿದೆ.