ಸ್ಟಾರ್‌ ಕನ್ನಡಿಗನಿಗೆ ಸ್ಟಾರ್ಸ್ ಸಾಥ್

Team Udayavani, Oct 18, 2019, 5:26 AM IST

ಚಿತ್ರರಂಗವೆಂದರೆ ಹಾಗೆ. ಅದು ಎಂಥವರನ್ನೂ ಕೂಡ ತನ್ನತ್ತ ಆಕರ್ಷಿಸುತ್ತದೆ. ರಾಜಕಾರಣಿಗಳು, ಉದ್ಯಮಿಗಳು, ಡಾಕ್ಟರ್, ಇಂಜಿನಿಯರ್, ಅಡ್ವೋಕೆಟ್ಸ್‌, ಆಡಿಟರ್, ಐಟಿ-ಬಿಟಿ, ಹೀಗೆ ಎಲ್ಲಾ ಕ್ಷೇತ್ರದವರೂ ಚಿತ್ರರಂಗದಲ್ಲಿ ಅದೃಷ್ಟ ಪರೀಕ್ಷೆ ಮಾಡಿರುವ ಉದಾಹರಣೆಗಳು ಸಾಕಷ್ಟಿವೆ. ಇಂತಹ ಚಿತ್ರರಂಗದಲ್ಲಿ ಈಗ ಆಟೋರಿಕ್ಷಾ ಚಾಲಕರು ಮತ್ತು ಕ್ಯಾಬ್‌ ಚಾಲಕರು ಕೂಡ ಅದೃಷ್ಟ ಪರೀಕ್ಷೆಗೆ ಇಳಿಯುತ್ತಿದ್ದಾರೆ.

ಹೌದು, ಬೆಂಗಳೂರಿನಲ್ಲಿ ಆಟೋರಿಕ್ಷಾ ಓಡಿಸುತ್ತಿರುವವರು ಮತ್ತು ಕ್ಯಾಬ್‌ ಓಡಿಸುತ್ತಿರುವ ಅನೇಕ ಸಮಾನ ಮನಸ್ಕರು ಸೇರಿ ಈಗ “ಸ್ಟಾರ್‌ ಕನ್ನಡಿಗ’ಎನ್ನುವ ಚಿತ್ರವನ್ನು ನಿರ್ಮಿಸಿದ್ದಾರೆ. ಆಟೋರಿಕ್ಷಾ ಚಾಲಕ ಮಂಜುನಾಥ್‌ ಈ ಚಿತ್ರದಲ್ಲಿ ನಾಯಕ ನಟನಾಗಿ ಅಭಿನಯಿಸಿದ್ದು, ಜೊತೆಗೆ ನಿರ್ದೇಶನದ ಹೊಣೆಯನ್ನೂ ತಾನೇ ಹೊತ್ತುಕೊಂಡಿದ್ದಾರೆ. ಸುಮಾರು ಒಂದೂವರೆ ವರ್ಷಗಳ ಹಿಂದೆ ಪ್ರಾರಂಭವಾದ ಈ ಚಿತ್ರ ಈಗ ಬಿಡುಗಡೆಯ ಹಂತಕ್ಕೆ ಬಂದಿದ್ದು, ಇದೇ ನವೆಂಬರ್‌ 1ರ ಕನ್ನಡ ರಾಜ್ಯೋತ್ಸವದಂದು ತೆರೆಗೆ ಬರುತ್ತಿದೆ.

ಸದ್ಯ ಚಿತ್ರದ ಪ್ರಮೋಶನ್‌ ಕೆಲಸಗಳಿಗೆ ಚಾಲನೆ ನೀಡಿರುವ ಚಿತ್ರ ಇತ್ತೀಚೆಗೆ “ಸ್ಟಾರ್‌ ಕನ್ನಡಿಗ’ ಚಿತ್ರದ ಟ್ರೇಲರ್‌ ಮತ್ತು ಆಡಿಯೋವನ್ನು ಹೊರತಂದಿದೆ. “ಸ್ಟಾರ್‌ ಕನ್ನಡಿಗ’ ಚಿತ್ರದಲ್ಲಿ ಮಂಜುನಾಥ್‌, ಶಾಲಿನಿ ಭಟ್‌, ರಾಕ್‌ಲೈನ್‌ ಸುಧಾಕರ್‌ ಮೊದಲಾದ ಕಲಾವಿದರು ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಪವನ್‌ ಪಾರ್ಥ ಚಿತ್ರದ ಹಾಡುಗಳಿಗೆ ಸಂಗೀತ ಸಂಯೋಜಿಸಿದ್ದಾರೆ. ಚಿತ್ರಕ್ಕೆ ಮಹದೇವ್‌ ಛಾಯಾಗ್ರಹಣ, ಶಿವಕುಮಾರ ಸ್ವಾಮಿ ಸಂಕಲನವಿದೆ. ಆಟೋರಿಕ್ಷಾ ಮತ್ತು ಕ್ಯಾಬ್‌ ಚಾಲಕರಾದ ಚೆನ್ನೀರ, ಹರೀಶ್‌ ಜೋಗಿ, ಅರುಣಕುಮಾರ್‌, ಭೈರವ, ಲಕ್ಷ್ಮೀ, ಪ್ರಭು ಮೊದಲಾದವರು ಸೇರಿ ಜಂಟಿಯಾಗಿ ಬಂಡವಾಳ ಹೂಡಿ ಈ ಚಿತ್ರವನ್ನು ನಿರ್ಮಿಸಿದ್ದಾರೆ.

ಇನ್ನು “ಸ್ಟಾರ್‌ ಕನ್ನಡಿಗ’ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಅಡಿಯಿಡುವ ಕನಸು ಹೊತ್ತಿರುವ ಚಾಲಕರಿಗೆ ಸಾಥ್‌ ನೀಡಿರುವ ನಟ ಧನಂಜಯ್‌, ಲೂಸ್‌ಮಾದ ಯೋಗಿ, ವಸಿಷ್ಠ ಸಿಂಹ, ನಟಿ ಹರಿಪ್ರಿಯಾ ಮೊದಲಾದವರು “ಸ್ಟಾರ್‌ ಕನ್ನಡಿಗ’ ಚಿತ್ರ ಯಶಸ್ವಿಯಾಗಲಿ ಎಂದು ಶುಭಕೋರಿದ್ದಾರೆ.