ತನಿಖೆ ಪ್ರಗತಿಯಲ್ಲಿದೆ…

Team Udayavani, Aug 30, 2019, 5:30 AM IST

ಕನ್ನಡದಲ್ಲಿ ‘ತನಿಖೆ’ ಎಂಬ ಸಿನಿಮಾವೊಂದು ಬಂದಿರೋದು ನಿಮಗೆ ಗೊತ್ತಿರಬಹುದು. ಈಗ ಅದೇ ಹೆಸರಿನಲ್ಲಿ ಮತ್ತೂಂದು ಸಿನಿಮಾ ಬರುತ್ತಿದೆ. ಹಾಗಂತ ಹಳೆಯ ‘ತನಿಖೆ’ಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ. ಕನಕಪುರದಲ್ಲಿ ಎಂಬತ್ತು ವರ್ಷಗಳ ಹಿಂದೆ ನಡೆದ ಘಟನೆಯನ್ನಾಧರಿಸಿ ಈ ಸಿನಿಮಾ ಮಾಡಲಾಗುತ್ತಿದೆ.

ಈ ಚಿತ್ರವನ್ನು ಜಿ.ಎಸ್‌.ಕಲಿಗೌಡ ನಿರ್ದೇಶಿ­ಸುತ್ತಿದ್ದಾರೆ. ಜೊತೆಗೆ ನಿರ್ಮಾಣದಲ್ಲೂ ಕೈ ಜೋಡಿಸುತ್ತಿದ್ದಾರೆ. ಚಿತ್ರದ ಬಗ್ಗೆ ಮಾತನಾಡುವ ಅವರು, ಕೆಟ್ಟ ವ್ಯಕ್ತಿಯೊಬ್ಬ ಎಲ್ಲರನ್ನೂ ಸಾಯಿಸುತ್ತಾ ಕೊನೆಗೆ ಸನ್ಮಾರ್ಗಕ್ಕೆ ಬಂದು ಕಾಡಿಗೆ ಹೋಗುತ್ತಾನೆ. ಈ ಕೇಸ್‌ನ ಬೆನ್ನು ಬಿದ್ದ ಪೊಲೀಸರು ಆತನನ್ನು ಮನವೊಲಿಸಿ ಕರೆತರುತ್ತಾರೆ. 20 ಕೊಲೆಗಳನ್ನು ಮಾಡಿರುವ ಆತ ಯಾರು, ಆತನ ಹಿನ್ನೆಲೆ ಏನು ಎಂಬ ಅಂಶದೊಂದಿಗೆ ಈ ಚಿತ್ರ ಸಾಗುತ್ತದೆ ಎನ್ನುತ್ತಾರೆ.

ಚಿತ್ರದಲ್ಲಿ ಆರ್‌.ಡಿ.ಅನಿಲ್ ನಾಯಕರಾಗಿ ನಟಿಸುತ್ತಿದ್ದಾರೆ. ಜೊತೆಗೆ ನಿರ್ಮಾಣದಲ್ಲೂ ತೊಡಗಿಸಿಕೊಂಡಿದ್ದಾರೆ. ಚಿತ್ರದಲ್ಲಿ ಪ್ರಬಿಕ್‌, ಸಂತೋಷ್‌ ಜಯಕುಮಾರ್‌, ಚಂದನಾ, ಮುನಿರಾಜು ಸೇರಿದಂತೆ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ. ಮೈಸೂರು, ಪಾಂಡವಪುರ, ಕನಕಪುರ, ರಾಮನಗರ, ಚನ್ನಪಟ್ಟಣ ಸುತ್ತಮುತ್ತ ಚಿತ್ರೀಕರಣ ನಡೆಸಲಾಗಿದೆ.

ಚಿತ್ರಕ್ಕೆ ಕ್ರಿಸ್ಟೋಫ‌ರ್‌ ಲೀ ಸಂಗೀತವಿದೆ. ಶ್ಯಾಮ್‌ ಸಿಂಧನೂರು ಛಾಯಾಗ್ರಹಣ, ಅಲ್ಟಿಮೇಟ್ ಶಿವು ಸಾಹಸ ಚಿತ್ರಕ್ಕಿದೆ.ಇತ್ತೀಚೆಗೆ ಚಿತ್ರದ ಆಡಿಯೋ ಬಿಡುಗಡೆಯಾಯಿತು.