ಇಂದಿನಿಂದ ‘ತ್ರಿಕೋನ’ ಆಟ

Team Udayavani, Apr 8, 2022, 10:56 AM IST

ವಿಭಿನ್ನ ಶೈಲಿಯ ಪೋಸ್ಟರ್‌ ಮೂಲಕ ಗಮನ ಸೆಳೆದಿರುವ “ತ್ರಿಕೋನ’ ಚಿತ್ರ ಇಂದು ತೆರೆಕಾಣುತ್ತಿದೆ. ಈ ಚಿತ್ರವನ್ನು ಚಂದ್ರಕಾಂತ್‌ ನಿರ್ದೇಶಿಸಿದ್ದು, ರಾಜಶೇಖರ್‌ ನಿರ್ಮಿಸಿದ್ದಾರೆ.

ಈ ಚಿತ್ರದ ಕಥಾಹಂದರದ ಬಗ್ಗೆ ಮಾತನಾಡುವ ಚಂದ್ರಕಾಂತ್‌, “ಸಿನಿಮಾದ ಟೈಟಲ್‌ ಹೇಳುವಂತೆ, “ತ್ರಿಕೋನ’ ಮೂರು ಜನರೇಶನ್‌ ದೃಷ್ಟಿಕೋನ ಇರುವಂಥ ಸಿನಿಮಾ. 65, 45, 25 ಹೀಗೆ ಮೂರು ಜನರೇಶನ್‌ ನವರ ಕಥೆ ಇದರಲ್ಲಿದೆ. ಈ ಮೂರು ಜನರೇಶನ್‌ಗೂ ಕನೆಕ್ಟ್ ಆಗುವಂಥ ತಾಳ್ಮೆ, ಅಹಂ, ಶಕ್ತಿ ಈ ಮೂರು ವಿಷಯಗಳನ್ನು ಹೇಳಿದ್ದೇವೆ. ಸಿನಿಮಾದಲ್ಲೂ ಮೂರು ತಲೆಮಾರುಗಳನ್ನು ಪ್ರತಿನಿಧಿಸುವ ಕಲಾವಿದರಿದ್ದಾರೆ. ಹಿರಿಯ ನಟಿ ಜ್ಯೂಲಿ ಲಕ್ಷ್ಮೀ, ಸುರೇಶ್‌ ಹೆಬ್ಳೀಕರ್‌, ಅಚ್ಯುತ ಕುಮಾರ್‌, ಸುಧಾರಾಣಿ, ಮಾರುತೇಶ್‌, ಹೀಗೆ ಹಿರಿಯರಿಂದ ಕಿರಿಯರವರೆಗೆ ಎಲ್ಲ ವಯೋಮಾನದ ಕಲಾವಿದರಿದ್ದಾರೆ. ಹಾಗಾಗಿ “ತ್ರಿಕೋನ’ ಎಲ್ಲ ಜನರೇಶನ್‌ ಆಡಿಯನ್ಸ್‌ಗೂ ಕನೆಕ್ಟ್ ಆಗುತ್ತದೆ’ ಎನ್ನುತ್ತಾರೆ.

ಇದನ್ನೂ ಓದಿ:ಸ್ಟಾರ್ ಸಿನಿಮಾಗಳ ಭಯವಿಲ್ಲ… ಮೇ-ಜೂನ್‌ ನಲ್ಲಿ ಹೊಸಬರದ್ದೇ ಹವಾ

“ಪೊಲೀಸ್‌ ಪ್ರಾಕಿ ಪ್ರೊಡಕ್ಷನ್ಸ್‌ ‘ ಬ್ಯಾನರ್‌ನಲ್ಲಿ ರಾಜಶೇಖರ್‌ ಕಥೆ ಬರೆದು ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಕಳೆದ ಒಂದು ತಿಂಗಳಿನಿಂದ ಭರ್ಜರಿಯಾಗಿ ಪ್ರಚಾರದಲ್ಲಿ ನಿರತವಾಗಿರುವ “ತ್ರಿಕೋನ’ ಚಿತ್ರಕ್ಕೆ ಸಿನಿಪ್ರಿಯರು ಮತ್ತು ಚಿತ್ರರಂಗದಿಂದಲೂ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುವ ನಿರೀಕ್ಷೆಯಲ್ಲಿದೆ ಚಿತ್ರತಂಡ.