ವಿಜಿ ಜಾನಿ, ದಾಸ್‌ ಬೋಣಿ; ಜೆಸ್ಸಿ  25ನೇ  ಗಿಫ್ಟ್

Team Udayavani, May 12, 2017, 11:45 AM IST

ಚಿತ್ರರಂಗದಲ್ಲಿ 25 ವರ್ಷಗಳ ಕಾಲ ಛಾಯಾಗ್ರಾಹಕರಾಗಿ ಅನುಭವ ಪಡೆದ ಪಿಕೆಎಚ್‌ ದಾಸ್‌ ಅವರು ಈಗ ನಿರ್ದೇಶಕರಾಗಿದ್ದಾರೆ. ತಮ್ಮ ಅಷ್ಟೂ ಅನುಭವವನ್ನು ಒಟ್ಟು ಸೇರಿಸಿ ಈಗ “ಜಾನಿ’ ಎಂಬ ಸಿನಿಮಾ ಮಾಡಿದ್ದಾರೆ. ಇತ್ತೀಚೆಗೆ ಈ ಸಿನಿಮಾದ ಆಡಿಯೋ ಬಿಡುಗಡೆ ನಡೆಯಿತು. 

ನಿರ್ದೇಶಕ ಪಿಕೆಎಚ್‌ ದಾಸ್‌ ಎಂದಿನಂತೆ ಜಾಸ್ತಿ ಮಾತನಾಡುವ ಗೋಜಿಗೆ ಹೋಗಲಿಲ್ಲ. ಹಾಡು ಬಿಡುಗಡೆ ಮಾಡಿ, ಕೆಲ ಹಾಡುಗಳನ್ನು ಪ್ರದರ್ಶನ ಮಾಡಲಾಯಿತು. “ನನ್ನ ಇಷ್ಟು ವರ್ಷದ ಅನುಭವದೊಂದಿಗೆ ಈ ಸಿನಿಮಾ ಮಾಡಿದ್ದೇನೆ. ಇಷ್ಟು ವರ್ಷ ಹೇಗೆ ಹರಸಿ, ಬೆಳೆಸಿದಿರೋ ಅದೇ ರೀತಿ ಈ ಸಿನಿಮಾವನ್ನೂ ಬೆಂಬಲಿಸಿ’ ಎಂದು ಕೇಳಿಕೊಂಡರು. ಚಿತ್ರದಲ್ಲಿ ನಾಯಕರಾಗಿ ನಟಿಸಿರುವ ವಿಜಯರಾಘವೇಂದ್ರ ಅವರಿಗೆ “ಜಾನಿ’ ಮೇಲೆ ಸಾಕಷ್ಟು ನಿರೀಕ್ಷೆ ಇದೆಯಂತೆ. “ದಾಸ್‌ ಅವರು ತಮ್ಮ ಇಷ್ಟು ವರ್ಷಗಳ ಅನುಭವದಲ್ಲಿ ಈ ಸಿನಿಮಾ ಮಾಡಿದ್ದಾರೆ. ಈ ತಂಡದ ಜೊತೆ ಕೆಲಸ ಮಾಡಿದ ಖುಷಿ ಇದೆ’ ಎಂದರು. 

ಚಿತ್ರದಲ್ಲಿ ನಾಯಕಿಯಾಗಿ ಮಿಲನ ನಾಗರಾಜ್‌ ನಟಿಸಿದ್ದಾರೆ. ಹಿರಿಯ ನಿರ್ದೇಶಕರೊಂದಿಗೆ ಕೆಲಸ ಮಾಡಿದ್ದು, ಮಿಲನ ನಾಗರಾಜ್‌ ಅವರಿಗೆ ಈ ಸಿನಿಮಾ ಬ್ರೇಕ್‌ ಕೊಡುವ ನಿರೀಕ್ಷೆ ಇದೆಯಂತೆ. ಚಿತ್ರಕ್ಕೆ ಜೆಸ್ಸಿಗಿಫ್ಟ್ ಸಂಗೀತ ನೀಡಿದ್ದು, ಇದು ಅವರ ಸಂಗೀತ ನಿರ್ದೇಶನದ 25ನೇ ಸಿನಿಮಾ ಎಂಬುದು ವಿಶೇಷ. “ಜಾನಿ’ ಚಿತ್ರತಂಡದಲ್ಲಿ ಹಿರಿಯ ನೃತ್ಯ ನಿರ್ದೇಶಕ ಮೂಗೂರು ಸುಂದರಂ ಕೂಡಾ ಇದ್ದಾರೆ. ಆರೋಗ್ಯ ಸಮಸ್ಯೆಯಿಂದ ಹೆಚ್ಚು ಮಾತನಾಡದ ಸುಂದರಂ, ಸಿನಿಮಾ ಸಕ್ಸಸ್‌ ಪಾರ್ಟಿಯಲ್ಲಿ ಸ್ಟೆಪ್‌ ಹಾಕುವುದಾಗಿ ಹೇಳಿದರು. ಈ ಚಿತ್ರವನ್ನು ಜೆ. ಜಾನಕಿ ರಾಮ್‌ ಹಾಗೂ ಎಂ.ಅರವಿಂದ್‌ ನಿರ್ಮಿಸಿದ್ದಾರೆ.