ಯರ್ರಾಬಿರ್ರಿ ಸಿನಿಮಾ

Team Udayavani, Feb 2, 2018, 11:03 AM IST

ದಿನದಿಂದ ದಿನಕ್ಕೆ ಚಿತ್ರ-ವಿಚಿತ್ರ ಶೀರ್ಷಿಕೆಯ ಸಿನಿಮಾಗಳು ಹೆಚ್ಚಾಗುತ್ತಿವೆ. ಸಿನಿಮಾದ ಶೀರ್ಷಿಕೆ ವಿಭಿನ್ನವಾಗಿರಬೇಕೆಂಬ ಕಾರಣಕ್ಕೆ ಏನೇನೋ ಹೆಸರುಗಳನ್ನಿಟ್ಟುಕೊಂಡು ಸಿನಿಮಾ ಮಾಡುತ್ತಿದ್ದಾರೆ. ಈಗ ಅದೇ ರೀತಿ ಟೈಟಲ್‌ ಇರುವ ಸಿನಿಮಾವೊಂದು ಸೆಟ್ಟೇರಿದೆ. ಅದು “ಯರ್ರಾಬಿರ್ರಿ’. ಇತ್ತೀಚೆಗೆ ಈ ಚಿತ್ರದ ಮುಹೂರ್ತ ಕಂಠೀರವ ಸ್ಟುಡಿಯೋದಲ್ಲಿ ನಡೆಯಿತು. ಗೋವಿಂದ ದಾಸರ್‌ ಈ ಚಿತ್ರದ ನಿರ್ದೇಶಕರು. ಚಿತ್ರದಲ್ಲಿ ಅಂಜನ್‌ ನಾಯಕರಾಗಿ ನಟಿಸುತ್ತಿದ್ದು, ಅರ್ಚನಾ ಹಾಗೂ ಸೋನು ಪಾಟೀಲ್‌ ಈ ಸಿನಿಮಾದ ನಾಯಕಿಯರು. ಎಲ್ಲಾ ಓಕೆ, “ಯರ್ರಾಬಿರ್ರಿ’ಯಲ್ಲಿ ನಿರ್ದೇಶಕರು ಏನು ಹೇಳಲು ಹೊರಟಿದ್ದಾರೆಂದರೆ ಆ್ಯಕ್ಷನ್‌ ಕಂ ಲವ್‌ ಎಂಬ ಉತ್ತರ ಬರುತ್ತದೆ. 

ಚಿತ್ರದಲ್ಲಿ ನಾಯಕ ಪ್ರೀತಿ ಹಾಗೂ ತನ್ನ ಕುಟುಂಬಕ್ಕಾಗಿ ತೊಂದರೆಯಾದರೆ ಯಾವ ರಿಸ್ಕ್ ಅನ್ನು ಬೇಕಾದರೂ ಎದುರಿಸಲು ಸಿದ್ಧನಾಗಿರುತ್ತಾನಂತೆ. ಈ ರೀತಿಯ ಸಾಗುವ ಕಥೆಯಲ್ಲಿ ಮುಂದಿನದ್ದನ್ನು ನೀವು ಸುಲಭವಾಗಿ ಊಹಿಸಿಕೊಳ್ಳಬಹುದು. ನಾಯಕ ಅಂಜನ್‌ಗೆ ಈಗಾಗಲೇ ಅಭಿಮಾನಿ ಬಳಗ, ಫೇಸ್‌ಬುಕ್‌ನಲ್ಲಿ ಫಾಲೋವರ್ಸ್‌ ಜೊತೆಗೆ ರೂರಲ್‌ ಸ್ಟಾರ್‌ ಎಂಬ ಬಿರುದು ಕೂಡಾ ಇದೆಯಂತೆ. ಇವೆಲ್ಲವೂ ಮುಂದೆ ಸಿನಿಮಾ ಬಿಡುಗಡೆಯಾಗುವಾಗ ಸಹಾಯಕ್ಕೆ ಬರುತ್ತದೆ ಎಂಬ ವಿಶ್ವಾಸ ಅವರಿಗಿದೆ. ಚಿತ್ರದಲ್ಲಿ ಅರ್ಚನಾ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಈಗಾಗಲೇ ತಮಿಳು ಹಾಗೂ ತೆಲುಗಿನಲ್ಲಿ ನಟಿಸಿರುವ ಅರ್ಚನಾ ಅವರಿಗೆ ಬೋಲ್ಡ್‌ ಪಾತ್ರ ಸಿಕ್ಕಿದೆಯಂತೆ. ಮತ್ತೂಬ್ಬ ನಾಯಕಿ ಸೋನು ಪಾಟೀಲ್‌ಗೆ ಹೆಚ್ಚು ಹೋಮ್ಲಿ ಪಾತ್ರ ಸಿಕ್ಕಿದೆಯಂತೆ. ಚಿತ್ರದಲ್ಲಿ ವರ್ಧನ್‌ ಕೂಡಾ ನಟಿಸುತ್ತಿದ್ದಾರೆ. ಚಿತ್ರವನ್ನು ಹೆಚ್‌.ಜಿ. ದಾಸ್‌ ನಿರ್ಮಿಸಿದ್ದಾರೆ.

ಚಿತ್ರದಲ್ಲಿ ಸಂತೋಷ್‌ ರೆಡ್ಡಿ, ವಿ. ಶರಣು, ಎಸ್‌.ಕೆ. ಉಪ್ಪಾರ  ನಟಿಸುತ್ತಿದ್ದಾರೆ.  ಧಾರವಾಡ, ದಾಂಡೇಲಿ, ಬಾಗಲಕೋಟೆ, ಮಡಕೇರಿ, ಮೈಸೂರು  ತಟಗಳಲ್ಲಿ  ಚಿತ್ರೀಕರಣ ನಡೆಸಲಾಗುವುದು.  ಹಾಡುಗಳಿಗೆ ಶಿವು ಭೈರಗಿ ರಾಗ ಸಂಯೋಜಿಸುತ್ತಿದ್ದಾರೆ. ಚಿತ್ರಕ್ಕೆ ಪೂರ್ಣಚಂದ್ರ ಬೈಕಾಡಿ ಛಾಯಗ್ರಹಣ, ಪವರ್‌ ಪುಷ್ಪರಾಜು ಸಾಹಸ,  ಸಂದೀಪ್‌.ಎಂ.ನಾಗೂರು ನ್ರತ್ಯವಿದೆ.