ಶ್ರೀಲೀಲಾ ಕಿಸ್‌ ಕಿಸ್‌

Team Udayavani, Oct 13, 2019, 4:15 AM IST

ಇತ್ತೀಚೆಗಷ್ಟೆ ಎ. ಪಿ. ಅರ್ಜುನ್‌ ನಿರ್ದೇಶನದಲ್ಲಿ ಕಿಸ್‌ ಚಿತ್ರ ತೆರೆಗೆ ಬಂದಿದ್ದು ನಿಮಗೆ ಗೊತ್ತಿರಬಹುದು. ಕಿಸ್‌ ಚಿತ್ರದ ಮೂಲಕ ವಿರಾಟ್‌ ಎಂಬ ಹೊಸ ಹೀರೋ ಮತ್ತು ಶ್ರೀಲೀಲಾ ಎಂಬ ಹೊಸ ಹೀರೋಯಿನ್‌ ಬೆಳ್ಳಿತೆರೆಗೆ ಪರಿಚಯವಾಗಿದ್ದಾರೆ. ದಸರಾ ಹಬ್ಬದ ವೇಳೆಗೆ ತೆರೆಗೆ ಬಂದ ಕಿಸ್‌ ಚಿತ್ರಕ್ಕೆ ವಿಮರ್ಶಕರು ಮತ್ತು ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾದರೂ, ಯುವ ಪ್ರೇಕ್ಷಕರು ಕೊಂಚ ಹೆಚ್ಚಾಗಿಯೇ ಕಿಸ್‌ ಚಿತ್ರವನ್ನು ಇಷ್ಟಪಡುತ್ತಿದ್ದಾರೆ. ಅದಕ್ಕೆ ಕಾರಣ ಚಿತ್ರದ ಹೊಸ ಹೀರೋಯಿನ್‌ ಶ್ರೀಲೀಲಾ!

ಹೌದು, ಕಿಸ್‌ ಚಿತ್ರದ ಮೂಲಕ ನಾಯಕ ನಟಿಯಾಗಿ ಸ್ಯಾಂಡಲ್‌ವುಡ್‌ಗೆ ಕಾಲಿಟ್ಟಿರುವ ಶ್ರೀಲೀಲಾ ತಮ್ಮ ಮೊದಲ ಚಿತ್ರದಲ್ಲೇ ಸಿನಿಪ್ರಿಯರ ಮನಗೆಲ್ಲುವಲ್ಲಿ ಯಶಸ್ವಿಯಾಗಿದ್ದಾರೆ. ಚಿತ್ರದಲ್ಲಿ ಶ್ರೀಲೀಲಾ ಅಭಿನಯ, ಡ್ಯಾನ್ಸ್‌, ಗ್ಲಾಮರ್‌ ಎಲ್ಲದಕ್ಕೂ ಯುವ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಇನ್ನು ಚಿತ್ರರಂಗ ಕೂಡ ಶ್ರೀಲೀಲಾಗೆ ಚಿತ್ರರಂಗದಲ್ಲಿ ಒಳ್ಳೆಯ ಭವಿಷ್ಯವಿದೆ ಎನ್ನುವ ಭರವಸೆಯ ಮಾತುಗಳನ್ನಾಡುತ್ತಿದೆ. ಇದರ ನಡುವೆಯೇ ಶ್ರೀಲೀಲಾ ಅಭಿನಯದ ಎರಡನೇ ಚಿತ್ರ ಭರಾಟೆ ಕೂಡ ರಿಲೀಸ್‌ಗೆ ರೆಡಿಯಾಗುತ್ತಿದೆ.

ಸದ್ಯ ಭರಾಟೆ ಚಿತ್ರದ ಪ್ರಮೋಶನ್‌ ಕಾರ್ಯಗಳು ಭರದಿಂದ ನಡೆಯುತ್ತಿದ್ದು, ಇದೇ ತಿಂಗಳ ಕೊನೆಗೆ ಭರಾಟೆ ಅದ್ದೂರಿಯಾಗಿ ತೆರೆಗೆ ಬರುವ ಪ್ಲಾನ್‌ ಮಾಡಿಕೊಳ್ಳುತ್ತಿದೆ. ಈ ಚಿತ್ರದಲ್ಲಿ ನಟ ರೋರಿಂಗ್‌ ಸ್ಟಾರ್‌ ಶ್ರೀಮುರಳಿ ಅವರಿಗೆ ನಾಯಕಿಯಾಗಿ ಕಾಣಿಸಿಕೊಂಡಿರುವ ಶ್ರೀಲೀಲಾ ಸಖತ್‌ ಗ್ಲಾಮರಸ್‌ ಆಗಿ ಮಿಂಚಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಭರಾಟೆ ಚಿತ್ರದ ಫ‌ಸ್‌ rಲುಕ್‌ ಪೋಸ್ಟರ್‌, ಹಾಡುಗಳು, ಟೀಸರ್‌ ಮತ್ತು ಟ್ರೇಲರ್‌ಗಳಿಗೆ ಸಿನಿಪ್ರಿಯರಿಂದ ಬಿಗ್‌ ರೆಸ್ಪಾನ್ಸ್‌ ಸಿಕ್ಕಿರುವುದರಿಂದ ಭರಾಟೆ ಚಿತ್ರದ ಮೇಲೆ ನಾಯಕಿ ಶ್ರೀಲೀಲಾಗೂ ಸಾಕಷ್ಟು ಭರವಸೆಯಿದೆ. ಒಟ್ಟಾರೆ ಹೊಸ ನಾಯಕ ನಟಿಯರಿಗೆ ಒಂದು ಚಿತ್ರದಲ್ಲಿ ಅವಕಾಶ ಸಿಗುವುದುದೇ ಕಷ್ಟ ಎನ್ನುವಾಗ, ಶ್ರೀಲೀಲಾ ಅಭಿನಯಿಸಿರುವ ಎರಡು ದೊಡ್ಡ ಚಿತ್ರಗಳು ಕೆಲವೇ ದಿನಗಳ ಅಂತರದಲ್ಲಿ ಬಿಡುಗಡೆಯಾಗಿ ತೆರೆಗೆ ಬರುತ್ತಿರುವುದು ದೊಡ್ಡ ವಿಷಯವೆ ಸರಿ.

ಮತ್ತೂಂದೆಡೆ ಕಿಸ್‌ ಚಿತ್ರ ಉತ್ತಮ ಪ್ರದರ್ಶನ ಕಾಣುತ್ತಿರುವಂತೆಯೇ, ಕಿಸ್‌ ಚಿತ್ರದ ಸೀಕ್ವೆಲ್‌ಗೆ ತಯಾರಿ ನಡೆಯುತ್ತಿದೆ ಎನ್ನುವ ಮಾತುಗಳು ಗಾಂಧಿನಗರದಲ್ಲಿ ಕೇಳಿ ಬರುತ್ತಿವೆ. ಮೊದಲ ಭಾಗಕ್ಕೆ ಸಿಕ್ಕ ಉತ್ತಮ ಪ್ರತಿಕ್ರಿಯೆ ಸಿಕ್ಕ ಹಿನ್ನಲೆಯಲ್ಲಿ ನಿರ್ದೇಶಕರು ಪಾರ್ಟ್‌-2 ಮಾಡುವ ಪ್ಲಾನ್‌ ಮಾಡಿಕೊಳ್ಳುತ್ತಿದ್ದು, ಇಲ್ಲೂ ಶ್ರೀಲೀಲಾ ತೆರೆಮೇಲೆ ಮತ್ತೆ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗುತ್ತಿದೆ. ಒಟ್ಟಾರೆ, ಬಿಗ್‌ ಸ್ಕ್ರೀನ್‌ ಮೇಲೆ ಶ್ರೀಲೀಲಾ ಕೊಟ್ಟ ಮೊದಲ ಕಿಸ್‌ ಅನೇಕರ ನಿದ್ದೆ ಕೆಡಿಸಿರುವುದಂತೂ ಸುಳ್ಳಲ್ಲ.