ವಿಶ್ವ ಪುಸ್ತಕ ದಿನಾಚರಣೆ

Team Udayavani, Apr 29, 2018, 9:57 AM IST

ಮಹಾನಗರ: ಸಾಂಪ್ರದಾಯಿಕ ಶಿಕ್ಷಣ ವ್ಯವಸ್ಥೆಯಲ್ಲಿ ಅಸಂಖ್ಯಾಕ ಪದವೀಧರರನ್ನು ಸೃಷ್ಟಿಸಬಹುದು. ಆದರೆ ಅದರಿಂದ ಅಗತ್ಯವಾದ ಜೀವನ ಕೌಶಲ ಸಿದ್ಧಿಸುವುದೆಂದು ಹೇಳಲಾಗದು. ನಮ್ಮ ಅರಿವಿನ ವಿಸ್ತರಣೆಗೆ ಬೇರೆ ಬೇರೆ ವಿಷಯಗಳ ಓದು ಅತ್ಯವಶ್ಯ. ಅದಕ್ಕಾಗಿ ಪುಸ್ತಕ ಪ್ರೀತಿ ಬೆಳೆಸಿಕೊಳ್ಳಬೇಕು. ಇದರಿಂದ ಜ್ಞಾನ ವೃದ್ಧಿ ಸಾಧ್ಯ ಎಂದು ಲೇಖಕ ಮತ್ತು ಪ್ರಾಧ್ಯಾಪಕ ಪ್ರೊ| ಭಾಸ್ಕರ ರೈ ಕುಕ್ಕುವಳ್ಳಿ ತಿಳಿಸಿದರು.

ರಾಜ್ಯ ಸರಕಾರದ ಕನ್ನಡ ಪುಸ್ತಕ ಪ್ರಾಧಿಕಾರ ಹಾಗೂ ಸಿರಿಗನ್ನಡ ಪುಸ್ತಕ ಮಾರಾಟ ಮಳಿಗೆ ಮಂಗಳೂರು ಇವುಗಳ ಆಶ್ರಯದಲ್ಲಿ ನಗರದ ಅಲ್‌- ರಹಬಾ ಪ್ಲಾಜಾ ಕಟ್ಟಡದಲ್ಲಿ ಇತ್ತೀಚೆಗೆ ನಡೆದ ವಿಶ್ವ ಪುಸ್ತಕ ದಿನಾಚರಣೆ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದ ಅವರು, ಯಾವುದೇ ಪ್ರಕಾರದ ಸಾಹಿತ್ಯ ಕೃತಿಗಳನ್ನು ಕೊಂಡು ಓದುವ ಪ್ರವೃತ್ತಿ ರೂಢಿಯಾದರೆ ಪುಸ್ತಕ ಪ್ರಪಂಚ ಹಿಗ್ಗುತ್ತದೆ. ಇದರೊಂದಿಗೆ ಮನೆ ಮನೆಗಳಲ್ಲಿ ಗ್ರಂಥ ಭಂಡಾರ ತೆರೆಯುವ ಮೂಲಕ ಎಳೆಯರಲ್ಲಿ ಓದುವ ಹವ್ಯಾಸವನ್ನು ಬೆಳೆಸಬಹುದು ಎಂದು ನುಡಿದರು.

ಜನಪ್ರಿಯಗೊಳಿಸಬೇಕು
ಅಧ್ಯಕ್ಷತೆ ವಹಿಸಿದ್ದ ಕನ್ನಡ ಸಾಹಿತ್ಯ ಪರಿಷತ್‌ನ ಮಾಜಿ ರಾಜ್ಯಾಧ್ಯಕ್ಷ ಹರಿಕೃಷ್ಣ ಪುನರೂರು ಮಾತನಾಡಿ, ಇಂದಿನ
ಮಾಹಿತಿ ತಂತ್ರಜ್ಞಾನ ಯುಗದಲ್ಲಿ ಪುಸ್ತಕಗಳ ಬಳಕೆಯನ್ನು ಇನ್ನಷ್ಟೂ ಜನಪ್ರಿಯಗೊಳಿಸುವ ಕಾರ್ಯಕ್ರಮಗಳು ನಡೆಯಬೇಕು ಎಂದರು.

ಕಾರ್ಯಕ್ರಮದ ಅಂಗವಾಗಿ ಮೀನುಗಾರಿಕಾ ಮಹಾವಿದ್ಯಾಲಯದ ಪ್ರಾಧ್ಯಾಪಕ ಡಾ| ಶಿವಪ್ರಕಾಶ್‌ ಅವರು ಹಾಸ್ಯ ಕವಿಗೋಷ್ಠಿಯನ್ನು ನಡೆಸಿಕೊಟ್ಟರು. ಸಿರಿಗನ್ನಡ ಮಾರಾಟ ಮಳಿಗೆಯ ಮಾರ್ಸೆಲ್‌ ಎಂ. ಡಿ’ಸೋಜಾ ಸ್ವಾಗತಿಸಿ, ಮಹೇಶ್‌ ಆರ್‌. ನಾಯಕ್‌ ನಿರೂಪಿಸಿ, ವಂದಿಸಿದರು.