ಮುಖ ಮೊಸರಾದರೆ ಸೌಂದರ್ಯ

Team Udayavani, Jan 29, 2020, 4:42 AM IST

ಮೊಸರು, ದೇಹದ ಆರೋಗ್ಯಕ್ಕೆ ಮಾತ್ರವಲ್ಲದೇ ತ್ವಚೆಯ ಸೌಂದರ್ಯ ವೃದ್ಧಿಸಲು ಕೂಡ ಸಹಕಾರಿ. ಇದು, ನೈಸರ್ಗಿಕ ಮಾಯಿಶ್ಚರೈಸರ್‌ನಂತೆ ಕೆಲಸ ಮಾಡುತ್ತದೆ. ರಾತ್ರಿ ಮಲಗುವ ಮುನ್ನ ಮೊಸರನ್ನು ಮುಖಕ್ಕೆ ಹಚ್ಚಿದರೆ ಚರ್ಮ ಒಡೆಯುವುದಿಲ್ಲ. ಅಂತೆಯೇ ಮೊಸರನ್ನು ಬಳಸಿ ಫೇಸ್‌ಪ್ಯಾಕ್‌ ಕೂಡಾ ತಯಾರಿಸಬಹುದು.

1. ಮೊಸರು- ಓಟ್ಸ್‌:
ಎರಡು ಚಮಚ ಮೊಸರಿಗೆ 1 ಚಮಚ ಓಟ್ಸ್‌ ಬೆರೆಸಿ, ಫೇಸ್‌ಪ್ಯಾಕ್‌ ಹಾಕಿಕೊಳ್ಳಿ. 20 ನಿಮಿಷಗಳ ನಂತರ ತೊಳೆದರೆ ಮುಖದಲ್ಲಿನ ಸುಕ್ಕು, ನೆರಿಗೆಗಳು ನಿವಾರಣೆಯಾಗುತ್ತವೆ. ಮೊಸರಿನಲ್ಲಿರುವ ಲ್ಯಾಕ್ಟಿಕ್‌ ಆಸಿಡ್‌ನಿಂದಾಗಿ, ತ್ವಚೆಯ ಕಲ್ಮಷ ದೂರಾಗುತ್ತದೆ.

2. ಮೊಸರು-ಲಿಂಬೆ
ಮೂರು ಚಮಚ ಮೊಸರಿಗೆ 1 ಚಮಚ ಲಿಂಬೆರಸ ಬೆರೆಸಿ ಮುಖಕ್ಕೆ ಹಚ್ಚಿ, 15 ನಿಮಿಷಗಳ ನಂತರ ತೊಳೆಯಿರಿ. ಇದು ತ್ವಚೆಯಲ್ಲಿನ ಕಲೆ, ಮೊಡವೆಗಳನ್ನು ನಿವಾರಿಸುತ್ತದೆ.

3. ಮೊಸರು- ಕಡಲೇಹಿಟ್ಟು
ಮೊಸರು, ಕಡಲೇಹಿಟ್ಟು ಮತ್ತು ಚಿಟಿಕೆ ಅರಿಶಿಣವನ್ನು, 1 ಚಮಚ ರೋಸ್‌ವಾಟರ್‌ನಲ್ಲಿ ಬೆರೆಸಿ ಗಟ್ಟಿಯಾಗಿ ಪೇಸ್ಟ್‌ನಂತೆ ಕಲಸಿ. ಇದನ್ನು ಮುಖ, ಕುತ್ತಿಗೆಗೆ ಹಚ್ಚಿ 15 ನಿಮಿಷಗಳ ನಂತರ ತೊಳೆಯಿರಿ. ವಾರಕ್ಕೊಮ್ಮೆ ಹೀಗೆ ಮಾಡುವುದರಿಂದ ತ್ವಚೆಯ ಕಾಂತಿ ಹೆಚ್ಚುತ್ತದೆ.

4. ಮೊಸರು- ಮುಲ್ತಾನಿ ಮಿಟ್ಟಿ
ಎರಡು ಚಮಚ ಮುಲ್ತಾನಿ ಮಿಟ್ಟಿಗೆ, ಮೂರು ಚಮಚ ಮೊಸರನ್ನು ಹಾಕಿ ಕಲಸಿ ಮುಖಕ್ಕೆ ಹಚ್ಚಿ 20 ನಿಮಿಷಗಳ ನಂತರ ಬೆಚ್ಚಗಿನ ನೀರಲ್ಲಿ ತೊಳೆಯಿರಿ. ಇದು, ಬಿಸಿಲಿನಿಂದ ಸುಟ್ಟ ಕಲೆ, ಮೊಡವೆ ಕಲೆಯನ್ನು ಹೋಗಲಾಡಿಸುತ್ತದೆ.

-ಶ್ರುತಿ ಕೆ.ಎಸ್‌.