ಪಿಗ್ಗಿಯ ಕುಗ್ಗದ ಬೇಡಿಕೆ

Team Udayavani, Feb 15, 2019, 12:30 AM IST

ಬಾಲಿವುಡ್‌ನ‌ಲ್ಲಿ ಮದುವೆಯಾದ ಬಳಿಕವೂ ಬೇಡಿಕೆಯನ್ನು ಉಳಿಸಿಕೊಂಡ ನಟಿಯರ ಸಂಖ್ಯೆ ತೀರಾ ವಿರಳ. ಈಗ ಈ ವಿರಳ ನಟಿಯರ ಸಾಲಿಗೆ ಇತ್ತೀಚೆಗೆ ಹಸೆಮಣೆ ಏರಿರುವ ನಟಿ ಪ್ರಿಯಾಂಕಾ ಚೋಪ್ರಾ ಹೆಸರೂ ಸೇರ್ಪಡೆಯಾಗುವುದು ಬಹುತೇಕ ಖಚಿತ ಎನ್ನುತ್ತಿದ್ದಾರೆ ಬಾಲಿವುಡ್‌ ಮಂದಿ. ಹೌದು, ಮದುವೆಯ ಬಳಿಕ ನಿಕ್‌ ಜೋನ್ಸ್‌ ಜೊತೆ  ರೊಮ್ಯಾಂಟಿಕ್‌ ಸಮಯವನ್ನು ಕಳೆಯುತ್ತಿರುವ ಪ್ರಿಯಾಂಕಾ ಮತ್ತೆ ತಮ್ಮ ಸಿನೆಮಾ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳುವ ಸುಳಿವನ್ನು ನೀಡಿದ್ದಾರೆ. ಇತ್ತೀಚೆಗೆ ತಮ್ಮ ಮುಂಬರುವ ಈಸ್‌ ನಾಟ್‌ ಇಟ್‌ ರೊಮ್ಯಾಂಟಿಕ್‌ ಸಿನಿಮಾದ ಪ್ರಚಾರ ಕಾರ್ಯಕ್ರಮದಲ್ಲಿ ಪ್ರಿಯಾಂಕಾ ಮತ್ತು ನಿಕ್‌ ಒಟ್ಟಿಗೇ ಭಾಗಿಯಾಗಲಿದ್ದಾರೆ. ಇದೇ ವರ್ಷದ ಮಧ್ಯಭಾಗದಲ್ಲಿ ಚಿತ್ರ ತೆರೆಗೆ ಬರುವ ಸಾಧ್ಯತೆ ಇದೆ. ಜೊತೆಗೆ ಪ್ರಿಯಾಂಕಾ ಅವರನ್ನು ಮುಖ್ಯ ಭೂಮಿಕೆಯಲ್ಲಿರಿಸಿಕೊಂಡು ಮೇರಿಕೋಮ್‌ನಂತಹ ಕೆಲವು ಮಹಿಳಾ ಪ್ರಧಾನ ಚಿತ್ರಗಳನ್ನು ತೆರೆಗೆ ತರಲು ಹಲವು ನಿರ್ಮಾಪಕರು, ನಿರ್ದೇಶಕರು ಆಸಕ್ತರಾಗಿದ್ದು, ಈ ಬಗ್ಗೆ ಪ್ರಿಯಾಂಕಾ ಬಳಿ ಕೆಲವರು ಮಾತುಕತೆಯನ್ನೂ ನಡೆಸಿದ್ದಾರೆ. 

ಈ ಬಗ್ಗೆ ಮಾತನಾಡುವ ಪ್ರಿಯಾಂಕಾ, “”ನನಗೂ ಮಹಿಳಾ ಪ್ರಧಾನ ಮತ್ತು ಬಯೋಪಿಕ್‌ ಚಿತ್ರಗಳಲ್ಲಿ ನಟಿಸಲು ಸಾಕಷ್ಟು ಆಸಕ್ತಿ ಇದೆ. ಆದರೆ ಅಂತಹ ಚಿತ್ರಗಳು, ಪಾತ್ರಗಳು ಸಾಕಷ್ಟು ಸಮಯ ಮತ್ತು ತಯಾರಿಯನ್ನು ಬಯಸುತ್ತವೆ. ಹಾಗಾಗಿ ಅಂತಹ ಚಿತ್ರಗಳಿಗೆ ಸಾಕಷ್ಟು ಸಮಯ ತೆಗೆದಿರಿಸಬೇಕಾಗುತ್ತದೆ. ಸದ್ಯಕ್ಕೆ ನನಗೆ ಇಷ್ಟವಾಗುವಂತಹ ಕೆಲವು ಚಿತ್ರಗಳ ಆಫ‌ರ್ ಇದ್ದರೂ, ಈಗಲೇ ಅದರ ಬಗ್ಗೆ ಏನೂ ನಿರ್ಧರಿಸಿಲ್ಲ. ಕೆಲವು ಸಬ್ಜೆಕ್ಟ್ ಗಳ ಬಗ್ಗೆ ಚರ್ಚೆಗಳು ನಡೆಯುತ್ತಿದ್ದು, ನನ್ನ ಮುಂದಿನ ಚಿತ್ರ ಯಾವುದಾಗಬಹುದು ಎನ್ನುವ ಬಗ್ಗೆ ನನಗೂ ಕುತೂಹಲವಿದೆ” ಎನ್ನುತ್ತಾರೆ. 

ಇವೆಲ್ಲದರ ನಡುವೆ ಜಗದ್ವಿಖ್ಯಾತ ನ್ಯೂಯಾರ್ಕ್‌ನ ಪ್ರತಿಷ್ಠಿತ ಮೇಡಮ್‌ ಟುಸ್ಸಾಡ್ಸ್‌ ಮ್ಯೂಸಿಯಂನಲ್ಲಿ ಇತ್ತೀಚೆಗೆ ಪ್ರಿಯಾಂಕಾ ಚೋಪ್ರಾ ಮೇಣದ ಪ್ರತಿಮೆ ಅನಾವರಣಗೊಂಡಿದೆ. 2016ರಲ್ಲಿ ಎಮಿ ಅವಾರ್ಡ್ಸ್‌ನಲ್ಲಿ ಕೆಂಪು ಕಲರ್‌ ಗೌನ್‌ನಲ್ಲಿ ನೋಡುಗರನ್ನು ಸೆಳೆದಿದ್ದ ಪ್ರಿಯಾಂಕಾ ಅವರ ಮೇಣದ ಪ್ರತಿಕೃತಿ ಇದೀಗ ಎಲ್ಲರ ಗಮನ ಸೆಳೆಯುತ್ತಿದ್ದು, ತಮ್ಮ ಮೇಣದ ಪ್ರತಿಮೆ ನೋಡಿದಾಕ್ಷಣ ಪ್ರಿಯಾಂಕಾ ಚೋಪ್ರಾ ಕೂಡ ಅಚ್ಚರಿಗೊಂಡು, ಮೇಣದ ಪ್ರತಿಮೆ ಬಳಿ ಥೇಟ್‌ ಅದೇ ರೀತಿ ಪೋಸ್‌ ಕೊಟ್ಟು ಪಿಗ್ಗಿ ಫೋಟೋ ಕ್ಲಿಕ್ಕಿಸಿಕೊಂಡಿದ್ದಾರೆ. ಈ ಮೂಲಕ ಟುಸಾಡ್ಸ್‌ನಲ್ಲಿರುವ ಜಗತ್ತಿನ ಜನಪ್ರಿಯ ವ್ಯಕ್ತಿಗಳ ಮೇಣದ ಪ್ರತಿಮೆಯ ಸಾಲಿಗೆ ಇದೀಗ ಪ್ರಿಯಾಂಕಾ ಪ್ರತಿಮೆಯೂ ಸೇರ್ಪಡೆ ಗೊಂಡಂತಾಗಿದೆ.