ಐಶ್ವರ್ಯಾ ಖಳನಾಯಕಿ ಹೈ

Team Udayavani, Apr 26, 2019, 5:50 AM IST

ಬಾಲಿವುಡ್‌ ಅಂಗಳದಲ್ಲಿ ದಕ್ಷಿಣ ಕನ್ನಡದ ಚೆಲುವೆ ಐಶ್ವರ್ಯಾ ರೈ ಅವರದ್ದು ಬಹು ದೊಡ್ಡ ಹೆಸರು. ತನ್ನ ಸೌಂದರ್ಯ ಮತ್ತು ಅಭಿನಯದ ಮೂಲಕ ಅಸಂಖ್ಯಾತ ಸಿನಿಪ್ರಿಯರ ಅಚ್ಚುಮೆಚ್ಚಿನ ನಾಯಕಿ ಐಶ್ವರ್ಯಾ ರೈಗೆ ಮದುವೆಯಾಗಿ, ಒಂದು ಮಗುವಾದರೂ, ಇಂದಿಗೂ ಬೇಡಿಕೆ ಮಾತ್ರ ಒಂದು ಚೂರೂ ಕಡಿಮೆಯಾಗಲಿಲ್ಲ. ಇನ್ನು ತಮಿಳು, ತೆಲುಗು ಸೇರಿದಂತೆ ದಕ್ಷಿಣಭಾರತದ ಸಿನಿ ದುನಿಯಾದಲ್ಲಿ ತನ್ನದೇ ಆದ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಹೊಂದಿರುವ ಮತ್ತೂಬ್ಬ ಚೆಲುವೆ ಅನುಷ್ಕಾ ಶೆಟ್ಟಿ. ತಮಿಳು ಮತ್ತು ತೆಲುಗಿನಲ್ಲಿ ಯಾವ ಸ್ಟಾರ್‌ ನಟರಿಗೂ ಕಡಿಮೆಯಿಲ್ಲದೆ, ಚಿತ್ರಗಳನ್ನು ಮಾಡುವ, ಅದರಲ್ಲೂ ಮಹಿಳಾ ಪ್ರಧಾನ ಚಿತ್ರಗಳಲ್ಲಿ ಸೈ ಎನಿಸಿಕೊಂಡಿರುವ ಅನುಷ್ಕಾ ಶೆಟ್ಟಿ ಅಂದ್ರೆ ಅದೆಷ್ಟೋ ನಿರ್ಮಾಪಕರು, ನಿರ್ದೇಶಕರಿಗೆ ಹಾಟ್‌ ಫೇವರೆಟ್‌ ಹೀರೋಯಿನ್‌. ಈ ಇಬ್ಬರೂ ಜನಪ್ರಿಯ ನಾಯಕ ನಟಿಯರು ಸೇರಿ ಒಂದು ಸಿನಿಮಾ ಮಾಡಿದ್ರೆ ಹೇಗಿರುತ್ತದೆ? ಇಂಥಾದ್ದೊಂದು ಪ್ರಶ್ನೆಗೆ ಈಗ ಉತ್ತರ ಸಿಕ್ಕು ಸಾಕಾರವಾಗುವ ಸಮಯ ಬಂದಿದೆ.

ಹೌದು, ಬಾಲಿವುಡ್‌ ಚೆಲುವೆ ಐಶ್ವರ್ಯಾ ರೈ ಮತ್ತು ಸೌತ್‌ ಸುಂದರಿ ಅನುಷ್ಕಾ ಶೆಟ್ಟಿ ಒಂದೇ ಚಿತ್ರದಲ್ಲಿ ಅಭಿನಯಿಸಲಿದ್ದಾರೆ ಎಂಬ ಸುದ್ದಿ ಹೊರಬಿದ್ದಿದೆ. ಅಂದ ಹಾಗೆ, ಈ ಬಹುನಿರೀಕ್ಷಿತ ಚಿತ್ರಕ್ಕೆ ಪೊನ್ನಿಯನ್‌ ಸೆಲ್ವಾನ್‌ ಎಂದು ಹೆಸರಿಡಲಾಗಿದ್ದು, ಚಿತ್ರಕ್ಕೆ ಭಾರತೀಯ ಚಿತ್ರರಂಗದ ಸಿನಿ ಮಾಂತ್ರಿಕ, ನಿರ್ದೇಶಕ ಮಣಿರತ್ನಂ ನಿರ್ದೇಶನ ಮಾಡುತ್ತಿದ್ದಾರೆ. ಇದೇ ಮೊದಲ ಬಾರಿಗೆ ಕರ್ನಾಟಕದ ಕರಾವಳಿಯ ಚೆಲುವೆಯರಾದ ಐಶ್ವರ್ಯಾ ರೈ ಮತ್ತು ಅನುಷ್ಕಾ ಶೆಟ್ಟಿ ಇಬ್ಬರು ಒಂದೇ ಚಿತ್ರದಲ್ಲಿ ಒಟ್ಟಾಗಿ ಕಾಣಿಸಿಕೊಳ್ಳುತ್ತಿದ್ದು, ಅದ್ದೂರಿ ಮೇಕಿಂಗ್‌, ಬೃಹತ್‌ ತಾರಾಗಣವಿರುವ ಚಿತ್ರದ ಬಗ್ಗೆ ಸಾಕಷ್ಟು ಕುತೂಹಲ ಮನೆ ಮಾಡಿದೆ.

ಅಂದ ಹಾಗೆ, ಈ ಚಿತ್ರಕ್ಕೆ ಐಶ್ವರ್ಯಾ ರೈ ಅವರನ್ನು ಸಾಕಷ್ಟು ಮೊದಲೇ ಆಯ್ಕೆ ಮಾಡಲಾಗಿತ್ತು. ಚಿತ್ರದ ಮತ್ತೂಂದು ಪಾತ್ರಕ್ಕೆ ನಟಿ ನಯನತಾರಾ ಆಯ್ಕೆಯಾಗಿದ್ದರು. ಆದರೆ, ಕಾರಣಾಂತರಗಳಿಂದ ನಯನತಾರಾ ಚಿತ್ರದಿಂದ ಹೊರನಡೆದಿದ್ದರಿಂದ, ಅಂತಿಮವಾಗಿ ಚಿತ್ರತಂಡ, ನಯನತಾರಾ ಅವರ ಜಾಗಕ್ಕೆ ಅನುಷ್ಕಾ ಶೆಟ್ಟಿ ಅವರನ್ನು ಕರೆತಂದಿದೆ. ಸದ್ಯಕ್ಕೆ ಅನುಷ್ಕಾ ಸೈಲೆನ್ಸ್‌ ಸಿನಿಮಾದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಆ ಸಿನಿಮಾ ಮುಗಿದ ಬಳಿಕ ಪೊನ್ನಿಯನ್‌ ಸೆಲ್ವಾನ್‌ ಚಿತ್ರತಂಡ ಸೇರಿಕೊಳ್ಳುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಇನ್ನು ಈ ಸಿನಿಮಾದಲ್ಲಿ ಐಶ್ವರ್ಯಾ ಖಳನಾಯಕಿಯ ಪಾತ್ರದಲ್ಲಿ ನಟಿಸುತ್ತಾರೆ ಎಂದು ಹೇಳಲಾಗುತ್ತಿದೆ. ಒಂದು ವೇಳೆ ಐಶ್ವರ್ಯಾ ಈ ಚಿತ್ರದಲ್ಲಿ ನೆಗೆಟಿವ್‌ ಪಾತ್ರ ಮಾಡಿದರೆ, ಇದು ಅವರ ಸಿನಿಮಾ ಕೆರಿಯರ್‌ನಲ್ಲಿ ಖಳನಾಯಕಿಯಾಗಿ ಅಭಿನಯಿಸಿದ ಮೊದಲ ಚಿತ್ರವಾಗುತ್ತದೆ. ಪೊನ್ನಿಯನ್‌ ಸೆಲ್ವಾನ್‌ ಚಿತ್ರದಲ್ಲಿ ದೊಡ್ಡ ತಾರಾಬಳಗವಿದ್ದು, ಐಶ್ವರ್ಯಾ ರೈ, ಅನುಷ್ಕಾ ಶೆಟ್ಟಿ ಅವರೊಂದಿಗೆ, ಚಿಯಾನ್‌ ವಿಕ್ರಮ…, ಕೀರ್ತಿ ಸುರೇಶ್‌, ಕಾರ್ತಿಕ್‌, ಅಮಿತಾಭ್‌ ಬಚ್ಚನ್‌ ಹೀಗೆ ಬಹುದೊಡ್ಡ ಸ್ಟಾರ್‌ ನಟರ ದಂಡೇ ಚಿತ್ರದ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಿದೆ.

ಒಟ್ಟಾರೆ ಪೊನ್ನಿಯನ್‌ ಸೆಲ್ವಾನ್‌ ಬಿಡುಗಡೆಗೂ ಮೊದಲೇ ಒಂದಷ್ಟು ಸದ್ದು ಮಾಡುತ್ತಿದ್ದು, ಅದರಲ್ಲೂ ಇಬ್ಬರು ಕನ್ನಡದ ಕರಾವಳಿ ಚೆಲುವೆಯರ ಕಾಂಬಿನೇಷನ್‌ ಎಷ್ಟರ ಮಟ್ಟಿಗೆ ವರ್ಕ್‌ಔಟ್‌ ಆಗಲಿದೆ ಅನ್ನೋದು ಮುಂದಿನ ವರ್ಷಾಂತ್ಯಕ್ಕೆ ಗೊತ್ತಾಗಲಿದೆ.