ಪೂಜಾ ಸಮಯ

Team Udayavani, Dec 13, 2019, 5:04 AM IST

ದಕ್ಷಿಣದಿಂದ ಉತ್ತರಕ್ಕೆ ಹೋಗಿ ಬಾಲಿವುಡ್‌ ಅಂಗಳದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿ ಮಿಂಚುತ್ತಿರುವ ನಟಿಯರ ಸಂಖ್ಯೆ ಸಾಕಷ್ಟು ದೊಡ್ಡದಿದೆ. ಇನ್ನು, ಇತ್ತೀಚೆಗೆ ಈ ಸಾಲಿನಲ್ಲಿ ಕನ್ನಡದ ನಟಿಯರು ಕೂಡ ಹೆಚ್ಚಾಗಿ ಗುರುತಿಸಿಕೊಳ್ಳುತ್ತಿದ್ದಾರೆ ಎಂಬುದೇ ಖುಷಿಯ ಸಂಗತಿ. ಈ ಸಾಲಿಗೆ ಈಗ ಮತ್ತೂಬ್ಬಳು ಕನ್ನಡದ ಚೆಲುವೆ ಪೂಜಾ ಹೆಗ್ಡೆ ಹೆಸರು ಕೂಡ ಸೇರ್ಪಡೆಯಾಗುತ್ತಿದೆ.

ಹೌದು, ಸದ್ಯ ಕನ್ನಡಕ್ಕಿಂತ ತೆಲುಗು ಚಿತ್ರರಂಗದಲ್ಲಿ ಸಾಕಷ್ಟು ಬ್ಯುಸಿಯಾಗಿರುವ ಪೂಜಾ ಹೆಗ್ಡೆ, ಈಗ ಬಾಲಿವುಡ್‌ನ‌ಲ್ಲೂ ಬೇಡಿಕೆಯ ನಾಯಕ ನಟಿಯಾಗಿ ಗುರುತಿಸಿಕೊಳ್ಳುತ್ತಿದ್ದಾರೆ ಎಂಬುದು ಈ ಹೊತ್ತಿನ ಸುದ್ದಿ. ಬಾಲಿವುಡ್‌ನ‌ಲ್ಲಿ ಈಗಾಗಲೇ ಹೃತಿಕ್‌ ರೋಷನ್‌, ಅಕ್ಷಯ್‌ ಕುಮಾರ್‌ ಮೊದಲಾದ ಸ್ಟಾರ್‌ ನಟರ ಜೊತೆ ಗುರುತಿಸಿಕೊಂಡು ಸೈ ಎನಿಸಿಕೊಂಡಿರುವ ಪೂಜಾ ಹೆಗ್ಡೆ, ಇತ್ತೀಚೆಗಷ್ಟೆ ಹೌಸ್‌ಫ‌ುಲ್‌-4 ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಅದಾದ ನಂತರ ತೆಲುಗು ಚಿತ್ರರಂಗದಲ್ಲಿ ಬ್ಯುಸಿಯಾದ ಪೂಜಾ ಹೆಗ್ಡೆ, ಈಗ ಸಲ್ಮಾನ್‌ ಖಾನ್‌ ಅಭಿನಯದ ಮುಂದಿನ ಚಿತ್ರ ಕಿಕ್‌-2 ಗೂ ನಾಯಕಿಯಾಗಿದ್ದಾರೆ ಎಂಬ ಸುದ್ದಿ ಬಾಲಿವುಡ್‌ ಅಂಗಳದಲ್ಲಿ ಜೋರಾಗಿ ಹರಿದಾಡುತ್ತಿದೆ.

ಇನ್ನು ಕಿಕ್‌-2 ಚಿತ್ರದಲ್ಲಿ ಪೂಜಾ ಹೆಗ್ಡೆ ಜೊತೆಗೆ ಜಾಕ್ವಲೀನ್‌ ಫೆರ್ನಾಂಡೀಸ್‌ ಹಾಗೂ ಕೃತಿ ಸನೂನ್‌ ಹೆಸರುಗಳು ಕೂಡ ಕೇಳಿ ಬಂದಿದ್ದವು. ಆದರೆ, ಈ ಇಬ್ಬರು ನಟಿಯರಿಗೆ ಪೈಪೋಟಿ ನೀಡಿ ಕೊನೆಗೂ ಪೂಜಾ ಚಿತ್ರಕ್ಕೆ ಆಯ್ಕೆ ಆಗಿದ್ದಾರೆ ಎನ್ನಲಾಗಿದೆ. ಸಲ್ಮಾನ್‌ಖಾನ್‌ ಅಭಿನಯದ ದಬಾಂಗ್‌-3 ಚಿತ್ರ ಸದ್ಯ ಬಿಡುಗಡೆಗೆ ತಯಾರಾಗಿದ್ದು, ಕನ್ನಡದಲ್ಲೂ ತೆರೆಗೆ ಬರುತ್ತಿರುವ ಈ ಚಿತ್ರದಲ್ಲಿ ನಟ ಸುದೀಪ್‌ ಕೂಡ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ದಬಾಂಗ್‌ -3 ನಂತರ ಸಲ್ಮಾನ್‌ ಖಾನ್‌ ರಾಧೆ ಚಿತ್ರದಲ್ಲಿ ನಟಿಸುತ್ತಿದ್ದು, ಅದಾದ ಬಳಿಕ ಕಿಕ್‌-2 ತೆರೆಗೆ ಬರುತ್ತಿದೆ. ಒಟ್ಟಾರೆ ಚಿತ್ರರಂಗಕ್ಕೆ ಕಾಲಿಟ್ಟ ಮೂರ್‍ನಾಲ್ಕು ವರ್ಷಗಳಲ್ಲೇ ದಕ್ಷಿಣಭಾರತದಿಂದ ಉತ್ತರಭಾರತದ ಚಿತ್ರರಂಗದವರೆಗೂ ಗುರುತಿಸಿಕೊಳ್ಳುತ್ತಿರುವ ಪೂಜಾ ಹೆಗ್ಡೆ, ಕಿಕ್‌-2 ನಲ್ಲಿ ತೆರೆಯ ಮೇಲೆ ಹೇಗೆ ಕಾಣುತ್ತಾರೆ ಅನ್ನೋ ಕುತೂಹಲ ಪ್ರೇಕ್ಷಕರಲ್ಲಿದೆ.