ದ್ರಾವಿಡ್‌ ಅಭಿಮಾನಿ ಪಡುಕೋಣೆ

Team Udayavani, Jan 3, 2020, 4:56 AM IST

ಬಾಲಿವುಡ್‌ ತಾರೆಯರು ಏನೇ ಮಾಡಿದರೂ ಅದು ಸುದ್ದಿಯಾಗುವುದು ಸಹಜ. ಅದರಲ್ಲೂ ಬಾಲಿವುಡ್‌ ತಾರೆಯರ ಸಿನಿಮಾಗಳು ಮತ್ತು ಅವುಗಳ ಪಾತ್ರಗಳಿಗಿಂತ ತಾರೆಯರ ಲೈಫ್ಸ್ಟೈಲ್‌, ಅವರ ಆಸಕ್ತಿಯ ವಿಚಾರಗಳು, ಅವರು ಪ್ರತಿನಿತ್ಯ ಏನು ಮಾಡುತ್ತಾರೆ, ಯಾರ ಬಗ್ಗೆ ಮಾತನಾಡುತ್ತಾರೆ ಇಂಥ ವಿಷಯಗಳ ಬಗ್ಗೆಯೇ ಅನೇಕ ಅಭಿಮಾನಿಗಳು ಕುತೂಹಲವನ್ನು ಇಟ್ಟುಕೊಂಡಿರುತ್ತಾರೆ. ಸದ್ಯದ ಮಟ್ಟಿಗೆ ಕೂತರೂ-ನಿಂತರೂ ಸುದ್ದಿಯಾಗುವ ಬಾಲಿವುಡ್‌ ಸ್ಟಾರ್ ಪಟ್ಟಿಯಲ್ಲಿ ಬಾಲಿವುಡ್‌ ಬೆಡಗಿ ದೀಪಿಕಾ ಪಡುಕೋಣೆ ಕೂಡ ಒಬ್ಬರು. ಇನ್ನು ದೀಪಿಕಾ ಪಡುಕೋಣೆ ಬಗ್ಗೆಯಂತೂ ಅವರ ಅಭಿಮಾನಿಗಳಲ್ಲಿ ಕೇಳುವುದೇ ಬೇಡ. ದೀಪಿಕಾ ಪಡುಕೋಣೆ ಏನು ಹೇಳುತ್ತಾರೆ, ಏನು ಫಾಲೋ ಮಾಡುತ್ತಾರೆ ಎಂಬುದನ್ನೇ ಫಾಲೋ ಮಾಡುವ ಬಹುದೊಡ್ಡ ಸಂಖ್ಯೆಯ ಅಭಿಮಾನಿ ವರ್ಗ ಈ ಗುಳಿಕೆನ್ನೆ ಚೆಲುವೆಗಿದೆ.

ವಿಷಯ ಏನಪ್ಪಾ ಅಂದ್ರೆ, ಸದ್ಯ ದೀಪಿಕಾ ಖ್ಯಾತ ಕ್ರಿಕೆಟಿಗ ಕಪಿಲ್‌ ದೇವ್‌ ಬಯೋಪಿಕ್‌ 83 ಚಿತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. ಹಾಗಾಗಿ, ಸಹಜವಾಗಿಯೇ ಸ್ಪೋರ್ಟ್ಸ್ ಬಗ್ಗೆ ದೀಪಿಕಾ ಏನಂತಾರೆ, ಕ್ರಿಕೆಟ್‌ ಬಗ್ಗೆ ದೀಪಿಕಾ ಅವರ ಅಭಿಪ್ರಾಯವೇನು, ಅವರ ಫೇವರೆಟ್‌ ಕ್ರಿಕೆಟರ್‌ ಯಾರು, ದೀಪಿಕಾ ಕ್ರಿಕೆಟ್‌ ನೋಡುತ್ತಾರಾ ಇಂಥ ಹತ್ತಾರು ಪ್ರಶ್ನೆಗಳು ಅಭಿಮಾನಿಗಳಲ್ಲಿ ಹರಿದಾಡುತ್ತಿತ್ತು. ಇವೆಲ್ಲದರ ಬಗ್ಗೆ ಇತ್ತೀಚೆಗೆ ಉತ್ತರಿಸಿರುವ ದೀಪಿಕಾ, ಅಭಿಮಾನಿಗಳ ಹುಬ್ಬೇರುವಂತೆ ಮಾಡಿದ್ದಾರೆ.

“ನಾನು ಕ್ರಿಕೆಟ್‌ ಮ್ಯಾಚನ್ನು ರಣವೀರ್‌ ಜೊತೆಗೆ ಕೂತು ನೋಡುತ್ತೇನೆ. ಇಬ್ಬರೂ ಜೊತೆಯಾಗಿ ಕ್ರಿಕೆಟ್‌ ಎಂಜಾಯ್‌ ಮಾಡುತ್ತೇವೆ. ಎಲ್ಲರಿಗೂ ಗೊತ್ತಿರುವಂತೆ ರಣವೀರ್‌ ಫ‌ುಟ್ಬಾಲ್‌ ಅಭಿಮಾನಿ ಜೊತೆಗೆ ಕ್ರಿಕೆಟ್‌ನ ಅತಿದೊಡ್ಡ ಅಭಿಮಾನಿ ಕೂಡ. ಪ್ರತಿಯೊಂದು ಸಿಂಗಲ್‌ ಮ್ಯಾಚನ್ನೂ ನಾವು ನೋಡಲ್ಲ. ಆದರೆ, ಮುಖ್ಯವಾದ ಪಂದ್ಯಗಳನ್ನು ಮಾತ್ರ ಬಿಡಲ್ಲ. ಇಡೀ ಕುಟುಂಬವೇ ನೋಡುವಂತೆ ನಾವು ಎದುರು ಬದರಾಗಿ ಕುಳಿತು ಮ್ಯಾಚ್‌ ಎಂಜಾಯ್‌ ಮಾಡುತ್ತೇವೆ’ ಎಂದಿದ್ದಾರೆ ದೀಪಿಕಾ. “ನಾವು ದೈಹಿಕ ಸಾಮರ್ಥ್ಯಕ್ಕೆ ಮಹತ್ವ ಕೊಟ್ಟಷ್ಟು ನಮ್ಮ ಮಾನಸಿಕ ಸಾಮರ್ಥ್ಯ ಮತ್ತು ಮಾನಸಿಕ ಸಹಿಷ್ಣುತೆ ಹೆಚ್ಚುತ್ತದೆ. ಅದಕ್ಕೆ ಕ್ರಿಕೆಟ್‌ ಕೂಡ ಸಹಾಯ ಮಾಡುತ್ತದೆ. ಅಂದ ಹಾಗೆ, ಕ್ರಿಕೆಟ್‌ನಲ್ಲಿ ಆಲ್‌ಟೈಮ್‌ ಫೇವರಿಟ್‌ ಆಟಗಾರ ಅಂದ್ರೆ ರಾಹುಲ್‌ ದ್ರಾವಿಡ್‌’ ಅಂತ ಸ್ವತಃ ದೀಪಿಕಾ ಅವರೇ ಇದನ್ನು ಹೇಳಿಕೊಂಡಿದ್ದಾರೆ.

ಇನ್ನು ದೀಪಿಕಾ ಅವರ ಈ ಮಾತುಗಳನ್ನು ಕೇಳಿ ರಾಹುಲ್‌ ದ್ರಾವಿಡ್‌ ಅಭಿಮಾನಿಗಳು ಮತ್ತು ಕನ್ನಡಿಗರು ಫ‌ುಲ್‌ ಖುಷಿಯಾಗಿದ್ದು ಸೋಶಿಯಲ್‌ ಮೀಡಿಯಾಗಳಲ್ಲಿ ದೀಪಿಕಾ ಮಾತಿಗೆ ನೆಟ್ಟಿಗರು ಜೈಕಾರ ಹಾಕುತ್ತಿದ್ದಾರೆ.