ಆರೋಗ್ಯಕರ ಸ್ಮೂದಿಗಳು

Team Udayavani, Mar 23, 2018, 7:30 AM IST

ಬಿಸಿಲಿನ ಧಗೆ ಏರುತ್ತಿದೆ. ಎಷ್ಟು ನೀರು ಕುಡಿದರೂ ಬಾಯಾರಿಕೆ ನೀಗದು. ಹೆಚ್ಚು ಖಾರ, ಮಸಾಲೆ ಪದಾರ್ಥಗಳನ್ನು ಕಡಿಮೆ ಮಾಡಿ ಮನೆಯಲ್ಲಿಯೇ ಆರೋಗ್ಯಕರ ಸ್ಮೂದಿಗಳನ್ನು ಮಾಡಿ ಕುಡಿದರೆ ಆರೋಗ್ಯಕ್ಕೂ ಹಿತ, ಮನಸ್ಸಿಗೂ ಹಿತ.

ಅಂಜೂರ ಸ್ಮೂದಿ 
ಬೇಕಾಗುವ ಸಾಮಗ್ರಿ: 1 ಕಪ್‌ ನೀರಿನಲ್ಲಿ ನೆನೆಸಿದ ಅಂಜೂರು, 1 ಕಪ್‌ ಹಾಲು, 2 ಚಮಚ ಜೇನುತುಪ್ಪ .
ತಯಾರಿಸುವ ವಿಧಾನ: ಅಂಜೂರ, ಹಾಲು ಸೇರಿಸಿ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಜೇನುತುಪ್ಪ ಹಾಕಿ ಸರಿಯಾಗಿ ಬೆರೆಸಿ ಸ್ವಲ್ಪ ಹೊತ್ತು ಫ್ರಿಜ್‌ನಲ್ಲಿಟ್ಟು ಸವಿಯಿರಿ.

ದಂಟಿನ ಸೊಪ್ಪಿನ ಸ್ಮೂದಿ 
ಬೇಕಾಗುವ ಸಾಮಗ್ರಿ: 1/4 ಕಪ್‌ ಸಣ್ಣಗೆ ಹೆಚ್ಚಿದ ದಂಟಿನ ಸೊಪ್ಪು , 1 ಏಲಕ್ಕಿ, ಸಣ್ಣ ತುಂಡು ಶುಂಠಿ, 1/2 ಕಪ್‌ ತೆಂಗಿನಹಾಲು, 1/4 ಕಪ್‌ ಶೋಧಿಸಿದ ಬೆಲ್ಲದ ನೀರು ಯಾ ಸಕ್ಕರೆ.

 ತಯಾರಿಸುವ ವಿಧಾನ: ದಂಟಿನ ಸೊಪ್ಪು , ಏಲಕ್ಕಿ, ಶುಂಠಿ ಸೇರಿಸಿ ಮಿಕ್ಸಿಯಲ್ಲಿ ಹಾಕಿ ನುಣ್ಣಗೆ ರುಬ್ಬಿ. ನಂತರ ಶೋಧಿಸಿ ಬೆಲ್ಲದ ನೀರು ಸೇರಿಸಿ ಸರಿಯಾಗಿ ಕಲಕಿ ನಂತರ ಗ್ಲಾಸಿಗೆ ಹಾಕಿ ಸವಿಯಿರಿ.

ಸ್ಟ್ರಾಬೆರಿ ಸ್ಮೂದಿ
 ಬೇಕಾಗುವ ಸಾಮಗ್ರಿ: 1/2 ಕಪ್‌ ಸಣ್ಣಗೆ ಹೆಚ್ಚಿದ ಸ್ಟ್ರಾಬೆರಿ ಹಣ್ಣು , 1/2 ಕಪ್‌ ಸಕ್ಕರೆ, 1 ಕಪ್‌ ಹಾಲು, 2 ಪುದೀನಾ ಎಲೆ, ಸಣ್ಣ ತುಂಡು ಲಿಂಬೆ ಚೂರು.

ತಯಾರಿಸುವ ವಿಧಾನ: ಸ್ಟ್ರಾಬೆರಿ ಹಣ್ಣಿನ ಚೂರು, ಸಕ್ಕರೆ, ಹಾಲು ಸೇರಿಸಿ ಮಿಕ್ಸಿಯಲ್ಲಿ ರುಬ್ಬಿ. ನಂತರ ಗ್ಲಾಸಿಗೆ ಹಾಕಿ ಪುದೀನಾ ಎಲೆ, ವೃತ್ತಾಕಾರದ ಲಿಂಬೆ ಚೂರು ಗ್ಲಾಸಿಗೆ ಸಿಕ್ಕಿಸಿ ಸರ್ವ್‌ ಮಾಡಿ.

ಮೆಂತೆ ಸೊಪ್ಪಿನ ಸ್ಮೂದಿ
ಬೇಕಾಗುವ ಸಾಮಗ್ರಿ: 1 ಕಪ್‌ ಹಾಲು, ಸಣ್ಣಗೆ ತುಂಡು ಮಾಡಿದ 1/2 ಕಪ್‌ ಮೆಂತೆಸೊಪ್ಪು , 2 ಚಮಚ ಜೇನುತುಪ್ಪ , 1/2 ಕಪ್‌ ತೆಂಗಿನ ಹಾಲು, 1/4 ಚಮಚ ಜೀರಿಗೆ.

ತಯಾರಿಸುವ ವಿಧಾನ: ಮೆಂತೆಸೊಪ್ಪು ಮತ್ತು ಜೀರಿಗೆಯನ್ನು ಸ್ವಲ್ಪ ನೀರು ಸೇರಿಸಿ ರುಬ್ಬಿ. ನಂತರ ಶೋಧಿಸಿ. ಹಾಲು, ಜೇನುತುಪ್ಪ , ತೆಂಗಿನ ಹಾಲು ಹಾಕಿ ಸರಿಯಾಗಿ ಬೆರೆಸಿ ಗ್ಲಾಸಿಗೆ ಹಾಕಿ ಕುಡಿಯಿರಿ.        

ಸೀಬೆಹಣ್ಣಿನ ಸ್ಮೂದಿ
ಬೇಕಾಗುವ ಸಾಮಗ್ರಿ: 2 ಸೀಬೆ ಹಣ್ಣು, 1 ಕಪ್‌ ಹಾಲು, 1/4 ಕಪ್‌ ಸಕ್ಕರೆ, ಸ್ವಲ್ಪ ಐಸ್‌ ತುಂಡುಗಳು, 2 ಚಮಚ ವೆನಿಲಾ ಐಸ್‌ಕ್ರೀಮ್‌.

ಸ್ಮೂಸೀಬೆಹಣ್ಣು ತುಂಡು ಮಾಡಿ. ಒಳಗಿನ ಬೀಜ ತೆಗೆದು ಹಾಲು, ವೆನಿಲಾ ಐಸ್‌ಕ್ರೀಮ್‌ ಸೇರಿಸಿ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಐಸ್‌ತುಂಡು ಸೇರಿಸಿ ಸರಿಯಾಗಿ ಕಲಕಿ. ಗ್ಲಾಸಿಗೆ ಹಾಕಿ ಸವಿಯಿರಿ.

ಮಾವು-ಓಟ್ಸ್‌ ಡಿಲೈಟ್‌ ಸ್ಮೂದಿ
ಬೇಕಾಗುವ ಸಾಮಗ್ರಿ: 1 ಕಪ್‌ ಮಾವಿನಹಣ್ಣಿನ ತುಂಡುಗಳು, 2 ಚಮಚ ಓಟ್ಸ್‌ , 2 ಕಪ್‌ ಹಾಲು, ಸ್ವಲ್ಪ ಮಂಜುಗಡ್ಡೆ ತುಂಡುಗಳು.

ಸ್ಮೂ ಮಾವಿನ ಹಣ್ಣಿನ ತಿರುಳು, ಓಟ್ಸ್‌ , ಹಾಲು, ಮಂಜುಗಡ್ಡೆ ತುಂಡು ಸೇರಿಸಿ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಗ್ಲಾಸಿಗೆ ಹಾಕಿ ಸವಿಯಿರಿ. 

ಹಲಸಿನ ಹಣ್ಣಿನ ಸ್ಮೂದಿ
ಬೇಕಾಗುವ ಸಾಮಗ್ರಿ: 10-12 ಹಲಸಿನ ಹಣ್ಣಿನ ಸೊಳೆ, 4 ಚಮಚ ಹಾಲಿನ ಪುಡಿ, 1 ಕಪ್‌ ಹಾಲು, 2 ಚಮಚ ಜೇನುತುಪ್ಪ.

ತಯಾರಿಸುವ ವಿಧಾನ: ಹಲಸಿನ ಹಣ್ಣಿನ ಸೊಳೆ, ಹಾಲಿನ ಪುಡಿ ಮತ್ತು ಹಾಲು ಸೇರಿಸಿ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಜೇನುತುಪ್ಪ ಹಾಕಿ ಸರಿಯಾಗಿ ಬೆರೆಸಿ. ನಂತರ ಗ್ಲಾಸಿಗೆ ಹಾಕಿ ರುಚಿ ನೋಡಿ.

ಮುಳ್ಳುಸೌತೆ-ಕರಬೂಜ-ಕಲ್ಲಂಗಡಿ ಸ್ಮೂದಿ
ಬೇಕಾಗುವ ಸಾಮಗ್ರಿ: 1/2 ಕಪ್‌ ಮುಳ್ಳುಸೌತೆ ತುಂಡುಗಳು, 1/2 ಕಪ್‌ ಕರಬೂಜ ಹಣ್ಣಿನ ತುಂಡುಗಳು, 1/2 ಕಪ್‌ ಕಲ್ಲಂಗಡಿ ಹಣ್ಣಿನ  ತುಂಡುಗಳು, 1/2 ಕಪ್‌ ಹಾಲು, ಚಿಟಿಕಿ ಶುಂಠಿ ಪುಡಿ, ಚಿಟಿಕಿ ಏಲಕ್ಕಿ ಪುಡಿ.

ತಯಾರಿಸುವ ವಿಧಾನ: ಮುಳ್ಳುಸೌತೆ ಚೂರು, ಕರಬೂಜ ಹಣ್ಣಿನ ತುಂಡುಗಳು, ಕಲ್ಲಂಗಡಿ ಹಣ್ಣಿನ ಚೂರು, ಹಾಲು, ಶುಂಠಿ ಪುಡಿ, ಏಲಕ್ಕಿ ಪುಡಿ ಸೇರಿಸಿ ಮಿಕ್ಸಿಗೆ ಹಾಕಿ ರುಬ್ಬಿ. ನಂತರ ಗ್ಲಾಸಿಗೆ ಹಾಕಿ ಸವಿಯಿರಿ.

ಸರಸ್ವತಿ ಎಸ್‌. ಭಟ್‌