ಶಕುಂತಲಾ ದೇವಿ ವಿದ್ಯಾ ಬಾಲನ್‌

Team Udayavani, Sep 20, 2019, 5:00 AM IST

ಬಾಲಿವುಡ್‌ ಚೆಲುವೆ ವಿದ್ಯಾ ಬಾಲನ್‌ ಯಾವಾಗಲೂ ವಿಭಿನ್ನ ಪಾತ್ರಗಳಿಗೆ ತೆರೆದುಕೊಳ್ಳುವ ನಟಿ. ಬಹುಶಃ ಹಾಗಾಗಿಯೇ ಪ್ರತಿ ಚಿತ್ರದಲ್ಲೂ ವಿಭಿನ್ನ ಪಾತ್ರಗಳು ವಿದ್ಯಾ ಬಾಲನ್‌ ಅವರನ್ನು ಹುಡುಕಿಕೊಂಡು ಬರುತ್ತವೆ. ಇನ್ನು ಹೊಸಥರದ ಪಾತ್ರಗಳನ್ನು ಒಪ್ಪಿಕೊಂಡು ಅದಕ್ಕೆ ಜೀವ ತುಂಬುವ ವಿದ್ಯಾ ಬಾಲನ್‌ ಒಂದೇ ರೀತಿಯ ಪಾತ್ರಗಳಿಗೆ ಅಂಟಿಕೊಳ್ಳುವವರಲ್ಲ. ಸವಾಲೆನಿಸುವ ಪಾತ್ರಗಳಿಂದ ಪ್ರೇಕ್ಷಕರಿಗೆ ಆಪ್ತ ಎನಿಸುತ್ತಾರೆ ಎನ್ನುವುದು ಅವರ ಅಪ್ಪಟ ಅಭಿಮಾನಿಗಳ ಮಾತು. ಇತ್ತೀಚೆಗಷ್ಟೆ, ಮಿಶನ್‌ ಮಂಗಲ್‌ ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬಂದಿದ್ದ ವಿದ್ಯಾಬಾಲನ್‌, ಶೀಘ್ರದಲ್ಲಿಯೇ ಅಂಥದ್ದೇ ಮತ್ತೂಂದು ವಿಭಿನ್ನ ಚಿತ್ರದಲ್ಲಿ, ವಿಭಿನ್ನ ಪಾತ್ರದಲ್ಲಿ ಪ್ರೇಕ್ಷಕರ ಮುಂದೆ ಬರುವ ತಯಾರಿಯಲ್ಲಿದ್ದಾರೆ.

ಹೌದು, ವಿದ್ಯಾಬಾಲನ್‌ ಹ್ಯೂಮನ್‌ ಕಂಪ್ಯೂಟರ್‌ ಎಂದೇ ಖ್ಯಾತರಾಗಿದ್ದ ಶಕುಂತಲಾ ದೇವಿ ಬಯೋಪಿಕ್‌ನಲ್ಲಿ ಅಭಿನಯಿಸುತ್ತಿದ್ದು, ಸದ್ದಿಲ್ಲದೆ ಈ ಚಿತ್ರೀಕರಣ ಕೂಡ ನಡೆಯುತ್ತಿದೆ. ಇನ್ನು ಈ ಚಿತ್ರಕ್ಕೆ ಶಕುಂತಲಾ ದೇವಿ ಹ್ಯೂಮನ್‌ ಕಂಪ್ಯೂಟರ್‌ ಎಂದು ಹೆಸರಿಡಲಾಗಿದ್ದು, ಇತ್ತೀಚೆಗೆ ಈ ಚಿತ್ರದ ಫ‌ಸ್ಟ್‌ಲುಕ್‌ ಮತ್ತು ಟೀಸರ್‌ ಕೂಡ ರಿಲೀಸ್‌ ಆಗಿದೆ.

ಸದ್ಯ ಬಿಡುಗಡೆಯಾಗಿರುವ ಶಕುಂತಲಾ ದೇವಿ ಹ್ಯೂಮನ್‌ ಕಂಪ್ಯೂಟರ್‌ ಚಿತ್ರದ ಫ‌ಸ್ಟ್‌ಲುಕ್‌ ಮತ್ತು ಟೀಸರ್‌ ಎರಡೂ ನೋಡುಗರ ಗಮನ ಸೆಳೆಯುತ್ತಿದ್ದು, ನಟಿ ವಿದ್ಯಾಬಾಲನ್‌ ಕೆಂಪು ಬಣ್ಣದ ಸೀರೆ ಉಟ್ಟಿದ್ದು, ಬಾಬ್‌ಕಟ್‌ ಮಾಡಿಸಿ, ಥೇಟ್‌ ಶಕುಂತಲಾ ದೇವಿಯಂತೆ ಕಾಣಿಸುತ್ತಾರೆ.

ಈ ಬಗ್ಗೆ ಮಾತನಾಡುವ ವಿದ್ಯಾಬಾಲನ್‌, ಗಣಿತ ಶಾಸ್ತ್ರದ ಪರಿಣಿತೆ ಶಕುಂತಲಾ ದೇವಿ ಪಾತ್ರ ಮಾಡುತ್ತಿರುವುದು ಖುಷಿ ವಿಚಾರ. ಅವರ ಜೀವನ ಚರಿತ್ರೆಯನ್ನು ತೆರೆ ಮೇಲೆ ತರುತ್ತಿರುವುದು ಖುಷಿಯ ವಿಚಾರ. ಒಂದು ಪುಟ್ಟ ಹಳ್ಳಿಯಿಂದ ಬಂದ ಹೆಣ್ಣು ಮಗಳೊಬ್ಬಳು ಇಡೀ ಜಗತ್ತೇ ತನ್ನತ್ತ ನೋಡುವಂತೆ ಮಾಡಿರುವುದು ಅದ್ಭುತ. ಅಂಥ ಪಾತ್ರದಲ್ಲಿ ಅಭಿನಯಿಸುತ್ತಿರುವ ಅವಕಾಶ ಸಿಕ್ಕಿದ್ದಕ್ಕೆ ನಾನು ಲಕ್ಕಿ ಎಂದೇ ಭಾವಿಸುತ್ತೇನೆ’ ಎಂದಿದ್ದಾರೆ.

ಅಂದ ಹಾಗೆ, ಶಕುಂತಲಾ ದೇವಿ ಹ್ಯೂಮನ್‌ ಕಂಪ್ಯೂಟರ್‌ ಚಿತ್ರಕ್ಕೆ ಅನು ಮೆನನ್‌ ನಿರ್ದೇಶನ ಮಾಡುತ್ತಿದ್ದು, ಚಿತ್ರ 2020ಕ್ಕೆ ತೆರೆ ಕಾಣುತ್ತಿದೆ.