ಕಾರು ಮಾರಾಟದಲ್ಲಿ ಗಣನೀಯ ಏರಿಕೆ; ಕಂಪನಿಗಳಲ್ಲಿ ಒಡಮೂಡಿದ ಹೊಸ ಉತ್ಸಾಹ

Team Udayavani, Jun 1, 2022, 10:42 PM IST

ನವದೆಹಲಿ: ದೇಶದ ಅಗ್ರ ಕಾರು ಮಾರಾಟ ಕಂಪನಿಗಳಾದ ಮಾರುತಿ ಸುಝುಕಿ, ಟಾಟಾ, ಹೋಂಡಾ ಹಾಗೂ ಹುಂಡೈ ಇಂಡಿಯಾ ಕಂಪನಿಗಳ ಕಾರುಗಳು ಮೇ ತಿಂಗಳಲ್ಲಿ ಗಣನೀಯ ಸಂಖ್ಯೆಯಲ್ಲಿ ಮಾರಾಟವಾಗಿದ್ದು, ಇದು ಕಂಪನಿಗಳಲ್ಲಿ ಹೊಸ ಉತ್ಸಾಹಕ್ಕೆ ಕಾರಣವಾಗಿದೆ.

ಅದರಲ್ಲೂ ಅತಿ ಹೆಚ್ಚು ಕಾರುಗಳನ್ನು ಮಾರಾಟ ಮಾಡಿದ ಹೆಗ್ಗಳಿಕೆ ಮಾರುತಿ ಸುಝಕಿ ಕಂಪನಿಯದ್ದಾಗಿದೆ. ಕಳೆದ ತಿಂಗಳು ಈ ಕಂಪನಿ, 1.28 ಲಕ್ಷ ಕಾರುಗಳನ್ನು ಮಾರಾಟ ಮಾಡಿದೆ. ಜೊತೆಗೆ, ಮೇ ತಿಂಗಳಲ್ಲಿ ತನ್ನ ಇತಿಹಾಸದಲ್ಲೇ ಅತಿ ಹೆಚ್ಚು ಕಾರುಗಳನ್ನು (27,191) ವಿದೇಶಕ್ಕೆ ರಫ್ತು ಮಾಡಿದೆ. ಕಳೆದ ವರ್ಷ ಮೇ ತಿಂಗಳಿನಲ್ಲಿ ಮಾರುತಿ, 46.5 ಲಕ್ಷ ಕಾರುಗಳನ್ನು ಮಾರಾಟ ಮಾಡಿತ್ತು. ಅದಕ್ಕೆ ಹೋಲಿಸಿದರೆ ಈ ವರ್ಷದ ಮಾರಾಟ ಗಣನೀಯವಾಗಿ ಹೆಚ್ಚಾಗಿರುವುದು ಕಂಡುಬಂದಿದೆ. ಇನ್ನು, ಟೊಯೊಟಾ ಕಂಪನಿಯೊಂದಿಗೆ ಮಾಡಿಕೊಂಡಿರುವ ಒಪ್ಪಂದದಡಿ, 6,222 ಕಾರುಗಳನ್ನು ಆ ಕಂಪನಿಗೆ ನೀಡಿದೆ.

ಅತ್ತ, ಹೋಂಡಾ ಕಂಪನಿಯು ಮೇ ತಿಂಗಳಲ್ಲಿ 8,188 ಕಾರುಗಳನ್ನು ಮಾರಾಟ ಮಾಡಿದ್ದರೆ, ವಿದೇಶಕ್ಕೆ 1,997 ಕಾರುಗಳನ್ನು ರಫ್ತು ಮಾಡಿರುವುದಾಗಿ ತಿಳಿಸಿದೆ. ಕಳೆದ ಮೇ ತಿಂಗಳಲ್ಲಿ ಹೋಂಡಾ ಕಂಪನಿಯು ಕೇವಲ 2,032 ಕಾರುಗಳನ್ನು ಮಾರಾಟ ಮಾಡಿತ್ತು.

ಇನ್ನು, ಹುಂಡೈ ಇಂಡಿಯಾ ಕಂಪನಿಯು, ಮೇ ತಿಂಗಳಲ್ಲಿ 51,263 ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ಹೇಳಿದೆ. ಕಳೆದ ವರ್ಷದ ಮೇನಲ್ಲಿ 30,703 ಕಾರುಗಳನ್ನು ಮಾರಾಟ ಮಾಡಿದ್ದು, ಅದಕ್ಕೆ ಹೋಲಿಸಿದರೆ ಈ ವರ್ಷ ಮೇನಲ್ಲಿ ಶೇ. 67ರಷ್ಟು ವೃದ್ಧಿಯಾಗಿದೆ ಎಂದು ಹೇಳಿದೆ.

ಟಾಟಾ ಹೊಸ ದಾಖಲೆ
ಟಾಟಾ ಕಂಪನಿ ಕೂಡ ಮೇ ತಿಂಗಳಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಕಾರುಗಳನ್ನು ಮಾರಾಟ ಮಾಡಿರುವುದಾಗಿ ತಿಳಿಸಿದೆ. ಪ್ಯಾಸೆಂಜರ್‌ ವಾಹನಗಳ ವಿಭಾಗದಲ್ಲಿ 43,341 ಕಾರುಗಳನ್ನು ಮಾರಾಟ ಮಾಡಿದ್ದು, ಕಳೆದ ವರ್ಷದ ಮೇ ತಿಂಗಳಿಗೆ ಹೋಲಿಸಿದರೆ ಈಗಾಗಿರುವ ಮಾರಾಟ ಶೇ. 185ರಷ್ಟು ಹೆಚ್ಚಾಗಿದ್ದು ಇದೊಂದು ದಾಖಲೆಯಾಗಿದೆ ಎಂದು ಹೇಳಿದೆ.