2.5 ಮಿಲಿಯನ್ ಪೋಸ್ಟ್ ಗಳನ್ನು ಕಿತ್ತೆಸೆದ ಫೇಸ್ ಬುಕ್: ನಿಮ್ಮ ಅಕೌಂಟ್ ಎಷ್ಟು ಸುರಕ್ಷಿತ ?

Team Udayavani, Nov 15, 2019, 8:00 AM IST

ನ್ಯೂಯಾರ್ಕ್:  ಫೇಸ್ ಬುಕ್ ತನ್ನ ಬಳಕೆದಾರರಿಗೆ ಸುರಕ್ಷತೆಯನ್ನು ಒದಗಿಸುವ ದೃಷ್ಟಿಯಿಂದ ಹಿಂಸೆಗೆ ಪ್ರಚೋದಿಸುವ ಮತ್ತು ಆತ್ಮಹತ್ಯೆಗೆ ಸಂಬಂಧಿಸಿದ 2.5 ಮಿಲಿಯನ್ ಪೋಸ್ಟ್ ಗಳನ್ನು ಕಿತ್ತೆಸೆದಿದೆ. ಅದರ ಜೊತೆಗೆ 4.4 ಮಿಲಿಯನ್ ಡ್ರಗ್ಸ್ ಮಾರಾಟ ಮಾಡುವ ಕುರಿತಾದ ಜಾಹೀರಾತು ಪೋಸ್ಟ್ ಗಳನ್ನು ತೆಗೆದುಹಾಕಿದೆ.

ಫೇಸ್​ಬುಕ್​ನಲ್ಲಿ ನಕಲಿ ಖಾತೆಗಳ ಹಾವಳಿ ಭಾರೀ ಪ್ರಮಾಣದಲ್ಲಿ ಹೆಚ್ಚಾಗಿದ್ದು, ಎಪ್ರಿಲ್​ ಮತ್ತು ಸೆಪ್ಟಂಬರ್ ನಡುವೆ ​ 350 ಕೋಟಿ​ ನಕಲಿ ಖಾತೆಗಳು ಪತ್ತೆಯಾಗಿವೆ. ಈ ಬಗ್ಗೆಕಠಿಣ ಕ್ರಮ ತೆಗೆದುಕೊಂಡಿರುವ ಫೇಸ್​ಬುಕ್​ ಸಂಸ್ಥೆ ನಕಲಿ ಖಾತೆಗಳನ್ನು ನಿಷ್ಕ್ರೀಯಗೊಳಿಸಿದೆ.  ಮಾತ್ರವಲ್ಲದೆ, ಬಳಕೆದಾರರಿಗೆ ಸುರಕ್ಷತೆಯನ್ನು ಒದಗಿಸಿದೆ. ಫೇಸ್​ಬುಕ್ ಬಳಕೆದಾರರ ಸಂಖ್ಯೆ ಹೆಚ್ಚಿದಂತೆ ನಕಲಿ ಖಾತೆಗಳನ್ನು ಸೃಷ್ಠಿಸುವವರ ಸಂಖ್ಯೆಯೂ ಹೆಚ್ಚಾಗುತ್ತಿದೆ.

ಕಳೆದ ವರ್ಷ ಏಪ್ರಿಲ್​ ಮತ್ತು ನವೆಂಬರ್​ 1.5 ಬಿಲಿಯನ್​ ಫೇಕ್​ ಅಕೌಂಟ್​ಗಳು ಪತ್ತೆಯಾಗಿದ್ದವು. ಅದರ ಜೊತೆಗೆ ಅವಹೇಳನಕಾರಿ ಸಂದೇಶ ರವಾನಿಸುವ ಖಾತೆಗಳನ್ನು ಫೇಸ್​ಬುಕ್​ ಕಿತ್ತುಹಾಕಿತ್ತು. ಇದೀಗ ಮತ್ತಷ್ಟು ಎಚ್ಚರಿಕೆಗೊಂಡ ಫೇಸ್​ಬುಕ್​,  ಇನ್​ ಸ್ಟಾಗ್ರಾಂನಲ್ಲೂ ಕೂಡ ಅವಹೇಳನಕಾರಿ ಸಂಗತಿಗಳನ್ನು ಹರಿಯ ಬಿಡುವ ಅಥವಾ ಲೈಂಗಿಕತೆಯ ಬಗೆಗಿನ ಸಂದೇಶವನ್ನು, ತುಣುಕುಗಳನ್ನು ಹರಿಯ ಬಿಡುತ್ತಿದ್ದ 8.64 ಮಿಲಿಯನ್​ ಖಾತೆಗಳನ್ನು ತೆಗೆದು ಹಾಕಿದೆ.