ಮಾಜಿ ಟಿಕ್ ಟಾಕ್ ಸ್ಟಾರ್ ಗಳೇ ನಿಮಗೊಂದು ಗುಡ್ ನ್ಯೂಸ್, ಬಂದಿದೆ REELS!

Team Udayavani, Jul 8, 2020, 8:08 PM IST

ನವದೆಹಲಿ: ಟಿಕ್ ಟಾಕ್ ಇಲ್ಲದೆ ಬಹಳ ಬೇಜಾರುಪಟ್ಟುಕೊಂಡಿರುವ ನಮ್ಮ ಟಿಕ್ ಟಾಕ್ ಸ್ಟಾರ್ ಗಳಿಗೆಲ್ಲಾ ಒಂದು ಗುಡ್ ನ್ಯೂಸ್ ಇಲ್ಲಿದೆ.

ಈ ಚೈನೀಸ್ ಆ್ಯಪ್ ನಮ್ಮ ದೇಶದಿಂದ ಬ್ಯಾನ್ ಆಗಿ ಸರಿಸುಮಾರು ಒಂದು ವಾರಗಳ ಬಳಿಕ ಫೇಸ್ಬುಕ್ ಒಡೆತನದ ಇನ್ ಸ್ಟಾಗ್ರಾಂ ತನ್ನಲ್ಲಿ ಟಿಕ್ ಟಾಕನ್ನೇ ಹೋಲುವ ಹೊಸ ಫೀಚರ್ ಒಂದನ್ನು ಪ್ರಾರಂಭಿಸಿದೆ, ಅದುವೇ ರೀಲ್ಸ್.

ಭಾರತದಲ್ಲಿ ಇನ್ ಸ್ಟಾ ಪ್ರಾರಂಭಿಸಲು ಉದ್ದೇಶಿಸಿರುವ ಈ ಹೊಸ ಫೀಚರ್ ನ ಪ್ರಾಯೋಗಿಕ ಲಾಂಚಿಂಗ್ ಇಂದು ಆರಂಭಗೊಂಡಿದೆ. ಈ ಹೊಸ ಫೀಚರ್ ನಲ್ಲಿ ಬಳಕೆದಾರರು 15 ಸೆಕೆಂಡ್ ಗಳ ವಿಡಿಯೋವನ್ನು ಅಪ್ಲೋಡ್ ಮಾಡಲು ಅವಕಾಶವಿದೆ.

ಟಿಕ್ ಟಾಕ್ ಮತ್ತು ಯೂಟ್ಯೂಬ್ ನಲ್ಲಿ ಈಗಾಗಲೇ ತಮ್ಮ ವೈವಿಧ್ಯಮಯ ವಿಡಿಯೋಗಳ ಮೂಲಕ ಸ್ಟಾರ್ ಪಟ್ಟಕ್ಕೇರಿರುವ ವ್ಯಕ್ತಿಗಳೊಂದಿಗೆ ಸಹಭಾಗಿತ್ವವನ್ನು ಮಾಡಿಕೊಂಡು ತನ್ನ ಈ ಹೊಸ ಫೀಚರನ್ನು ಶೀಘ್ರವೇ ದೇಶದಲ್ಲಿ ಜನಪ್ರಿಯಗೊಳಿಸುವ ಗುರಿಯನ್ನೂ ಸಹ ಇನ್ ಸ್ಟಾಗ್ರಾಂ ಹೊಂದಿದೆ ಎಂದು ಸಂಸ್ಥೆ ಈಗಾಗಲೇ ಪ್ರಕಟಿಸಿದೆ.

ಇನ್ನೊಂದು ವಿಶೇಷತೆಯೆಂದರೆ ಈ ರೀಲ್ಸ್ ಫೀಚರ್ ಇದುವರೆಗೆ ಕೇವಲ 3 ದೇಶಗಳಲ್ಲಿ ಮಾತ್ರವೇ ಪರಿಚಯಗೊಂಡಿತ್ತು, ಅವುಗಳೆಂದರೆ, ಬ್ರಝಿಲ್, ಫ್ರಾನ್ಸ್ ಹಾಗೂ ಜರ್ಮನಿ. ಹಾಗಾಗಿ ಇನ್ ಸ್ಟಾಗ್ರಾಂನ ಈ ಹೊಸ ಶಾರ್ಟ್ ವಿಡಿಯೋ ಪ್ಲ್ಯಾಟ್ ಫಾರಂ ಪರಿಚಯಿಸಲ್ಪಡುತ್ತಿರುವ ಜಗತ್ತಿನ ನಾಲ್ಕನೇ ದೇಶ ಭಾರತವಾಗಿದೆ.

ಇಲ್ಲಿರುವ ಯುವ ಜನತೆಯನ್ನೇ ಟಾರ್ಗೆಟ್ ಮಾಡಿಕೊಂಡು ಹೊರಬರುತ್ತಿರುವ ಈ ಹೊಸ ಫೀಚರ್ ನಲ್ಲಿ ನಿಮ್ಮ ವಿಡಿಯೋ ಮಾಡಬೇಕೆಂದರೆ ನಿಮ್ಮ ಮೊಬೈಲ್ ನಲ್ಲಿರುವ ಇನ್ ಸ್ಟಾಗ್ರಾಂ ಆ್ಯಪ್ ನಲ್ಲಿ ಕೆಮರಾ ಆಯ್ಕೆಗೆ ಕ್ಲಿಕ್ ಮಾಡಬೇಕು.

ಅಲ್ಲಿ ಸ್ಕ್ರೀನ್ ನ ಕೆಳಭಾಗದಲ್ಲಿ ಕಾಣಿಸುವ REEL ಆಯ್ಕೆಯನ್ನು ಬಳಕೆದಾರರು ಕ್ಲಿಕ್ ಮಾಡಿದ ಸಂದರ್ಭದಲ್ಲಿ ಹಲವಾರು ಆಯ್ಕೆಗಳು ನಿಮಗೆ ಕಾಣಿಸುತ್ತವೆ ಮತ್ತು ಈ ಬಳಕೆದಾರ ಸ್ನೇಹಿ ಆಯ್ಕೆಗಳ ಮೂಲಕ ನೀವು 15 ಸೆಕೆಂಡ್ ಗಳ ವಿಡಿಯೋವನ್ನು ರೆಕಾರ್ಡ್ ಮಾಡಿಕೊಂಡು ಅಪ್ಲೋಡ್ ಮಾಡಬಹುದಾಗಿರುತ್ತದೆ.

ಪ್ರಾರಂಭದಲ್ಲಿ ಇನ್ ಸ್ಟಾ ತನ್ನ ಈ ಹೊಸ ಫೀಚರ್ ನಲ್ಲಿ ರಾಧಿಕಾ ಬಂಗಿಯಾ, ಜಾಹ್ನವಿ ದಾಸೆಟ್ಟಿ, ಇಂದ್ರಾಣಿ ಬಿಸ್ವಾಸ್, ಅಮ್ಮಿ ವಿರ್ಕ್ ಹಾಗೂ ಇನ್ನಿತರರ ಮನರಂಜನಾ ವಿಡಿಯೋಗಳನ್ನು ವೀಕ್ಷಕರಿಗೆ ಲಭ್ಯವಾಗಿಸಲಿದೆ.