ಜಪಾನ್‌ ರಾಜಧಾನಿ ಟೋಕಿಯೊದಲ್ಲಿದೆ ಪಾರದರ್ಶಕ ಶೌಚಾಲಯ

Team Udayavani, Sep 25, 2020, 5:27 PM IST

ಮಣಿಪಾಲ: ಹಲವು ಆವಿಷ್ಕಾರ ಮತ್ತು ಜನರ ಪರಿಶ್ರಮಗಳಿಗೆ ಹೆಸರುವಾಸಿಯಾಗಿರುವ ಜಪಾನ್‌ ಇದೀಗ ಮತ್ತೆ ಸುದ್ದಿಯಲ್ಲಿದೆ.

ರಾಜಧಾನಿ ಟೋಕಿಯೊದಲ್ಲಿನ ಉದ್ಯಾನವನಗಳಲ್ಲಿ ಪಾರದರ್ಶಕ ಸಾರ್ವಜನಿಕ ಶೌಚಾಲಯಗಳನ್ನು ಸ್ಥಾಪಿಸಲಾಗಿದೆ.

ಅಯ್ಯೋ ಪಾರದರ್ಶಕ ಶೌಚಾಲಯವಾ? ಅದನ್ನು ಹೇಗೆ ಬಳಸುವುದು? ಎಂದು ಮೂಗುಮುರಿಯಬೇಡಿ.

ಹೌದು ಇಂತಹದೊಂದು ಜಪಾನ್‌ನಲ್ಲಿ ಇದೆ. ಮಾತ್ರವಲ್ಲದೇ ಜನರು ಬಳಸುತ್ತಿದ್ದಾರೆ.

ಶೌಚಾಲಯ ಸ್ವಚ್ಛವಾಗಿದೆಯೇ ಮತ್ತು ಒಳಗೆ ಯಾರೂ ಇಲ್ಲ ಎಂಬುದನ್ನು ಜನರು ಸುಲಭವಾಗಿ ತಿಳಿದುಕೊಳ್ಳಬೇಕು ಎಂಬ ಕಾರಣಕ್ಕೆ ಪಾರದರ್ಶಕ ಶೌಚಾಲಯವನ್ನು ಸ್ಥಾಪಿಸಲಾಗಿದೆ.

ಶೌಚಾಲಯದ ಸಂಪೂರ್ಣ ಚಿತ್ರಣವನ್ನು ಜನರು ಹೊರಗಿನಿಂದ ನೋಡಬಹುದು. ಆದರೆ ಒಳಗೆ ಜನರು ಇರುವಾಗ ನೋಡಲು ಸಾಧ್ಯವಾಗುವುದಿಲ್ಲ. ಇದು ಜಪಾನ್‌ ಟಾಯ್ಲೆಟ್‌ನ ವಿಶೇಷತೆ. ಶೌಚಾಲಯದ ನಿರ್ಮಾಣದಲ್ಲಿ ಸ್ಮಾರ್ಟ್‌ ಗ್ಲಾಸ್‌ ಅನ್ನು ಬಳಸಲಾಗಿದೆ. ಅವುಗಳನ್ನು ವಿಶ್ವದ ಹೆಸರಾಂತ ಸೃಜನಶೀಲ ವಾಸ್ತುಶಿಲ್ಪಿ ಶಿಗೇರು ಬೆನ್‌ ಅಭಿವೃದ್ಧಿಪಡಿಸಿದ್ದಾರೆ. ಇವರು ಮರುಬಳಕೆಯ ವಸ್ತುಗಳಲ್ಲಿ ನಿರ್ಮಾಣ ಕಾರ್ಯವನ್ನು ಮಾಡುವುದರಲ್ಲಿ ಪ್ರವೀಣರು.

ಇದು ಹೇಗೆ ಕಾರ್ಯನಿರ್ವಹಿಸುತ್ತದೆ
ಪಾರದರ್ಶಕ ಶೌಚಾಲಯ ಎಂದ ಕೂಡಲೇ ಬಸ್‌, ವಿಮಾನ ಅಥವ ರೈಲು ನಿಲ್ದಾಣದ ಒಳಗೆ ಪಾರದರ್ಶಕ ವಿಶ್ರಾಂತಿ ಕೋಣೆಗಳಲ್ಲಿ ಕುಳಿತಿರುವ  ಜನರ ದೃಶ್ಯ ನೆನಪಿಗೆ ಬರುತ್ತದೆ. ಒಳಗೆ ಕುಳಿತುಕೊಳ್ಳುವ ಜನರು ನಿಮ್ಮನ್ನು ನೋಡುವ ದೃಶ್ಯ ನಿಮ್ಮ ಮನಸ್ಸಿನಲ್ಲಿ ಪ್ರತಿಫ‌ಲನಗೊಳ್ಳುತ್ತದೆ. ಹೆಚ್ಚಿನ ಜನರು ಇದೇ ರೀತಿ ಅರ್ಥಮಾಡಿಕೊಂಡಿರುತ್ತಾರೆ.

ಆದರೆ ಅದು ಹಾಗಲ್ಲ. ಈ ಶೌಚಾಲಯದ ನಿರ್ಮಾಣದಲ್ಲಿ ಸ್ಮಾರ್ಟ್‌ ಗ್ಲಾಸ್‌ ಬಳಸಲಾಗಿದೆ. ಒಬ್ಬ ವ್ಯಕ್ತಿಯು ಶೌಚಾಲಯದೊಳಗೆ ಹೋಗಿ ಬಾಗಿಲು ಲಾಕ್‌ ಮಾಡಿದಾಗ, ಪಾರದರ್ಶಕವಾಗಿರುವ ಶೌಚಾಲಯದ ಗೋಡೆಯು ಬದಲಾಗುತ್ತದೆ. ಆದರೆ ಈ ವ್ಯವಸ್ಥೆಯಲ್ಲಿ ಒಳಗೆ ಕುಳಿತ ವ್ಯಕ್ತಿಯು ಹೊರ ಭಾಗದಲ್ಲಿ ನಡೆಯುತ್ತಿರುವ ಚಟುವಟಿಕೆ ಮತ್ತು ಜನರ ಚಲನವಲನಗಳನ್ನು ನೋಡಬಹುದು. ಆದರೆ ಹೊರಗಿನ ವ್ಯಕ್ತಿಗೆ ಒಳಗೆ ನೋಡಲು ಸಾಧ್ಯವಾಗುವುದಿಲ್ಲ. ಇದು ಜಪಾನ್‌ ಟಾಯ್ಲೆಟ್‌ ಯೋಜನೆಯ ವಿಶೇಷ ಭಾಗವಾಗಿದೆ.

ಇದನ್ನು ನಿಪ್ಪಾನ್‌ ಫೌಂಡೇಶನ್‌ ಉದ್ಯಾನವನಗಳಲ್ಲಿ ಸ್ಥಾಪಿಸಲಾಗಿದೆ. ಜನರ ಅಗತ್ಯಕ್ಕೆ ತಕ್ಕಂತೆ ಈ ಶೌಚಾಲಯಗಳನ್ನು ಯೆಯೋಗಿ ಫ‌ುಕಮಾಚಿ ಮಿನಿ ಪಾರ್ಕ್‌ ಮತ್ತು ಹರು-ನೋ-ಒಗಾವಾ ಸಮುದಾಯ ಉದ್ಯಾನವನದಲ್ಲಿ ಸ್ಥಾಪಿಸಲಾಗಿದೆ. ಜನರ ಅಗತ್ಯಕ್ಕೆ ಅನುಗುಣವಾಗಿ ಇದನ್ನು ತಯಾರಿಸಲಾಗಿದೆ. ಪಾರದರ್ಶಕ ಗಾಜಿನ ಗೋಡೆಗಳು ಹೊರಗಿನ ಜನರಿಗೆ ಗೋಚರಿಸುತ್ತವೆ ಮತ್ತು ಅದು ಸ್ವಚ್ಛವಾಗಿದೆಯೇ ಎಂದು ನಿರ್ಧರಿಸಲು ಅವರಿಗೆ ಸಹಾಯ ಮಾಡುತ್ತದೆ.

ಅವನು ಶೌಚಾಲಯಕ್ಕೆ ಪ್ರವೇಶಿಸಿ ಬಾಗಿಲು ಮುಚ್ಚಿದ ಬಳಿಕ 4 ಗೋಡೆಗಳು ಅಪಾರದರ್ಶಕವಾಗುತ್ತವೆ. ಟೋಕಿಯೊ ಟಾಯ್ಲೆಟ್‌ ಪ್ರಾಜೆಕ್ಟ್ ವೆಬ್‌ಸೈಟ್‌ ಪ್ರಕಾರ, ಯಾರಾದರೂ ಸಾರ್ವಜನಿಕ ರೆಸ್ಟ್‌ ರೂಂಗೆ ಹೋದಾಗ ಮಾಡುವ ಎರಡು ಮುಖ್ಯ ವಿಷಯಗಳ ನೋಡುತ್ತಾರೆ. ಮೊದಲನೆಯದಾಗಿ ಅದು ಸ್ವಚ್ಛವಾಗಿದೆಯೇ? ಎರಡನೆಯದಾಗಿ ಯಾರಾದರೂ ಒಳಗೆ ಇದ್ದಾರೆಯೇ ಎಂಬುದಾಗಿ ಜನ ತಿಳಿದುಕೊಳ್ಳಲು ಬಯಸುತ್ತಾರೆ. ಈ ಹಿನ್ನೆಲೆಯಲ್ಲಿ ಜಪಾನ್‌ ಈ ಹೊಸ ಮಾದರಿಯ ಟಾಯ್ಲೆಟ್‌ ಅನ್ನು ಪರಿಚಯಿಸಿದೆ.