ವಕ್ಫ್ ಹೆಸರಲ್ಲಿ ಕಾಂಗ್ರೆಸ್‌ ಭೂಮಾಫಿಯಾ: ಶಾಸಕ ಅಭಯ ಪಾಟೀಲ

Team Udayavani, Nov 4, 2024, 2:20 PM IST

■ ಉದಯವಾಣಿ ಸಮಾಚಾರ
ಬೆಳಗಾವಿ: ರೈತರ ಜಮೀನುಗಳಿಗೆ ಕಣ್ಣು ಹಾಕಿರುವ ರಾಜ್ಯ‌ ಸರ್ಕಾರ ಮುಸ್ಲಿಮರನ್ನು ತುಷ್ಟೀಕರಣಗೊಳಿಸಲು ವಕ್ಫ್ ಬೋರ್ಡ್‌ ಹೆಸರಿನಲ್ಲಿ ರೈತರ ಜಮೀನುಗಳನ್ನು ಕಬಳಿಸುತ್ತಿದೆ ಎಂದು ದಕ್ಷಿಣ ಮತಕ್ಷೇತ್ರದ ಶಾಸಕ ಅಭಯ ಪಾಟೀಲ ಆರೋಪಿಸಿದರು.

ನಗರದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಚಿವ ಜಮೀರ್‌ ಅಹ್ಮದ್‌ ಖಾನ್‌ ಅವರು ಎಲ್ಲ ಜಿಲ್ಲಾಧಿಕಾರಿಗಳ ಮೇಲೆ
ಒತ್ತಡ ಹಾಕಿ ಜಮೀನು ಕಬಳಿಸುತ್ತಿದ್ದಾರೆ. ಮಂದಿರ, ಮಠ-ಮಾನ್ಯಗಳ ಜಮೀನನ್ನು ಕಬಳಿಸಿ ವಕ್ಫ್  ಹೆಸರಿಗೆ ನಮೂದು ಮಾಡುವ ಹುನ್ನಾರ ನಡೆದಿದೆ. ಜಮೀರ್‌ ಅಹ್ಮದ ಕೇವಲ ವಕ್ಫ್  ಬಗ್ಗೆ ಮಾತ್ರ ಕೆಲಸ ಮಾಡುವುದರ ಜತೆಗೆ ಹಿಂದೂಗಳಿಗೆ ತೊಂದರೆ ನೀಡುತ್ತಿದ್ದಾರೆ. ವಕ್ಫ್ ಹೆಸರಿನಲ್ಲಿ ಭೂ ಮಾಫಿಯಾ ನಡೆದಿದೆ ಎಂದು ವಾಗ್ಧಾಳಿ ನಡೆಸಿದರು.

ಸುಮಾರು 200 ವರ್ಷಗಳಿಂದ ಇರುವ ದಕ್ಷಿಣ ಕ್ಷೇತ್ರದ ಆನಂದವಾಡಿ, ಮುಚ್ಚಂಡಿ ಮಾಳ, ಮಹಾತ್ಮಾ ಫುಲೆ ರಸ್ತೆಯ ರೈತರಿಗೆ ವಕ್ಫ್ ನೋಟಿಸ್‌ ಜಾರಿ ಮಾಡಲಾಗಿದೆ. ಸುಮಾರು 200ಕ್ಕೂ ಹೆಚ್ಚು ರೈತರಿಗೆ ನೋಟಿಸ್‌ ಬಂದಿದೆ. ಜಮೀನು ಕಬಳಿಸುವ ಭೂಮಾಫಿಯಾ ನಡೆದಿದೆ. ಮುಂದಿನ ದಿನಗಳಲ್ಲಿ ಇಡೀ ಬೆಳಗಾವಿಯನ್ನು ಕಬಳಿಸುವ ಹುನ್ನಾರ ನಡೆದಿದೆ ಎಂದು
ಕಿಡಿಕಾರಿದರು.

ರಾಜ್ಯ ವಕ್ತಾರ ಎಂ.ಬಿ. ಜಿರಲಿ ಮಾತನಾಡಿ, ರೈತರ ಜಮೀನುಗಳಿಗೆ ವಕ್ಫ್  ನೋಟಿಸ್‌ ಬಂದಿರುವುದಲ್ಲದೇ ಸಿಂದಗಿಯ
ವಿರಕ್ತಮಠ 500-600 ವರ್ಷಗಳ ಹಳೆಯ ಮಠ. ಈ ಮಠದ ಆಸ್ತಿಗೆ ವಕ್ಫ್ ಹೆಸರು ಸೇರಿದೆ. ವಿಜಯಪುರದ ಲೋಕೋಪಯೋಗಿ
ಆಸ್ತಿ, ಪಡಗಾಂವ ಗ್ರಾಮದ 57 ಎಕರೆ ಜಮೀನು ಪೈಕಿ ಕೆಲ ಎಕರೆಗೆ ವಕ್ಫ್  ಹೆಸರು ನಮೂದಾಗಿದೆ. ಅನೇಕ ಜಮೀನುಗಳಿಗೆ ವಕ್ಫ್  ಹೆಸರು ಸೇರಿಸುವ ನೋಟಿಸ್‌ ಜಾರಿಗೊಳಿಸಲಾಗುತ್ತಿದೆ. ರಾಜ್ಯ ಸರ್ಕಾರದ ಇಂಥ ವಕ್ಫ್ ನೋಟಿಸ್‌ ನೋಡಿದರೆ ಭೂಮಾಫಿಯಾ ಮಾಡಲಾಗುತ್ತಿದೆ ಎಂದು ಆರೋಪಿಸಿದರು.

ವಕ್ಫ್  ನೋಟಿಸ್‌ ನೀಡುತ್ತಿರುವುದರಿಂದ ರೈತರು ಆಘಾತಕ್ಕೀಡಾಗಿದ್ದಾರೆ. ವಿಜಯಪುರ ಸೇರಿದಂತೆ ವಿವಿಧ ಜಿಲ್ಲೆಗಳ‌ ಅನೇಕ ರೈತರ ಹೆಸರಿನ ಪಹಣಿಯಲ್ಲಿ ವಕ್ಫ್  ಹೆಸರು ನಮೂದು ಆಗುತ್ತಿದೆ. ಜನರು ರೊಚ್ಚಿಗೆದ್ದು ದೀಪಾವಳಿ ಆಚರಿಸದೇ ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಪ್ರತಿಭಟನೆ ನಡೆಸಿದ್ದಾರೆ. ರೈತರು ಭಯಭೀತರಾಗಿದ್ದಾರೆ. ನೋಟಿಸ್‌ ನೀಡಿದ್ದು ಯಾವ ಕಾರಣಕ್ಕೆ ಎಂಬುದನ್ನು ಸರ್ಕಾರ ಸ್ಪಷ್ಟಪಡಿಸಬೇಕು ಎಂದು ಹೇಳಿದರು.

ಮಾಜಿ ಶಾಸಕರಾದ ಅನಿಲ್‌ ಬೆನಕೆ, ಸಂಜಯ ಪಾಟೀಲ, ಮುರುಘೇಂದ್ರಗೌಡ ಪಾಟೀಲ, ಮಲ್ಲಿಕಾರ್ಜುನ ಮಾದಮ್ಮನವರ, ಎಫ್‌.ಎಸ್‌. ಸಿದ್ದನಗೌಡರ, ಹನುಮಂತ ಕೊಂಗಾಲಿ ಇತರರು ಇದ್ದರು.