ದಿಗಂತ್‌-ಐಂದ್ರಿತಾ ಈಗಾಗಲೇ ಪೋಷಕರಾಗಿದ್ದಾರಂತೆ!

Team Udayavani, Feb 23, 2021, 8:55 AM IST

ಕೆಲ ದಿನಗಳ ಹಿಂದಷ್ಟೇ ಸಾಮಾಜಿಕ ಜಾಲತಾಣಗಳಲ್ಲಿ ನಟ ದಿಗಂತ್‌ – ಐಂದ್ರಿತಾ ಜೋಡಿ ಪೋಷಕರಾಗುತ್ತಿದ್ದಾರೆ ಎಂಬ ಸುದ್ದಿ ಜೋರಾಗಿ ಹರಿದಾಡಿತ್ತು. ಈ ಸುದ್ದಿಯ ಬಗ್ಗೆ ದಿಗಂತ್‌ – ಐಂದ್ರಿತಾ ಜೋಡಿ ಕೂಡ ಪ್ರತಿಕ್ರಿಯೆ ಕೊಡದಿದ್ದರಿಂದ, ಕೆಲವರು ಈ ಸುದ್ದಿ ನಿಜವೆಂದು ಭಾವಿಸಿದರೆ, ಇನ್ನು ಕೆಲವರು ಗಾಸಿಪ್‌ ಇರಬಹುದು ಎಂದು ಸುಮ್ಮನಾಗಿದ್ದರು. ಆದರೆ ಇದೀಗ ಈ ಸುದ್ದಿಯ ಬಗ್ಗೆ ಸ್ವತಃ ಐಂದ್ರಿತಾ ಬಾಯಿಬಿಟ್ಟಿದ್ದಾರೆ.

“ನಾನು-ದಿಗಂತ್‌ ಈಗಾಗಲೇ ಅಪ್ಪ-ಅಮ್ಮ ಆಗಿದ್ದೀವಿ’ ಎಂದು ಹೇಳುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ. ಹೌದು, ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿರುವ ನಟಿ ಐಂದ್ರಿತಾ ರೇ, ಒಂದಷ್ಟು ಸ್ಪಷ್ಟನೆ ನೀಡಿದ್ದಾರೆ. “ನಾನು-ದಿಗಂತ್‌ ಮಗುವಿನ ನಿರೀಕ್ಷೆಯಲ್ಲಿದ್ದೇವೆ ಎಂದು ಕೆಲವು ಮಾಧ್ಯಮಗಳಲ್ಲಿ ವರದಿಯಾಗಿದೆ. ಆದರೆ ನಾನು ಮತ್ತು ದಿಗಂತ್‌ ಈಗಾಗಲೇ ಪೋಷಕರಾಗಿದ್ದೇವೆ’ ಎಂದಿದ್ದಾರೆ ಐಂದ್ರಿತಾ ರೇ.

ಇದನ್ನೂ ಓದಿ:ವ್ಹೀಲ್ ಚೇರ್ ಮೇಲೆ ಕಪಿಲ್ ಶರ್ಮಾ…ಫೋಟೊ ಕ್ಲಿಕ್ಕಿಸಿದವರ ವಿರುದ್ಧ ಸಿಡಿಮಿಡಿ

ಅಲ್ಲದೆ “ನಾನು ದಿಗಂತ್‌ ಎರಡು ನಾಯಿಗಳನ್ನು ನಮ್ಮ ಮಕ್ಕಳಂತೆಯೇ (ಡಾಗ್‌ ಪೇರೆಂಟ್ಸ್‌) ಸಾಕುತ್ತಿದ್ದೇವೆ. ಇನ್ನು ಮುಂದೆಯೂ ಹೀಗೆ ಇರಬೇಕು ಎಂದು ಕೊಂಡಿದ್ದೇವೆ’ ಎಂದಿದ್ದಾರೆ ನಟಿ ಐಂದ್ರಿತಾ ರೇ. ಒಟ್ಟಾರೆ ಈ ಮೂಲಕ ಕಳೆದ ಕೆಲದಿನಗಳಿಂದ ದಿಗಂತ್‌ – ಐಂದ್ರಿತಾ ಬಗ್ಗೆ ಹರಿದಾಡುತ್ತಿದ್ದ ಅಂತೆ-ಕಂತೆ ಸುದ್ದಿಗಳಿಗೆ ಸದ್ಯಕ್ಕೆ ತೆರೆ ಬಿದ್ದಂತಾಗಿದೆ.