Gambhir; ಕೊಹ್ಲಿ, ರೋಹಿತ್ ಶರ್ಮ ಟೆಸ್ಟ್ ಭವಿಷ್ಯದ ಬಗ್ಗೆ ಗಂಭೀರ್ ಪ್ರತಿಕ್ರಿಯೆ

Team Udayavani, Jan 5, 2025, 7:29 PM IST

ಸಿಡ್ನಿ : ಬಾರ್ಡರ್ – ಗಾವಸ್ಕರ್ ಸರಣಿಯ ಸೋಲಿನ ಬಳಿಕ ಭಾರತ ತಂಡದ ನಾಯಕ ರೋಹಿತ್ ಶರ್ಮ ಮತ್ತು ಹಿರಿಯ ಬ್ಯಾಟರ್ ವಿರಾಟ್ ಕೊಹ್ಲಿ ಅವರ ಭವಿಷ್ಯದ ಮೇಲೆ ಪ್ರಶ್ನೆಗಳು ಮೂಡಿವೆ. ಮುಖ್ಯ ಕೋಚ್ ಗೌತಮ್ ಗಂಭೀರ್ ಅವರಿಗೆ ಬೆಂಬಲವನ್ನು ನೀಡಿ ಮಾತನಾಡಿದರೂ, ”ದೊಡ್ಡ ನಿರ್ಧಾರ ಅವರಿಗೆ ಬಿಟ್ಟದ್ದು” ಎಂದು ಹೇಳಿಕೆ ನೀಡಿದ್ದಾರೆ.

ಸರಣಿ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಗಂಭೀರ್ ”ಯಾವುದೇ ಆಟಗಾರನ ಭವಿಷ್ಯದ ಬಗ್ಗೆ ನಾನು ಮಾತನಾಡಲಾರೆ. ಇದು ಅವರಿಗೆ ಬಿಟ್ಟದ್ದು.  ನಾನು ಹೇಳುವುದೇನೆಂದರೆ, ಅವರಿಗೆ ಇನ್ನೂ ಹಸಿವು ಇದೆ. ಅವರಿಗೆ ಇನ್ನೂ ಉತ್ಸಾಹವಿದೆ. ಅವರು ಕಠಿನ ಶ್ರಮಪಟ್ಟ ಆಟಗಾರರು. ಆಶಾದಾಯಕವಾಗಿ ಅವರು ಭಾರತೀಯ ಕ್ರಿಕೆಟ್ ಅನ್ನು ಮುಂದಕ್ಕೆ ಕೊಂಡೊಯ್ಯಬಹುದು. ಆದರೆ ಅಂತಿಮವಾಗಿ, ಅವರು ಏನೇ ಯೋಜಿಸಿದರೂ ಭಾರತೀಯ ಕ್ರಿಕೆಟ್‌ನ ಹಿತದೃಷ್ಟಿಯಿಂದ ಅವರು ಯೋಜಿಸುತ್ತಾರೆ ಎಂಬುದು ನಮಗೆಲ್ಲರಿಗೂ ತಿಳಿದಿದೆ” ಎಂದರು.

“ಮೊದಲನೆಯದಾಗಿ, ಪ್ರತಿಯೊಬ್ಬರಿಗೂ ಅವರ ಆಟ ಮತ್ತು ಹಸಿವು ಎಲ್ಲಿದೆ ಎಂದು ತಿಳಿದಿದೆ. ಅವರು ತಮ್ಮ ವೃತ್ತಿಜೀವನದ ಕೊನೆಯಲ್ಲಿ ಒಂದು ಹಂತಕ್ಕೆ ಹೋದರು, ಫಾರ್ಮ್‌ನಿಂದ ಹೊರಗಿದ್ದರು ಆದರೆ ತಂಡ ಗೆಲ್ಲಲು ಹೋರಾಡಿದರು.ಯಾವುದೇ ಕ್ರೀಡೆಗೆ ಮತ್ತು ಯಾವುದೇ ವೃತ್ತಿಗೆ ಇದು ಅತ್ಯಂತ ಮುಖ್ಯವಾದ ವಿಷಯವಾಗಿದೆ. ಇದು ಕ್ರೀಡೆಯ ಬಗ್ಗೆ ಮಾತ್ರವಲ್ಲ” ಎಂದು ಗಂಭೀರ್ ಹೇಳಿದರು.

“ನೀವು ಎಷ್ಟು ಹಸಿದಿದ್ದೀರಿ, ನೀವು ಎಷ್ಟು ಭಾವೋದ್ರಿಕ್ತರಾಗಿದ್ದೀರಿ ಮತ್ತು ನಿಮ್ಮ ಕೊಡುಗೆಯಿಂದ ತಂಡವು ಮುಂದುವರಿಯುತ್ತಿದೆಯೇ ಅಥವಾ ಇಲ್ಲವೇ ಎಂಬುದು ವಿಚಾರ. ಏಕೆಂದರೆ ಅಂತಿಮವಾಗಿ, ಇದು ನನ್ನ ತಂಡ ಅಥವಾ ನಿಮ್ಮ ತಂಡವಲ್ಲ, ಇದು ದೇಶದ ತಂಡವಾಗಿದೆ. ನಾನು ಹೇಳಿದಂತೆ ನಾನು ನಂಬುತ್ತೇನೆ. ನಮ್ಮ ಡ್ರೆಸ್ಸಿಂಗ್ ರೂಮ್ ನಲ್ಲಿ ತುಂಬಾ ಪ್ರಾಮಾಣಿಕ ಆಟಗಾರರಿದ್ದಾರೆ, ಅವರು ಎಷ್ಟು ಹಸಿದು ಕೊಂಡಿದ್ದಾರೆ ಎಂದು ತಿಳಿದಿದೆ” ಎಂದು ಗಂಭೀರ್ ಹೇಳಿದರು.

“ನನ್ನ ದೊಡ್ಡ ಜವಾಬ್ದಾರಿ ಏನೆಂದರೆ, ನಾನು ಡ್ರೆಸ್ಸಿಂಗ್ ರೂಮ್ ನಲ್ಲಿ ಎಲ್ಲರಿಗೂ ನ್ಯಾಯಯುತವಾಗಿರಬೇಕು. ಒಬ್ಬ ಅಥವಾ ಇಬ್ಬರು ವ್ಯಕ್ತಿಗಳಿಗೆ ಮಾತ್ರವಲ್ಲ. ನಾನು ಕೇವಲ ಎರಡು ಅಥವಾ ಮೂರು ವ್ಯಕ್ತಿಗಳಿಗೆ ನ್ಯಾಯಯುತವಾಗಿದ್ದರೆ ಉಳಿದವರೆಲ್ಲರ ಕೆಲಸಕ್ಕೆ ಅಪ್ರಾಮಾಣಿಕನಾಗಿರುತ್ತೇನೆ ಹಾಗಾಗಿ ಅದು ಇನ್ನೂ ಪದಾರ್ಪಣೆ ಮಾಡದ ಆಟಗಾರನಾಗಿರಲಿ ಅಥವಾ 100 ಟೆಸ್ಟ್ ಪಂದ್ಯಗಳನ್ನು ಆಡಿದ ಆಟಗಾರನಾಗಿರಲಿ, ನನ್ನ ಕೆಲಸದಲ್ಲಿ ನನ್ನ ಸರಳ ಗುರಿ ಸಂಪೂರ್ಣವಾಗಿ ನ್ಯಾಯೋಚಿತ ಮತ್ತು ಎಲ್ಲರಿಗೂ ಸಮಾನ.” ಎಂದು ಗಂಭೀರ್ ಹೇಳಿದರು.