INDvsBAN; ದ್ರಾವಿಡ್‌ಗಿಂತ ಗಂಭೀರ್‌ ತರಬೇತಿ ಶೈಲಿ ಭಿನ್ನ: ರೋಹಿತ್‌

Team Udayavani, Sep 18, 2024, 6:42 AM IST

ಚೆನ್ನೈ: ಗೌತಮ್‌ ಗಂಭೀರ್‌ ನೇತೃತ್ವದ ತರಬೇತುದಾರರ ಶೈಲಿ ರಾಹುಲ್‌ ದ್ರಾವಿಡ್‌ ತರಬೇತುದಾರರ ಶೈಲಿಗಿಂತ ಭಿನ್ನವಾಗಿದೆ ಎಂದು ಭಾರತ ಕ್ರಿಕೆಟ್‌ ತಂಡದ ನಾಯಕ ರೋಹಿತ್‌ ಶರ್ಮ ಹೇಳಿದ್ದಾರೆ. ಕಳೆದ ಜುಲೈನಲ್ಲಿ ಪುರುಷರ ತಂಡಕ್ಕೆ ಗಂಭೀರ್‌ ಮುಖ್ಯ ಕೋಚ್‌ ಆಗಿ ಆಯ್ಕೆಯಾದ ಬಳಿಕ ರೋಹಿತ್‌, ಇದೇ ಮೊದಲ ಬಾರಿಗೆ ಗಂಭೀರ್‌ ತರಬೇತಿ ನೀಡುತ್ತಿರುವ  ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ.

ಸೆ.19ರಿಂದ ಚೆನ್ನೈಯಲ್ಲಿ ಆರಂಭವಾಗಲಿರುವ ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್‌ ಸರಣಿಗೆ ಸಂಬಂಧಿಸಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ರೋಹಿತ್‌, ರಾಹುಲ್‌ ಭಾಯ್‌, ವಿಕ್ರಮ್‌ ರಾಥೋಡ್‌ ಮತ್ತು ಪರಾಸ್‌ ಮಾಂಬ್ರೆ ಇವರದ್ದು ವಿಭಿನ್ನ ತಂಡ. ಆದರೆ ಹೊಸ ಕೋಚಿಂಗ್‌ ಬಳಗದಲ್ಲಿ ಒಪ್ಪಿಕೊಳ್ಳಬೇಕಾದ ವಿಚಾರವೆಂದರೆ, ಅದು ವಿಭಿನ್ನ ದೃಷ್ಟಿಕೋನವನ್ನು ಹೊಂದಿದೆ. ನಮ್ಮಲ್ಲಿ ಒಳ್ಳೆಯ ಹೊಂದಾಣಿಕೆಯಿದೆ. ಹೀಗಾಗಿ ಸಮಸ್ಯೆ ಉಂಟಾಗಿಲ್ಲ ಎಂದರು.

ಇನ್ನು ಬಾಂಗ್ಲಾ ವಿರುದ್ಧದ ಸರಣಿಯ ಬಗ್ಗೆ ಪ್ರತಿಕ್ರಿಯಿಸಿದ ರೋಹಿತ್‌, ಪ್ರತೀ ತಂಡವೂ ಕೂಡ ಭಾರತವನ್ನು ಸೋಲಿಸಲು ಬಯಸುತ್ತದೆ. ಅವರ ಪಾಲಿಗದು ಹೆಮ್ಮೆ. ಭಾರತೀಯ ತಂಡ ವಿಶ್ವದ ಬಹುತೇಕ ಎಲ್ಲ ಅಗ್ರ ತಂಡಗಳೊಂದಿಗೆ ಪಂದ್ಯ ಆಡಿದೆ. ಹೀಗಾಗಿ ಬಾಂಗ್ಲಾ ಸರಣಿಗಾಗಿ ನಾವು ಸಂಪೂರ್ಣವಾಗಿ ವಿಭಿನ್ನ ಕಾರ್ಯತಂತ್ರ ರೂಪಿಸುವ ಅಗತ್ಯವೇನಿಲ್ಲ ಎಂದರು.