H.D.Kote: ಹುಲಿ ದಾಳಿಗೆ ಹೊಂಚು: ಕೂದಲೆಳೆ ಅಂತರದಲ್ಲಿ ಪಾರಾದ ಯುವಕ!

Team Udayavani, Nov 21, 2024, 11:53 PM IST

ಎಚ್‌.ಡಿ. ಕೋಟೆ: ಪಟ್ಟಣ ಸಮೀಪದ ಶಾಂತಿಪುರ ಗ್ರಾಮದಲ್ಲಿ ಜಮೀನಿನಲ್ಲಿದ್ದ ಯುವಕನ ಮೇಲೆ ಹುಲಿ ದಾಳಿಗೆ ಮುಂದಾದ ಘಟನೆ ನಡೆದಿದೆ.

ಹುಲಿಯನ್ನು ಕಂಡ ಯುವಕನ ಚೀರಾಟ ಕೇಳಿದ ಕುಟುಂಬಸ್ಥರು, ಅಕ್ಕಪಕ್ಕದ ಜಮೀನಿನ ಜನರು ಸ್ಥಳಕ್ಕೆ ದೌಡಾಯಿಸುತ್ತಿದ್ದಂತೆ ಹುಲಿ ಪರಾರಿಯಾಗಿದ್ದು, ಯುವಕ ಕೂದಲೆಳೆಯ ಅಂತರದಲ್ಲಿ ಸಾವಿನ ದವಡೆಯಿಂದ ಪಾರಾಗಿದ್ದಾನೆ.

ಚಿತ್ತಧಾಮ ಆಸ್ಪತ್ರೆ ಸಮೀಪದ ಜಮೀನಿನಲ್ಲಿ ವಾಸವಾಗಿರುವ ರವಿನಾಯ್ಕ ಅವರ ಮಗ ರಘು ತಮ್ಮ ಜಮೀನಿನಲ್ಲಿ ಬೆಳೆದಿರುವ ಬಾಳೆ ಬೆಳೆಗೆ ನೀರುಣಿಸಲು ಪೈಪ್‌ಗ್ಳನ್ನು ಜೋಡಿಸುತ್ತಿದ್ದ ವೇಳೆ ಹುಲಿ ದಾಳಿ ಯತ್ನಿಸಿತು. ಕೂಡಲೇ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಕರೆ ಮಾಡಿದ್ದು, ಸ್ಥಳಕ್ಕೆ ಬಂದ ಅರಣ್ಯಾಧಿಕಾರಿಗಳು, ಸಿಬಂದಿ ಶೋಧ ನಡೆಸಿದರಾದರೂ ಹುಲಿ ಮತ್ತೆ ಕಣ್ಣಿಗೆ ಬಿದ್ದಿಲ್ಲ.