ತೆರೆಗೆ ಬಂದ ‘ಹೊಸ ದಿನಚರಿ’

Team Udayavani, Dec 23, 2022, 10:43 AM IST

ಈಗಾಗಲೇ ಬಿಡುಗಡೆಯಾಗಿರುವ ಟ್ರೇಲರ್‌ ಮತ್ತು ಹಾಡುಗಳ ಮೂಲಕ ಸಿನಿಪ್ರಿಯರ ಗಮನ ಸೆಳೆಯಲು ಯಶಸ್ವಿಯಾಗಿರುವ “ಹೊಸ ದಿನಚರಿ’ ಚಿತ್ರ ಇಂದು ತೆರೆಗೆ ಬರುತ್ತಿದೆ.

ಬಾಬು ಹಿರಣ್ಣಯ್ಯ, ಅರುಣಾ ಬಾಲರಾಜ್‌, ದೀಪಕ್‌ ಸುಬ್ರಹ್ಮಣ್ಯ, ಚೇತನ್‌ ವಿಕ್ಕಿ, ಮಂದಾರ ಬಟ್ಟಲಹಳ್ಳಿ ಕವಿತಾಳ್‌, ಬೇಬಿ ಮನಿನಿ, ವರ್ಷ ಸುಸಾನ ಕುರಿಯನ್‌, ಸುಪ್ರೀತ್‌ ಗೌಡ, ಶ್ರೀ ಪ್ರಿಯಾ, ವಿವೇಕ್‌ ದೇವ್‌ ಮೊದಲಾದವರು “ಹೊಸ ದಿನಚರಿ’ ಸಿನಿಮಾದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

“ಪ್ರತಿಯೊಬ್ಬರ ಜೀವನದಲ್ಲೂ ಬರುವ ಪ್ರೀತಿ ಮತ್ತು ಅದರ ಆಯಾಮಗಳ ಪ್ರಾಮುಖ್ಯತೆಯನ್ನು ಸಿನಿಮಾದಲ್ಲಿ ಹೇಳಲಾಗಿದೆ. ನಾಲ್ಕು ಸಮಾನಾಂತರ ಕಥೆಗಳು ಒಂದಕ್ಕೊಂದು ಬೆಸೆದುಕೊಂಡು ಸಿನಿಮಾ ಸಾಗುತ್ತದೆ. ಬದುಕಿನ ವಿವಿಧ ಹಂತಗಳನ್ನು ಸಿನಿಮಾ ತೆರೆದಿಡುತ್ತದೆ. ಗಂಡು-ಹೆಣ್ಣಿನ ಸಂಬಂಧಗಳು, ನಿಷ್ಕಲ್ಮಶ ಪ್ರೀತಿಯ ಬಗ್ಗೆ ಈ ಸಿನಿಮಾ ಹೇಳುತ್ತದೆ. ಕಥಾಹಂದರ ತುಂಬಾ ಫ್ರೆಶ್‌ ಆಗಿದ್ದು, ಇದೊಂದು ಫೀಲ್‌ ಗುಡ್‌ ಸಿನಿಮಾವಾಗಲಿದೆ’ ಎಂಬುದು “ಹೊಸ ದಿನಚರಿ’ ಚಿತ್ರತಂಡದ ಭರವಸೆಯ ಮಾತು. “ಡೀಸ್‌ ಫಿಲಂಸ್‌’ ಮತ್ತು “ಶೂಲಿನ್‌ ಮೀಡಿಯಾ ಹೌಸ್‌’ ಸಹಯೋಗದಲ್ಲಿ “ಹೊಸ ದಿನಚರಿ’ ಚಿತ್ರ ನಿರ್ಮಾಣವಾಗಿದೆ.

ಈ ಹಿಂದೆ “ಅಯನ’ ಚಿತ್ರವನ್ನು ನಿರ್ದೇಶಿಸಿದ್ದ ಗಂಗಾಧರ ಸಾಲಿಮಠ ಮತ್ತು ಮೃತ್ಯುಂಜಯ್‌ ಶುಕ್ಲ, ಅಲೋಕ್‌ ಚೌರಾಸಿಯ ಜಂಟಿಯಾಗಿ ನಿರ್ಮಿಸಿರುವ “ಹೊಸ ದಿನಚರಿ’ ಚಿತ್ರಕ್ಕೆ ಕೀರ್ತಿ ಶೇಖರ್‌ ಮತ್ತು ವೈಶಾಕ್‌ ಪುಷ್ಪಲತ ನಿರ್ದೇಶನ ಮಾಡಿದ್ದಾರೆ. ಚಿತ್ರಕ್ಕೆ ರಾಕಿ ಛಾಯಾಗ್ರಹಣ, ರಂಜಿತ್‌ ಸೇತು ಸಂಕಲನವಿದೆ.  ಚಿತ್ರದ ಹಾಡುಗಳಿಗೆ ವೈಶಾಕ್‌ ವರ್ಮ ಸಾಹಿತ್ಯ ಮತ್ತು ಸಂಗೀತ ಸಂಯೋಜಿಸಿದ್ದು, ಅಶ್ವಿ‌ನ್‌ ಹೇಮಂತ್‌ ಹಿನ್ನಲೆ ಸಂಗೀತ ನೀಡಿದ್ದಾರೆ.