L&T; ನೌಕರರು ರವಿವಾರವೂ ಕೆಲಸ ಮಾಡಬೇಕು, ವಾರಕ್ಕೆ 90 ಗಂಟೆ ಕೆಲಸ!!

Team Udayavani, Jan 9, 2025, 7:37 PM IST

ಮುಂಬಯಿ: ಇನ್ಫೋಸಿಸ್ ಸಹ-ಸಂಸ್ಥಾಪಕ ನಾರಾಯಣ ಮೂರ್ತಿ ಅವರು ವಾರಕ್ಕೆ 70 ಗಂಟೆಗಳ ಕಾಲ ಕೆಲಸ ಮಾಡಬೇಕು ಎಂಬ ಸಲಹೆ ಭಾರೀ ಚರ್ಚೆಗೊಳಗಾಗಿ ಕೆಲಸ-ಜೀವನದ ಸಮತೋಲನದ ಕುರಿತು ಚರ್ಚೆಗೆ ಉತ್ತೇಜನ ನೀಡಿದ ಕೆಲ ತಿಂಗಳುಗಳ ಬಳಿಕ L&T ಚೇರ್ಮನ್ ಎಸ್ಎನ್ ಸುಬ್ರಹ್ಮಣ್ಯನ್ ಅವರು ”ವಾರಕ್ಕೆ 90 ಗಂಟೆಗಳ ಕೆಲಸ ಮಾಡಬೇಕು” ಎಂದು ಪ್ರತಿಪಾದಿಸಿದ್ದಾರೆ.

ಇತ್ತೀಚೆಗೆ ಉದ್ಯೋಗಿಗಳೊಂದಿಗೆ ಸಂವಾದದಲ್ಲಿ, ”ಸಾಧ್ಯವಾದರೆ ರವಿವಾರದಂದು ಸಹ ಕೆಲಸ ಮಾಡಬೇಕು” ಎಂದು ಹೇಳಿದರು. ಕಂಪನಿಯ ಆರು ದಿನಗಳ ಕೆಲಸದ ವಾರದ ನೀತಿಯ ಬಗ್ಗೆ ಸುಬ್ರಹ್ಮಣ್ಯನ್ ಅವರನ್ನು ಪ್ರಶ್ನಿಸಿದಾಗ ಈ ಹೇಳಿಕೆಯನ್ನು ನೀಡಿದ್ದಾರೆ.

”ನಿಮ್ಮ ಹೆಂಡತಿಯನ್ನು ನೀವು ಎಷ್ಟು ಸಮಯ ನೋಡುತ್ತೀರಿ”ಎಂದು ಎಸ್ಎನ್ ಸುಬ್ರಹ್ಮಣ್ಯನ್  ವಿವಾದಕ್ಕೂ ಗುರಿಯಾಗಿದ್ದಾರೆ. ಉದ್ಯೋಗಿಗಳನ್ನು ಮನೆಯಲ್ಲಿ ಕಡಿಮೆ ಸಮಯ ಮತ್ತು ಹೆಚ್ಚಿನ ಸಮಯವನ್ನು ಕಚೇರಿಯಲ್ಲಿ ಕಳೆಯಲು ಒತ್ತಾಯಿಸಿದ್ದಾರೆ.

” ರವಿವಾರದಂದು ನಿಮಗೆ ಕೆಲಸ ಮಾಡಲು ಸಾಧ್ಯವಾದರೆ, ನಾನು ಹೆಚ್ಚು ಸಂತೋಷಪಡುತ್ತೇನೆ, ಏಕೆಂದರೆ ನಾನೂ ರವಿವಾರ ಕೆಲಸ ಮಾಡುತ್ತೇನೆ” ಎಂದು ಸುಬ್ರಹ್ಮಣ್ಯನ್ ಹೇಳಿರುವ ವಿಡಿಯೋ ರೆಡ್ಡಿಟ್‌ನಲ್ಲಿ ಪ್ರಸಾರವಾಗುವ ತ್ತಿರುವುದು ಕಂಡುಬಂದಿದೆ.