Mangaluru: ಕಾರ್ನಾಡಿನಲ್ಲಿ ನಡೆದ ಕೊ*ಲೆ ಪ್ರಕರಣ ಇಬ್ಬರಿಗೆ ಜೀವಾವಧಿ ಶಿಕ್ಷೆ

Team Udayavani, Dec 21, 2024, 12:25 AM IST

ಮೂಲ್ಕಿ/ಮಂಗಳೂರು: ಮೂಲ್ಕಿ ಠಾಣಾ ವ್ಯಾಪ್ತಿಯ ಕಾರ್ನಾಡು ಗ್ರಾಮದ ವನಭೋಜನ ಬಳಿ ನಡೆದ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿ 6ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ಇಬ್ಬರು ಆರೋಪಿಗಳಿಗೆ ಜೀವಾವಧಿ ಶಿಕ್ಷೆ, ದಂಡ ವಿಧಿಸಿದೆ.

ಆರೋಪಿಗಳಾದ ಸನ್ನಿಬಾಬು (24) ಮತ್ತು ಗಲ್ಲುರಾಮ ಆಲಿಯಾಸ್‌ ಸಚಿನ್‌ (24) ಜೀವಾವಧಿ ಶಿಕ್ಷೆಗೆ ಒಳಪಟ್ಟವರು. ಕಾರ್ಮಿಖ ಶರಣಪ್ಪ (31) ಮೃತರಾದವರು. ಬಿಹಾರದ ನಿವಾಸಿಗಳಾದ ಸನ್ನಿಬಾಬು ಮತ್ತು ನವೀನ್‌ ಕುಮಾರ್‌ ಹಾಗೂ ಕೊಲೆಯಾದ ಶರಣಪ್ಪ ಕಾರ್ನಾಡು ಬಳಿಯ ಕೆ.ಎಸ್‌.ರಾವ್‌ ನಗರದಲ್ಲಿ ವಾಸವಾಗಿದ್ದರು.

2020ರ ಜ. 30ರಂದು ರಾತ್ರಿ ಇವರ ನಡುವೆ ಕ್ಷುಲ್ಲಕ ಕಾರಣಕ್ಕೆ ಗಲಾಟೆ ನಡೆದು ಅನಂತರ ವನಭೋಜನ ಸಮೀಪದ ಕಂಡಲಚ್ಚಿಲ್‌ ಬಳಿ ಶರಣಪ್ಪ ಅವರನ್ನು ಕೊಲೆ ಮಾಡಿದ್ದರು.

ಪ್ರಕರಣದ ವಿಚಾರಣೆ ನಡೆಸಿದ 6ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶ ಕಾಂತರಾಜು ಎಸ್‌.ವಿ. ಅವರು ವಾದ ಪ್ರತಿವಾದವನ್ನು ಆಲಿಸಿ, ಆರೋಪ ಸಾಬೀತಾಗಿದೆ ಎಂದು ತೀರ್ಮಾನಿಸಿ ಜೀವಾವಧಿ ಶಿಕ್ಷೆ ಮತ್ತು 10 ಸಾವಿರ ರೂ. ದಂಡ, ಕಲಂ 341ರಡಿ 1 ತಿಂಗಳ ಕಾರಾಗೃಹವಾಸ ಮತ್ತು 500 ರೂ. ದಂಡ ವಿಧಿಸಿ ಶುಕ್ರವಾರ ಆದೇಶ ಹೊರಡಿಸಿದ್ದಾರೆ.

ಪ್ರಕರಣದ ಪರವಾಗಿ ಕೆಲವು ಸಾಕ್ಷಿದಾರರ ವಿಚಾರಣೆಯನ್ನು ಸರಕಾರಿ ಅಭಿಯೋಜಕರಾದ ಜ್ಯೋತಿ ಪ್ರಮೋದ್‌ ನಾಯಕ್‌ ಮತ್ತು ಬಿ. ಶೇಖರ ಶೆಟ್ಟಿ ಅವರು ನಡೆಸಿದ್ದು, ಸರಕಾರಿ ಅಭಿಯೋಜಕ ಚೌಧರಿ ಮೋತಿಲಾಲ್‌ ಅವರು ಉಳಿದ ಸಾಕ್ಷಿದಾರರ ವಿಚಾರಣೆ ನಡೆಸಿ ವಾದ ಮಂಡಿಸಿದ್ದರು.