Kannada News

ಮೋದಿ ಗೆಲ್ಲಿಸಲು ಚೌಕೀದಾರರಾಗೋಣ

Team Udayavani, Apr 1, 2019, 12:32 PM IST

ದಾವಣಗೆರೆ: ಸ್ವಾತಂತ್ರ್ಯ ಬಂದ 70 ವರ್ಷಗಳ ನಂತರ ಮೊಟ್ಟ ಮೊದಲ ಬಾರಿಗೆ ದೇಶ, ರಕ್ಷಣೆ, ಭಾರತ ಮಾತೆಗಾಗಿ ನಡೆಯುತ್ತಿರುವ ಚುನಾವಣೆಯಲ್ಲಿ ನರೇಂದ್ರ ಮೋದಿ ಅವರು ಮತ್ತೂಮ್ಮೆ ಪ್ರಧಾನಿಯಾಗಲು ಎಲ್ಲರೂ ಚೌಕೀದಾರ್‌ರಾಗಿ ಕೆಲಸ ಮಾಡಬೇಕು ಎಂದು ವಿಧಾನ ಪರಿಷತ್‌ ಸದಸ್ಯ ಆಯನೂರು ಮಂಜುನಾಥ್‌ ಮನವಿ ಮಾಡಿದ್ದಾರೆ.

ಭಾನುವಾರ ಬಿಜೆಪಿ ಚುನಾವಣಾ ಕಾರ್ಯಾಲಯದ ಆವರಣದಲ್ಲಿ ನಡೆದ ಮೈ ಭಿ ಚೌಕಿದಾರ್‌… ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಈಗ ನಡೆಯುತ್ತಿರುವಂತಹ ಚುನಾವಣೆ ಜಿ.ಎಂ. ಸಿದ್ದೇಶ್ವರ್‌ ಅವರನ್ನ ಮತ್ತೆ ಸಂಸತ್‌ ಸದಸ್ಯರನ್ನಾಗಿ ಮಾಡುವ, ನರೇಂದ್ರ ಮೋದಿ ಅವರನ್ನ ಮತ್ತೆ ಪ್ರಧಾನ ಮಂತ್ರಿಯನ್ನಾಗಿ ಮಾಡುವ ಚುನಾವಣೆ ಅಲ್ಲ. ಭಾರತಮಾತೆಯ ಘನತೆ, ಗೌರವವನ್ನು ಇನ್ನೂ ಎತ್ತರಕ್ಕೆ ಮುಟ್ಟಿಸುವಂತಹ ಭಾರತಮಾತೆ ಮತ್ತು ದೇಶಕ್ಕಾಗಿ ನಡೆಯುವ ಚುನಾವಣೆ ಎಂದು ವಿಶ್ಲೇಷಿಸಿದರು.

ಅತ್ಯಂತ ಬಡ ಕುಟುಂದ ಹಿನ್ನೆಲೆಯಿಂದ, ಹಿಂದುಳಿದ ಜಾತಿಗಳಲ್ಲಿ ತೀರಾ ಹಿಂದುಳಿದ, ಅವರಿವರ ಮನೆಯಲ್ಲಿ ಮನೆ ಕೆಲಸ ಮಾಡುತ್ತಿದ್ದ ಬಡ ತಾಯಿಯ ಮಗನಾಗಿರುವ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಈ ದೇಶದ ಬಡವರು,

ಹಿಂದುಳಿದವರ ಪ್ರತಿನಿಧಿ. ಬಡವರಿಗೆ ಸ್ಫೂರ್ತಿ ಆಗಿದ್ದಾರೆ. ಅಂತಹವರನ್ನ ಮತ್ತೆ ಪ್ರಧಾನಿಯನ್ನಾಗಿ ಮಾಡುವ ಚೌಕೀದಾರರಾಗಬೇಕು ಎಂದು ತಿಳಿಸಿದರು.

ದುನಿಯಾ ಝುಕ್ತಾ ಹೈ… ಝುಕಾನಾವಾಲಾ ಚಾಹಿಯೇ… ಎನ್ನುವಂತೆ ಸಾಮಾನ್ಯ ಬಡ ಕುಟುಂಬದಿಂದ ಬಂದಿರುವ ಅಸಾಮಾನ್ಯ ನಾಯಕ ನರೇಂದ್ರಮೋದಿ ಅವರೇ ಮತ್ತೆ ಐದು ವರ್ಷ ಪ್ರಧಾನಿಯಾದರೆ ಇಡೀ ಜಗತ್ತನ್ನೇ ಬಗ್ಗಿಸಿ ದೇಶವನ್ನು

ಮುನ್ನಡೆಸುವಂತಹ ಮಹಾನ್‌ ನಾಯಕರಾಗುತ್ತಾರೆ. ದಾವಣಗೆರೆ ಲೋಕಸಭಾ ಕ್ಷೇತ್ರದಿಂದ ಜಿ.ಎಂ. ಸಿದ್ದೇಶ್ವರ್‌ ಅವರನ್ನ ಗೆಲ್ಲಿಸುವ ಮೂಲಕ ಮೋದಿ ಅವರು ಮತ್ತೂಮ್ಮೆ ಪ್ರಧಾನಿಯಾಗಲು ಎಲ್ಲರೂ ಸಹಕರಿಸಬೇಕು ಎಂದು ಮನವಿ ಮಾಡಿದರು.

ಚಿಕ್ಕನಾಯಕನಹಳ್ಳಿ ಕ್ಷೇತ್ರದ ಶಾಸಕ ಜಿ.ಸಿ. ಮಾಧುಸ್ವಾಮಿ ಮಾತನಾಡಿ, ಭಾರತದ ಇತಿಹಾಸದಲ್ಲೇ ಮತದಾರರು ಮತ್ತು ಜನಪ್ರತಿನಿಧಿಗಳ ನಡುವೆ ಆಡಳಿತ, ಸಮಸ್ಯೆ, ಪರಿಹಾರ ಕುರಿತಂತೆ ಮೊಟ್ಟ ಮೊದಲ ಬಾರಿಗೆ ಚರ್ಚೆ ಆರಂಭವಾಗಿದೆ. ಆ ಚರ್ಚೆ ಮುಂದುವರೆಯಬೇಕು ಎನ್ನುವುದಾದರೆ ಈ ದೇಶಕ್ಕೆ ಮೋದಿ ಅವರು ತೀರಾ ಅನಿವಾರ್ಯ. ಮತ್ತೆ ಪ್ರಧಾನಿ ಆಗುವುದು ಮೋದಿ ಅವರಿಗೆ ಅನಿವಾರ್ಯ ಇದೆಯೋ ಇಲ್ಲವೋ ಗೊತ್ತಿಲ್ಲ. ಆದರೆ, ಅವರು ಮತ್ತೂಮ್ಮೆ ಪ್ರಧಾನಿ ಆಗುವುದು ದೇಶಕ್ಕೆ ಅನಿವಾರ್ಯ ಎಂದರು.

ದೇಶದ ಜನರನ್ನ ಸಂಕಷ್ಟದಿಂದ ಪಾರು ಮಾಡುವ, ದೇಶಕ್ಕೆ ರಕ್ಷಣೆ ಕೊಡುವ, ಅಭ್ಯುದಯದ ಬಗ್ಗೆ ಚಿಂತನೆ ಮಾಡುವ, ದೇಶದ ಜನರ ಸ್ವಾಭಿಮಾನ, ಪ್ರತಿಷ್ಠೆ, ಗೌರವ ಉಳಿಸಿ, ಬೆಳೆಸುವ ಶಕ್ತಿ ಹೊಂದಿರುವ ಅಮೂಲ್ಯವಾದ ವಸ್ತು ಎಂದರೆ ನರೇಂದ್ರ ಮೋದಿ. ನಾಲ್ಕು ಎತ್ತು, ಕೋಣ ಸೇರಿಕೊಂಡು ಅಧಿಕಾರ ಮಾಡುವ ಪ್ರಯತ್ನ ಮಾಡುತ್ತಿವೆ ಎಂದು ಮಹಾಗಟಬಂಧನ್‌ ಟೀಕಿಸಿದ ಅವರು, ನಾಲ್ಕು ಎತ್ತು, ಕೋಣ ಸೇರಿಕೊಂಡು ಅಧಿಕಾರ ಮಾಡಿದರೆ ನೀರಿನ ಕಡೆ, ಇಲ್ಲ ಬದುವಿನ ಕಡೆ ಎಳೆಯುತ್ತವೆ. ಅದಕ್ಕೆ ಅವಕಾಶ ಕೊಡದೆ ಸಶಕ್ತ, ಸಬಲ, ದೇಶಕ್ಕಾಗಿ ದುಡಿಯುವ ಎತ್ತು ನಮ್ಮ ಮುಂದೆ ಇದೆ. ಅಂತಹ ಬಲಶಾಲಿ ಎತ್ತಿನಿಂದ ಮತ್ತೂಮ್ಮೆ ಕೆಲಸ ಪಡೆಯುವಂತಾಗಬೇಕು ಎಂದು ಮನವಿ ಮಾಡಿದರು. ಈಗ ನಡೆಯುತ್ತಿರುವಂತಹ ಚುನಾವಣೆಯಲ್ಲಿ ಜಿ.ಎಂ. ಸಿದ್ದೇಶ್ವರ್‌ ಅವರನ್ನ ಮತ್ತೆ ಸಂಸದ ಹಾಗೂ ಮೋದಿ ಅವರನ್ನೇ ಪ್ರಧಾನಿಯನ್ನಾಗಿ ಮಾಡಬೇಕು. ಒಂದೊಮ್ಮೆ ಮೋದಿ ಅವರಿಗೆ ಹಿನ್ನಡೆಯಾದರೆ ಅದು ರಾಷ್ಟ್ರಕ್ಕೆ ಅಪಮಾನ ಎಂದು ತಿಳಿಯಬೇಕು ಎಂದರು.

ಈಗ ನಡೆಯುತ್ತಿರುವ ಚುನಾವಣೆ ಜಿ.ಎಂ. ಸಿದ್ದೇಶ್ವರ್‌ ಅವರ ಚುನಾವಣೆ ಅಲ್ಲ. ನಮ್ಮ-ನಿಮ್ಮ ಎಲ್ಲರ ಚುನಾವಣೆ. ಕರ್ನಾಟಕದಲ್ಲಿ 22 ಕ್ಕೂ ಹೆಚ್ಚು ಸ್ಥಾನ ಗೆಲ್ಲಿಸುವ ಮೂಲಕ ದಕ್ಷಿಣ ಭಾರತದ ಹೆಬ್ಟಾಗಿಲು ತೆಗೆಯುವ ಕೆಲಸ ಮಾಡಬೇಕು ಎಂದು ಮನವಿ ಮಾಡಿದರು.

ಸಂಸದ ಜಿ.ಎಂ. ಸಿದ್ದೇಶ್ವರ್‌ ಮಾತನಾಡಿ, ಅತೀ ಕಡು ಬಡತನದಲ್ಲಿ ಹುಟ್ಟಿರುವ ನರೇಂದ್ರ ಮೋದಿ ಅವರು ಎಂದಿಗೂ ಅಣ್ಣ-ತಮ್ಮ, ಅಕ್ಕ-ತಂಗಿಯರಿಗೆ ಅಧಿಕಾರ ಬಯಸದೆ ದೇಶದ 130 ಕೋಟಿ ಜನರನ್ನು ಅಣ್ಣ-ತಮ್ಮ. ಅಕ್ಕ-ತಂಗಿ ಎಂದು ಭಾವಿಸಿ ದಿನದ 18 ಗಂಟೆ ಕೆಲಸ ಮಾಡುವ, ಒಂದು ದಿನವೂ ರಜೆ ತೆಗೆದುಕೊಳ್ಳದೆ ಕೆಲಸ ಮಾಡುವ, ದೇಶವನ್ನು ರಕ್ಷಿಸುವ ಸಮರ್ಥ ನಾಯಕರಾಗಿದ್ದಾರೆ. ಅಂತಹ ಮಹಾನ್‌ ನಾಯಕನನ್ನು ಮತ್ತೂಮ್ಮೆ ಪ್ರಧಾನಿಯನ್ನಾಗಿ ಮಾಡಬೇಕು ಎಂದು ಮನವಿ ಮಾಡಿದರು.

ಪ್ರಧಾನಿ ನರೇಂದ್ರ ಮೋದಿ ದೇಶದ ರಕ್ಷಣೆ ಮಾಡುವಂತಹ ಸಮರ್ಥ ಚೌಕಿದಾರ್‌. ಆ ಚೌಕಿದಾರ್‌ ಮತ್ತೆ ಪ್ರಧಾನಿ ಆಗಲು ನನ್ನನ್ನು ಮತ್ತೂಮ್ಮೆ ಗೆಲ್ಲಿಸಬೇಕು ಎಂದು ಮನವಿ ಮಾಡಿದರು. ಶಾಸಕರಾದ ಎಸ್‌.ಎ. ರವೀಂದ್ರನಾಥ್‌,

ಎಂ.ಪಿ. ರೇಣುಕಾಚಾರ್ಯ, ಎಸ್‌.ವಿ. ರಾಮಚಂದ್ರ, ಪ್ರೊ| ಎನ್‌. ಲಿಂಗಣ್ಣ, ಮಾಜಿ ಶಾಸಕರಾದ ಎಂ. ಬಸವರಾಜನಾಯ್ಕ, ಬಿ.ಪಿ. ಹರೀಶ್‌, ಜಿಪಂ ಅಧ್ಯಕ್ಷೆ ಶೈಲಜಾ ಬಸವರಾಜ್‌, ಉಪಾಧ್ಯಕ್ಷ ಸುರೇಂದ್ರನಾಯ್ಕ, ಬಿಜೆಪಿ ಜಿಲ್ಲಾ ಅಧ್ಯಕ್ಷ ಯಶವಂತರಾವ್‌ ಜಾಧವ್‌ ಇತರರು ಇದ್ದರು.

ಎಚ್‌. ಆನಂದಪ್ಪ ಸೇರ್ಪಡೆ ಕಳೆದ ವಿಧಾನ ಸಭಾ ಚುನಾವಣೆಯಲ್ಲಿ ಮಾಯಕೊಂಡ ಮೀಸಲು ಕ್ಷೇತ್ರದಿಂದ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಎಚ್‌. ಆನಂದಪ್ಪ ತಮ್ಮ ಅಪಾರ ಬೆಂಬಲಿಗರೊಂದಿಗೆ ಮತ್ತೆ ಬಿಜೆಪಿಗೆ ಸೇರ್ಪಡೆಗೊಂಡರು.

4 ರಂದು ನಾಮಪತ್ರ

ಏ.4 ರಂದು ತಾವು ನಾಮಪತ್ರ ಸಲ್ಲಿಸುವುದಾಗಿ ಸಂಸದ ಜಿ.ಎಂ. ಸಿದ್ದೇಶ್ವರ್‌ ತಿಳಿಸಿದರು. ಅಂದು ಬೆಳಗ್ಗೆ 10.30ಕ್ಕೆ ನಗರ ದೇವತೆ ಶ್ರೀ ದುರ್ಗಾಂಬಿಕಾ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸಿ, ಮೆರವಣಿಗೆ ಮೂಲಕ ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ 11.30ಕ್ಕೆ ನಾಮಪತ್ರ ಸಲ್ಲಿಸಲಾಗುವುದು. ಬಿಜೆಪಿ ರಾಜ್ಯ ಅಧ್ಯಕ್ಷ ಬಿ.ಎಸ್‌. ಯಡಿಯೂರಪ್ಪ, ಶಾಸಕರಾದ ಕೆ.ಎಸ್‌. ಈಶ್ವರಪ್ಪ, ಬಿ. ಶ್ರೀರಾಮುಲು, ಎಂ. ಚಂದ್ರಪ್ಪ, ಪೂರ್ಣಿಮಾ ಶ್ರೀನಿವಾಸ್‌ ಹಾಗೂ ಜಿಲ್ಲೆಯ ಎಲ್ಲಾ ಬಿಜೆಪಿ ಶಾಸಕರು, ಮಾಜಿ ಶಾಸಕರು, ಮುಖಂಡರು, ಗಣ್ಯರು ಭಾಗವಹಿಸುವರು ಎಂದು ತಿಳಿಸಿದರು.