MUDA: 20 ವರ್ಷದಿಂದ ಶಾಸಕರಾಗಿ, ಮುಡಾ ಸದಸ್ಯರಾಗಿದ್ದೀರಿ, ಯಾಕೀ ಅವ್ಯವಸ್ಥೆ?: ಸಿಎಂ

Team Udayavani, Jan 11, 2025, 3:22 AM IST

ಬೆಂಗಳೂರು: ಹದಿನೈದು ಇಪ್ಪತ್ತು ವರ್ಷಗಳಿಂದ ಶಾಸಕರಾಗಿದ್ದೀರಿ, ಮೈಸೂರು ನಗರಾಭಿವೃದ್ಧಿ ಪ್ರಾಧಿಕಾರ (ಮುಡಾ)ದ ಸದಸ್ಯರಾಗಿದ್ದೀರಿ. ಆದರೂ ಯಾಕೆ ಇಷ್ಟೆಲ್ಲಾ ಅವ್ಯವಸ್ಥೆ ಆಯಿತು ಎಂದು ಶಾಸಕರಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಪ್ರಶ್ನಿಸಿದರು.

ಶುಕ್ರವಾರ ಗೃಹಕಚೇರಿ ಕೃಷ್ಣಾದಲ್ಲಿ ಮೈಸೂರು ಜಿಲ್ಲಾ ಅಭಿವೃದ್ಧಿ ಕುರಿತು ಸಭೆ ನಡೆಸಿದ ಸಿಎಂ ಎದುರು ಶಾಸಕರಾದ ತನ್ವೀರ್‌ ಸೇಠ್‌ ಹಾಗೂ ಜಿ.ಟಿ. ದೇವೇಗೌಡ ಅವರು ಮುಡಾ ಅನುಮೋದಿತ ಬಡಾವಣೆಗಳಲ್ಲಿನ ಅವ್ಯವಸ್ಥೆಗಳ ಕುರಿತು ಗಮನ ಸೆಳೆದರು. ಬಿಜೆಪಿ ಶಾಸಕ ಶ್ರೀವತ್ಸ ಮಾತನಾಡಿ, ನನ್ನ ಕೃಷ್ಣರಾಜ ಕ್ಷೇತ್ರವೊಂದರಲ್ಲೇ ಮುಡಾದಿಂದ ಅನುಮೋದನೆಗೊಂಡಿರುವ 106 ಖಾಸಗಿ ಬಡಾವಣೆಗಳಿವೆ ಎಂದರು.

ಮಧ್ಯಪ್ರವೇಶಿಸಿದ ಸಿಎಂ, ಅಲ್ಲ ಎಲ್ಲ ಪಕ್ಷದ ಶಾಸಕರು ನೀವುಗಳೇ 15-20 ವರ್ಷದಿಂದ ಅಲ್ಲಿ ಶಾಸಕರೂ ಆಗಿದ್ದೀರಿ, ಮುಡಾ ಸದಸ್ಯರೂ ಆಗಿದ್ದೀರಿ. ಆದರೂ ಈ ರೀತಿ ಏಕಾಗುತ್ತಿದೆ? ಇಷ್ಟೆಲ್ಲಾ ಅವ್ಯವಸ್ಥೆ ಹೇಗಾಯಿತು? ಇದಕ್ಕೇಕೆ ಅವಕಾಶ ಕೊಟ್ಟಿರಿ ಎಂದು ಪ್ರಶ್ನಿಸಿದರು. ಶಾಸಕರು ಮರುಮಾತನಾಡದೆ ಸುಮ್ಮನಾದರು. ಕೊನೆಗೆ ಈ ಬಗ್ಗೆ ಪ್ರತ್ಯೇಕ ಸಭೆ ನಡೆಸುವುದಾಗಿ ಸಿಎಂ ಭರವಸೆ ನೀಡಿದರು.