Vasundhara Raje ಬೆಂಗಾವಲು ವಾಹನ ಪಲ್ಟಿ; ನಾಲ್ವರು ಪೊಲೀಸರಿಗೆ ಗಾಯ

Team Udayavani, Dec 22, 2024, 8:47 PM IST

ಪಾಲಿ: ರಾಜಸ್ಥಾನದ ಮಾಜಿ ಮುಖ್ಯಮಂತ್ರಿ ವಸುಂಧರಾ ರಾಜೆ ಅವರ ಬೆಂಗಾವಲು ಪೊಲೀಸ್ ವಾಹನ ಪಲ್ಟಿಯಾದ ಪರಿಣಾಮ ನಾಲ್ವರು ಪೊಲೀಸರು ಗಾಯಗೊಂಡಿದ್ದಾರೆ. ಪಾಲಿ ಜಿಲ್ಲೆಯ ರೋಹತ್ ಮತ್ತು ಪನಿಹಾರಿ ಕ್ರಾಸ್‌ರೋಡ್ ಬಳಿ ರವಿವಾರ (ಡಿ 22)ಅಪಘಾತ ಸಂಭವಿಸಿದೆ.

ಪೊಲೀಸ್ ವಾಹನದ ಚಾಲಕ ಮೋಟಾರ್ ಸೈಕಲ್ ಸವಾರನಿಗೆ ಢಿಕ್ಕಿ ಹೊಡೆಯುವುದನ್ನು ತಪ್ಪಿಸಲು ಯತ್ನಿಸಿದ್ದರಿಂದ ವಾಹನ ನಿಯಂತ್ರಣ ತಪ್ಪಿ ಪಲ್ಟಿಯಾಗಿದೆ. ಸಚಿವ ಓಟರಾಮ್ ದೇಸಿ ಅವರ ತಾಯಿ ನಿಧನ ಹೊಂದಿದ್ದರು, ಅವರಿಗೆ ಸಾಂತ್ವನ ಹೇಳಲು ಜಿಲ್ಲೆಯ ಬಾಲಿ ಗ್ರಾಮಕ್ಕೆ ವಸುಂಧರಾ ರಾಜೆ ಅವರು ತೆರಳುತ್ತಿದ್ದರು.

“ಏಳು ಮಂದಿ ಪೊಲೀಸರು ಕಾರಿನಲ್ಲಿ ಪ್ರಯಾಣಿಸುತ್ತಿದ್ದರು. ಅವರಲ್ಲಿ ನಾಲ್ವರಿಗೆ ಗಾಯಗಳಾಗಿವೆ” ಎಂದು ಪಾಲಿ ಎಸ್ಪಿ ಚುನಾ ರಾಮ್ ಜತ್ ತಿಳಿಸಿದ್ದಾರೆ. ವಸುಂಧರಾ ರಾಜೆ ಅವರು ಘಟನೆ ನಡೆದ ಕೂಡಲೇ ಕಾರಿನಿಂದಿಳಿದು ಎಲ್ಲ ಗಾಯಾಳುಗಳ ಯೋಗಕ್ಷೇಮ ವಿಚಾರಿಸಿದರು.