Virat Kohli Birthday: ಮರಳುಶಿಲ್ಪದಲ್ಲಿ ಅರಳಿದ ಕೊಹ್ಲಿ

Team Udayavani, Nov 5, 2024, 10:05 PM IST

Virat Kohli Birthday: Kohli blossomed in sand sculpture

ಪುರಿ: ಮಂಗಳವಾರ 36ನೇ ವರ್ಷಕ್ಕೆ ಕಾಲಿಟ್ಟ ಖ್ಯಾತ ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಅವರಿಗೆ ಕಲಾವಿದ ಸುದರ್ಶನ್‌ ಪಟ್ನಾಯಕ್‌ ಅವರು ಮರಳುಶಿಲ್ಪದ ಮೂಲಕ ಗೌರವ ಸಲ್ಲಿಸಿದ್ದಾರೆ. ಒಡಿಶಾದ ಪುರಿ ಕಡಲ ಕಿನಾರೆಯಲ್ಲಿ ಅವರು 4 ಟನ್‌ ಮರಳಿನಿಂದ, 5 ಅಡಿ ಎತ್ತರದ ಕೊಹ್ಲಿ ಕಲಾಕೃತಿಯನ್ನು ರಚಿಸಿ ಎಲ್ಲರ ಗಮನ ಸೆಳೆದಿದ್ದಾರೆ.

ಸಹ ಕಲಾವಿದರು ಹಾಗೂ ಸ್ಥಳೀಯ ವಿದ್ಯಾರ್ಥಿಗಳ ನೆರವಿನಿಂದ ಪಟ್ನಾಯಕ್‌ ಅವರು ಈ ಆಕರ್ಷಕ ಕಲಾಕೃತಿಯನ್ನು ರಚಿಸಿದ್ದಾರೆ. “ಹ್ಯಾಪ್ಪಿ ಬರ್ತ್‌ಡೇ ಟು ದ ಲೆಜೆಂಡ್ರಿ ವಿರಾಟ್‌ ಕೊಹ್ಲಿ. ನಿಮ್ಮ ಉತ್ಸಾಹ, ಬದ್ಧತೆ ಮತ್ತು ಅಸಾಮಾನ್ಯ ಸಾಧನೆ ಇದೇ ರೀತಿ ಮುಂದುವರಿಯಲಿ. ವಿಶ್ವದ ಲಕ್ಷಾಂತರ ಮಂದಿಗೆ ಸ್ಫೂರ್ತಿ ತುಂಬುತ್ತಿರಲಿ. ಮುಂದಿನ ವರ್ಷದಲ್ಲಿ ಯಶಸ್ಸು ಮತ್ತು ಸಂತಸವೇ ನಿಮ್ಮದಾಗಲಿ ಎಂದು ನಮ್ಮ ಮರಳುಶಿಲ್ಪ ಕಲಾವಿದರ ತಂಡ ಹಾರೈಸುತ್ತದೆ’ ಎಂದು ಸುದರ್ಶನ್‌ ಪಟ್ನಾಯಕ್‌ “ಎಕ್ಸ್‌’ನಲ್ಲಿ ಚಿತ್ರ ಸಹಿತ ಪೋಸ್ಟ್‌ ಮಾಡಿದ್ದಾರೆ.

ಆರ್‌ಸಿಬಿ ಶುಭಾಶಯ

ಇದೇ ವೇಳೆ ರಾಯಲ್‌ ಚಾಲೆಂಜರ್ ಬೆಂಗಳೂರು ತಂಡ, ಬಿಸಿಸಿಐ ಕೂಡ ವಿರಾಟ್‌ ಕೊಹ್ಲಿ ಅವರಿಗೆ ಜನ್ಮದಿನದ ಶುಭ ಸಂದೇಶಗಳನ್ನು ರವಾನಿಸಿದೆ.

“ಬೆಂಗಳೂರಿನ ದತ್ತುಪುತ್ರ, ಭಾರತ ಕಂಡ ಶ್ರೇಷ್ಠ ಕ್ರಿಕೆಟಿಗರಲ್ಲಿ ಒಬ್ಬರಾದ, ನಮ್ಮೆಲ್ಲರ ಪ್ರೀತಿಯ ಕಿಂಗ್‌ ವಿರಾಟ್‌ ಕೊಹ್ಲಿ ಅವರಿಗೆ ಜನ್ಮದಿನದ ಶುಭಾಶಯಗಳು’ ಎಂದು ಆರ್‌ಸಿಬಿ ಇನ್‌ಸ್ಟಾಗ್ರಾಮ್‌ನಲ್ಲಿ ಹರ್ಷ ವ್ಯಕ್ತಪಡಿಸಿದೆ.

“538 ಅಂತಾರಾಷ್ಟ್ರೀಯ ಪಂದ್ಯಗಳು (+), 27,134 ಅಂತಾರಾಷ್ಟ್ರೀಯ ರನ್ಸ್‌ (+), 2011ರ ಏಕದಿನ ವಿಶ್ವಕಪ್‌ ವಿಜೇತ, 2013ರ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ವಿಜೇತ, 2024ರ ಟಿ20 ವಿಶ್ವಕಪ್‌ ಗೆಲುವಿನ ತಂಡದ ಸಾಧಕನಿಗೆ, ವಿಶ್ವದ ಅತ್ಯುತ್ತಮ ಬ್ಯಾಟ್ಸ್‌ಮನ್‌ ಆಗಿರುವ ಕೊಹ್ಲಿಗೆ ವೆರಿ ಹ್ಯಾಪ್ಪಿ ಬರ್ತ್‌ಡೇ’ ಎಂದು ಬಿಸಿಸಿಐ ಟ್ವೀಟ್‌ ಮಾಡಿ ಶುಭ ಹಾರೈಸಿದೆ.