Upside Down House: ಇಂಗ್ಲೆಂಡ್‌ನ‌ಲ್ಲೊಂದು ತಲೆಕೆಳಗಾದ ವಿಚಿತ್ರ ಮನೆ

Team Udayavani, Sep 3, 2024, 7:03 PM IST

ಭೂಮಿಯ ಮೇಲಿರುವ ಯಾವುದೇ ಒಂದು ಸಹಜವಾದ ವಸ್ತು ತಲೆಕೆಳಗಾದರೆ ಅದು ವಿಚಿತ್ರ ಮತ್ತು ಕುತೂಹಲಕಾರಿ ಸಂಗತಿಯಾಗಿಬಿಡುತ್ತದೆ. ಇಂಗ್ಲೆಂಡ್‌ನ‌ ಬ್ರೆ çಟೋನ್‌ ನಗರದಲ್ಲಿಯೂ ಇದೇ ರೀತಿಯ ಒಂದು ವಿಸ್ಮಯವಿದೆ. ಅಲ್ಲಿ ಅಪ್‌ಸೆçಡ್‌ ಡೌನ್‌ ಆಗಿರುವ ಮನೆಯೊಂದು ಎಲ್ಲರ ಗಮನವನ್ನು ತನ್ನತ್ತ ಸೆಳೆಯುತ್ತಿದೆ. ಇಲ್ಲಿ ಎಲ್ಲವೂ ತಲೆಕೆಳಗಾಗಿರುವುದರಿಂದ ಇದಕ್ಕೆ ಬ್ರೈಟೊನ್‌ಹೌಸ್‌ ಎಂದು ಹೆಸರಿಡಲಾಗಿದೆ. ಇಲ್ಲಿಗೆ ಭೇಟಿ ನೀಡಿದ ಎಲ್ಲರೂ ಆಶ್ಚರ್ಯ ಚಕಿತರಾಗುತ್ತಿದ್ದಾರೆ. ಇದೊಂದು ಪ್ರವಾಸಿಗರ ಸೆಲ್ಫಿಸ್ಪಾಟ್‌ ಆಗಿಯೂ ಸದ್ಯ ಹೆಸರುವಾಸಿಯಾಗಿದೆ.

ಈ ಬಂಗಲೆಯಲ್ಲಿರುವ ವಿವಿಧ ರೀತಿಯ ಪೀಠೊಪಕರಣಗಳು ಬಂಗಲೆಯ ತಾರಸಿಯ ಒಳಮೈಯಲ್ಲಿದ್ದು, ಇದರೊಳಗಿನ ಶೌಚಾಲಯವೂ ತಲೆಕೆಳಗಾಗಿದೆ. ಇಲ್ಲಿಗೆ ಭೇಟಿ ನೀಡುವ ಜನರು ಇಲ್ಲಿನ ವಿಚಿತ್ರ ದೃಶ್ಯಗಳನ್ನು ತಮ್ಮ ಕೆಮರಾ ಕಣ್ಣಿನಲ್ಲಿ ಖಂಡಿತವಾಗಿ ಸೆರೆಹಿಡಿದುಕೊಳ್ಳುತ್ತಾರೆ. ಈ ಮನೆಯೊಳಗೆ ಪ್ರವೇಶಿಸಿದರೆ ಎಲ್ಲವೂ ಅಪ್‌ಸೆçಡ್‌ ಡೌನ್‌ ಆಗಿದ್ದು, ಒಂದು ಹೊಸ ಅನುಭವವನ್ನು ನೀಡುತ್ತದೆ.

ಇಂಗ್ಲೆಂಡ್‌ ದೇಶದಲ್ಲಿ ಒಟ್ಟು ಇಂತಹ ನಾಲ್ಕು ಮನೆಗಳಿದ್ದು, ಒಂದೇ ಕಂಪನಿಯು ಇಂಥ ವಿಚಿತ್ರವಾದ ಮನೆಗಳನ್ನು ವಿಭಿನ್ನ ಪರಿಕಲ್ಪನೆಯೊಂದಿಗೆ ಸೃಷ್ಟಿಸಿದೆ. ಇಂಗ್ಲೆಂಡ್‌ನ‌ ದಕ್ಷಿಣ ಕರಾವಳಿಯ ಕಡಲ ಕಿನಾರೆ ರೆಸಾರ್ಟ್‌ ಬೌರ್ನ್ ಮೌತ್‌ನಲ್ಲಿ ದಿ ಟ್ರಯಾಂಗಲ್‌ ಅನ್ನು 2018ರಲ್ಲಿ ಕಂಪೆನಿಯು ನಿರ್ಮಿಸಿದ್ದು, ಇಂತಹ ಇನ್ನೆರಡು ಮನೆಗಳನ್ನು ಎಸೆಕ್ಸ್ ನ ಲೇಕ್‌ಸೈಡ್‌ ಮತ್ತು ಡೋರ್ಸೆಟ್‌ನ ಅಡ್ವೆಂಚರ್‌ ವಂಡರ್‌ ಲ್ಯಾಂಡ್‌ನ‌ಲ್ಲಿ ನಿರ್ಮಿಸಲಾಗಿದೆ.‌

ಪ್ರತೀ ಋತುವಿನಲ್ಲೂ ಈ ಮನೆಗಳ ಒಳ ಮತ್ತು ಹೊರ ವಿನ್ಯಾಸ ಹಾಗೂ ಬಣ್ಣದಲ್ಲಿ ಬದಲಾವಣೆಗಳನ್ನು ಮಾಡಲಾಗುತ್ತಿದ್ದು ಚಳಿಗಾಲದಲ್ಲಿ ಇದು ಹಿಮದ ಬಣ್ಣದ ಮನೆಯಾಗಿ ಬದಲಾಗಿ ಇದರಲ್ಲಿ ತಲೆಕೆಳಗಾದ ಸಾರಂಗಗಳು ಬಣ್ಣ ಬಣ್ಣದ ದೀಪಗಳಿಂದ ಮಿನುಗುತ್ತಿರುತ್ತವೆ. ಹಬ್ಬಗಳ ಸಂದರ್ಭಗಳಲ್ಲಂತೂ ವಿಭಿನ್ನವಾದ ಒಳಾಂಗಣ ವಿನ್ಯಾಸವನ್ನು ನಿರ್ಮಿಸಲಾಗುತ್ತದೆ. ದಿ ಬ್ರೆ çಟೋನ್‌ ಹೌಸ್‌ ಬ್ರಿಟಿಷ್‌ ಏರ್ವೇಸ್‌ನ -360 ವೀಕ್ಷಣಾ ಗೋಪುರದ ಬಳಿಯಿರುವುದು ಇಲ್ಲಿನ ಮತ್ತೂಂದು ವಿಶೇಷ.

ಅಪ್‌ಸೆçಡ್‌ ಡೌನ್‌ ಹೌಸ್‌ನ ಸಿಇಒ ಆಗಿರುವ ಟಾಮ್‌ ಡಿರ್ಸೆ ಅವರು ಹೇಳುವಂತೆ ಈ ಮನೆಯನ್ನು ಒಂದಕ್ಕೊಂದು ಕೋನಗಳಲ್ಲಿ ಸರಳವಾಗಿ ಒಟ್ಟಿಗೆ ಹೊಂದಿಕೊಳ್ಳುವ ಮರದ ಫ‌ಲಕಗಳಿಂದ ನಿರ್ಮಿಸಲಾಗಿದೆ. 2013ರಲ್ಲಿ ಮೈನರ್‌ ಆನ್‌ ದಿ ಮೂನ್‌ ಎಂಬ ಯೋಜನೆಯಲ್ಲಿ ಕೆಲಸ ಮಾಡಿದ್ದ ಅಲೆಕ್ಸ್‌ ಚಿನ್ನೆಕ್‌ ಎಂಬಾತನೇ ಈ ತಲೆಕೆಳಗಾದ ಮನೆಯನ್ನೂ ನಿರ್ಮಿಸಿದ ಕಲಾವಿದ.

ಈ ಮನೆಯೊಳಗೆ ಕಾಲಿಟ್ಟರೆ ತಲೆ ತಿರುಗುತ್ತದೆ. ಈ ಮನೆಯನ್ನು ಹೊರಗಿನಿಂದ ನೋಡಿದಾಗ ಮನೆ ಸಂಪೂರ್ಣವಾಗಿ ತನ್ನ ಛಾವಣಿಯ ಮೇಲೆ ನಿಂತಂತೆ ಕಾಣುತ್ತದೆ. ಸಂದರ್ಶಕರಿಗೆ ಪಕ್ಕದ ಬಾಗಿಲಿನ ಮೂಲಕ ಮನೆಯೊಳಗೆ ಪ್ರವೇಶಿಸಲು ಅವಕಾಶ ನೀಡಲಾಗುತ್ತದೆ. ಈ ಮನೆಯೊಳಗೆ ಕಚೇರಿ, ವಾಸಿಸುವ ಸ್ಥಳ, ಮಲಗುವ ಕೋಣೆ ಮತ್ತು ಸ್ನಾನಗೃಹ ಸೇರಿದಂತೆ ಹಲವಾರು ಕೊಠಡಿಗಳಿವೆ. ಮನೆಯೊಳಗೆ ನೈಜ ಪೀಠೊಪಕರಣಗಳು ಮತ್ತು ವಿವಿಧ ಉಪಕರಣಗಳನ್ನು ಅಳವಡಿಸಲಾಗಿದೆ. ಆದರೆ ಅವೆಲ್ಲವೂ ತಲೆಕೆಳಗಾಗಿ ಅಳವಡಿಸಲಾಗಿದೆ. ಕೋಣೆಗಳ ನಿರ್ಮಾಣಕ್ಕೆ ಹೆಚ್ಚಾಗಿ ಮರಗಳನ್ನೇ ಬಳಸಲಾಗಿದೆ. ಈ ಮನೆಗಳ ಪ್ರವೇಶಕ್ಕೆ ಸಂದರ್ಶಕರೊಬ್ಬರಿಗೆ 4 ಪೌಂಡ್‌ (ಭಾರತೀಯ ಹಣದಲ್ಲಿ ರೂ.344/-) ದರವನ್ನು ನಿಗದಿಪಡಿಸಲಾಗಿದೆ.

-ಸಂತೋಷ್‌ ರಾವ್‌ ಪೆರ್ಮುಡ

ಬೆಳ್ತಂಗಡಿ