UV Fusion: ಕೊಂಕು ಹುಡುಕುವ ಮುನ್ನ…

Team Udayavani, Jan 12, 2025, 3:28 PM IST

ಅಂದೊಂದು ದಿನ ಅಜ್ಜಿ ಹೇಳಿದ ಕಥೆ ಇಂದು ನಿಜ ಅನಿಸುತ್ತಿದೆ. ಸಮುದ್ರ ತೀರದಲ್ಲೊಂದು ಏಡಿ ನಡೆದುಕೊಂಡು ಹೊರಟಿತ್ತಂತೆ. ತನ್ನ ಹೆಜ್ಜೆ ಗುರುತುಗಳನ್ನು ನೋಡಿ ಖುಷಿಪಡುತಿದ್ದ ಏಡಿಯ ಹೆಜ್ಜೆಗಳನ್ನು ಸಮುದ್ರದ ಅಲೆಗಳು ಅಳಿಸಿ ಬಿಡುತಿತ್ತು. ಇದರಿಂದ ಕೆಲವೇ ಕ್ಷಣಗಳಲ್ಲಿ ಆ ಏಡಿಯ ಖುಷಿ ಮರೆಯಾಗುತ್ತಿತ್ತು. ಪ್ರತಿ ಬಾರಿ ಇದನ್ನು ನೋಡಿ ಬೇಸತ್ತ ಏಡಿ “ನೀನೊಬ್ಬ ನನ್ನ ಉತ್ತಮ ಸ್ನೇಹಿತನಾಗಿದ್ದರೂ ಹೀಗೇಕೆ ಹೆಜ್ಜೆ ಗುರುತು ಅಳಿಸಿ ನನ್ನ ಖುಷಿಯನ್ನು ಕಿತ್ತುಕೊಳ್ಳುವ ಕೆಲಸ ಮಾಡುತ್ತೀಯ’ ಎಂದು ಸಮುದ್ರವನ್ನು ಕೇಳಿತಂತೆ.

ಅದಕ್ಕೆ ಉತ್ತರಿಸಿದ ಸಮುದ್ರ ಮೀನು ಹಿಡಿಯುವವರು ಅದನ್ನು ನೋಡಿದರೆ, ಅವರು ನಿನ್ನನ್ನು ಹಿಡಿಯಬಹುದು ಆಗ ನಿನ್ನ ಈ ಸ್ವತ್ಛಂದ ಆನಂದ ಸಂಪೂರ್ಣವಾಗಿ ಹೋಗಿಬಿಡಬಹುದು ಎಂಬ ಭಯಕ್ಕೆ ಹಾಗೆ ಮಾಡುವೆ ಎಂದು ಹೇಳಿದಾಗ ಆಗ ಏಡಿ ತನ್ನ ತಪ್ಪಿನ ಅರಿವಾಗಿ ತಲೆಬಾಗಿತಂತೆ.

ಈಗ ನಡೆಯುತ್ತಿರುವುದು ಹಾಗೆಯೇ ಅಲ್ಲವೆ? ಹಿರಿಯರ ಬುದ್ಧಿ ಮಾತುಗಳು, ಶಿಕ್ಷಕರ ಸಲಹೆಗಳು ಕಿರಿಯರಾದ ನಮಗೆ ರುಚಿಸುವುದೇ ಇಲ್ಲ. ಯಾವುದಾದರು ಕೆಲಸದಲ್ಲಿ ಮಾಡಿದ ತಪ್ಪನ್ನು ಎತ್ತಿ ತೋರಿಸಿದಾಗ, ಮನೆಯಿಂದಾಚೆ ಹೆಜ್ಜೆ ಇಡುವಾಗ ಅವರ ಬುದ್ಧಿ ಮಾತುಗಳು ಕಿವಿಗೆ ಬಂದು ತಾಕಿದಾಗ ನನ್ನ ಪ್ರತಿ ವಿಷಯದಲ್ಲೂ ಇವರದೊಂದು ಕೊಂಕು ಇದ್ದದ್ದೇ ಎಂದು ಗೊನುಗುತ್ತ ಅವರ ಮಾತನ್ನು ತಲೆಗೆ ಹಾಕಿಕೊಳ್ಳದೆ ನಮ್ಮಿಷ್ಟದಂತೆ ಇರಲು ಬಯಸುತ್ತೇವೆ.

ಅದರಿಂದ ಅನಾಹುತಗಳಾದ ಮೇಲೆ ಹೀಗೆ ಮಾಡಬಾರದಿತ್ತೇನೋ ಎಂದು ದುಃಖಪಡುತ್ತೇವೆ. ಸಮಸ್ಯೆ ಎದುರಾಗುವ ಮೊದಲೇ ಅವರ ಸಲಹೆ ಪಡೆದಿದ್ದರೆ ಅನಾಹುತ ಆಗುತ್ತಿರಲಿಲ್ಲ ಅಲ್ಲವೆ! ಅರ್ಥವಾಗುವ ಮುಂಚೆಯೆ ಸಮಯ ಮೀರಿ ಹೋಗಿರುತ್ತದೆ.

ಸಮಾಜದಲ್ಲಿಯೂ ಹೀಗೆ ಹೆಚ್ಚಿನ ಜನರು ಒಳ್ಳೆಯ ಉದ್ದೇಶಗಳನ್ನು ಅರ್ಥ ಮಾಡಿಕೊಳ್ಳುವುದೇ ಇಲ್ಲ. ಅವರ ಮಾತು, ಕೆಲಸದ ಬಗ್ಗೆ ಅನುಮಾನ ಪಡುತ್ತಲೇ ಇರುತ್ತಾರೆ. ಇನ್ನು ನಾವು ಮಾಡುವ ಕಾರ್ಯದಲ್ಲಿ ಅನುಭವಿಗಳು ಸಲಹೆ ಸೂಚನೆ ಕೊಡಲು ಬಂದಾಗ ಅದನ್ನು ಕೇಳುವ ತಾಳ್ಮೆಯೆ ಇರುವುದಿಲ್ಲ. ತಮ್ಮದೆ ನಿಜ ಎನ್ನುವಂತೆ ವರ್ತಿಸುತ್ತಾರಲ್ಲ ಎಂದು ಕೋಪಿತರಾಗುತ್ತೇವೆ. ಹಾಗೆ ಅಂದುಕ್ಕೊಳುವ ಬದಲಾಗಿ ಯಾಕೆ ಈ ರೀತಿ ಮಾಡಿರಬೇಕು ಎಂದು ತಾಳ್ಮೆಯಿಂದ ಯೋಚಿಸಿದರೆ ಮೇಲಿನ ಕಥೆಯಲ್ಲಿ ಏಡಿ ಮಾಡಿದ ತಪ್ಪನ್ನು ನಮ್ಮ ಜೀವನದಲ್ಲಾಗದಂತೆ ತಡೆಯಬಹುದು.

ಎಲ್ಲ ವಿಷಯಗಳ ಹಿಂದೆಯೂ ಕೆಟ್ಟ ಉದ್ದೇಶಗಳೇ ಇರುವುದಿಲ್ಲ. ಕುಟುಂಬ ಆಗಲಿ, ಸ್ನೇಹಿತರಾಗಲಿ ಯಾವತ್ತೂ ಕೆಟ್ಟದನ್ನು ಬಯಸುವುದಿಲ್ಲ. ಮನುಷ್ಯ ಮನುಷ್ಯನ ಮೇಲೆ ನಂಬಿಕೆ ಇಟ್ಟು ಯೋಚಿಸಿ, ಪರಿಶೀಲಿಸಿ, ತಾಳೆ ವಹಿಸಿ ಮಾತನಾಡಬೇಕು. ಹಾಗೆ ನಂಬಿಕೆ ಇಟ್ಟವರೊಂದಿಗೆ ಪ್ರತಿಯೊಬ್ಬರು ವಿಶ್ವಾಸವನ್ನು ಉಳಿಸಿಕೊಳ್ಳುವ ಕೆಲಸ ಮಾಡಬೇಕು. ಏಕೆಂದರೆ ಈ ಮೌಲ್ಯಗಳು ಮನುಷ್ಯನಲ್ಲಿಯಷ್ಟೇ ಅಲ್ಲವೆ ಕಾಣುವುದು. ಅದಕ್ಕೆ ಅವುಗಳಿದ್ದರಷ್ಟೇ ಅಲ್ಲವೆ ನಾವುಗಳು ಮನುಷ್ಯರೆನೆಸಿಕೊಳ್ಳುವುದು…

–ಗಂಗಾ ನೀಲಪ್ಪ ಅಮಾತೆಪ್ಪನವರ

ಬಸವೇಶ್ವರ ಕಲಾ ಮಹಾವಿದ್ಯಾಲಯ, ಬಾಗಲಕೋಟೆ