UV Fusion: ದುಡುಕಿನ ತೊಡಕುಗಳಿಗೆ ತಾಳ್ಮೆಯೇ ಮದ್ದು

Team Udayavani, Jan 14, 2025, 9:08 PM IST

ತಾಳ್ಮೆ ಇರಲಿ. ಅವಸರ ಬೇಡ. ತಾಳ್ಮೆಯಿಂದ ಎಂಥಹ ಯುದ್ಧವನ್ನು ಬೇಕಾದರು ಗೆಲ್ಲಬಹುದು. ಆದರೆ ತಾಳ್ಮೆಯನ್ನು ಮೈಗೂಡಿಸಿಕೊಳ್ಳುವುದು ಸುಲಭಸಾಧ್ಯವಲ್ಲ. ಅದೊಂದು ರೀತಿಯ ತಪಸ್ಸು.

ಸಾಮಾನ್ಯವಾಗಿ ಗೊಂದಲಕ್ಕೆ ಒಳಗಾದಾಗ ಗುರುಹಿರಿಯರು ಹೇಳುವ ಮಾತೆಂದರೆ ತಾಳ್ಮೆ ಇರಲಿ, ಯಾವ ಕಾರಣಕ್ಕೂ ದುಡುಕದಿರಿ. ವಾಸ್ತವವಾಗಿ, ತಾಳ್ಮೆ ಪ್ರತಿಯೊಬ್ಬರೂ ಹೊಂದಿರಬೇಕಾದ ಸದ್ಗುಣ. ಇದು ವ್ಯಕ್ತಿಯನ್ನು ಉತ್ತಮನನ್ನಾಗಿಸಿ ಉನ್ನತ ಸ್ಥಾನಕ್ಕೆ ಕೊಂಡೊಯ್ದು ನಿಲ್ಲಿಸುತ್ತದೆ.

ಜೀವನದಲ್ಲಿ ತಾಳ್ಮೆಯ ಪ್ರಾಮುಖ್ಯತೆಯನ್ನು ಒತ್ತಿಹೇಳುವ ಕೆಲವು ಅಂಶಗಳನ್ನು ಗಮನಿಸೋಣ. ತಾಳ್ಮೆ ಪ್ರತಿಭಾ ಸಾಧನೆಯ ರೂಪಕ. ಪ್ರತಿಭೆ ಮತ್ತು ಸಾಮರ್ಥ್ಯಗಳನ್ನು ನಿಜವಾದ ಸಾಧನೆಯಾಗಿ ರೂಪಿಸಲು, ಕಲೆಯನ್ನು ಕರಗತ ಮಾಡಿಕೊಳ್ಳಲು ಅಥವಾ ದ್ವಿಗುಣವಾಗಲು ನಿರಂತರ ಪ್ರಯತ್ನದ ಅಗತ್ಯವಿದೆ. ನಿಮ್ಮ ಕನಸುಗಳನ್ನು ಸಾಧಿಸಲು, ಸವಾಲುಗಳನ್ನು ಜಯಿಸುವ ಉತ್ಸಾಹ ಮತ್ತು ತಡೆಗಳನ್ನು ಜಯಿಸುವ ಶಕ್ತಿಯು ತಾಳ್ಮೆಯಿಂದ ಮಾತ್ರ ಲಭ್ಯವಾಗುತ್ತದೆ.

ತಾಳ್ಮೆ ಸಂಬಂಧಗಳ ಪರಿವರ್ತಕ. ಕೆಲವೊಮ್ಮೆ ಸಂಬಂಧಗಳಲ್ಲಿ ನಾವು ರಕ್ಷಣಾತ್ಮಕರಾಗುತ್ತೇವೆ ಅಥವಾ ಕಿರಿಕಿರಿಗೊಳ್ಳುತ್ತೇವೆ. ಇತರರನ್ನು ನೋಯಿಸಲು ಏನನ್ನಾದರೂ ಹೇಳುತ್ತೇವೆ. ತಾಳ್ಮೆಯ ಮಹತ್ವವನ್ನು ಅರ್ಥಮಾಡಿಕೊಳ್ಳದೆ ಅವಸರದ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತೇವೆ. ನೀವು ವ್ಯಕ್ತಿಯ ವಿರುದ್ಧ ರಕ್ಷಣಾತ್ಮಕ ಭಾವನೆಯನ್ನು ಅನುಭವಿಸಿದಾಗ, ಇನ್ನೊಬ್ಬ ವ್ಯಕ್ತಿಯ ಸಕಾರಾತ್ಮಕ ಗುಣಗಳ ಬಗ್ಗೆ ಯೋಚಿಸಲು ಸಮಯ ತೆಗೆದುಕೊಳ್ಳುವಷ್ಟು ತಾಳ್ಮೆ ಇರಬೇಕಾಗುತ್ತದೆ. ಸಂಬಂಧಗಳು ಉಳಿಯಲು ಇದರ ಅವಶ್ಯಕತೆ ಹೆಚ್ಚಿದೆ.

ತಾಳ್ಮೆಗೆ ಸಹಾನುಭೂತಿ ಪ್ರೇರಕ. ಸೌಹಾರ್ದಯುತ ಜೀವನವನ್ನು ನಡೆಸಲು ಇತರರೊಂದಿಗೆ ಸಹಾನುಭೂತಿ ಬೆಳೆಸಿಕೊಳ್ಳುವುದು ಮುಖ್ಯ. ತಾಳ್ಮೆ ಇತರರ ಕಡೆಗೆ ಸಹಾನುಭೂತಿಯನ್ನು ಬೆಳೆಸಲು ಸಹಾಯ ಮಾಡುತ್ತದೆ. ತಾಳ್ಮೆ ಇತರರನ್ನು ಅವರಂತೆ ಸ್ವೀಕರಿಸಲು ಸಹಾಯಕ. ನೆನಪಿರಲಿ ಅಸಹನೆಯಿಂದ ನಷ್ಟವೇ ಹೆಚ್ಚು.

ತಾಳ್ಮೆ ಸಕಾರಾತ್ಮಕ ಮನೋಭಾವಕ. ಅಂದುಕೊಂಡಂತೆ ಕಾರ್ಯಗಳು ನಡೆಯದೆ ಹೋದರೆ ನಿರಾಸೆಗೊಳ್ಳುವ ಬದಲು ತಾಳ್ಮೆಯಿಂದಿರಲು ಕಲಿಯಬೇಕು. ಜೀವನವನ್ನು ಸಂತೋಷದಾಯಕವಾಗಿಸಲು ವಿಷಯಗಳನ್ನು ಮತ್ತು ಸನ್ನಿವೇಶಗಳನ್ನು ಧನಾತ್ಮಕ ಬೆಳಕಿನಲ್ಲಿ ನೋಡಬೇಕು ಮತ್ತು ಸಕಾರಾತ್ಮಕತೆ ಪಡೆಯಲು ತಾಳ್ಮೆಯಿಂದ ಇರಬೇಕು.

ತಾಳ್ಮೆ ಆರೋಗ್ಯದ ಆಗರ. ಕೋಪ ಮತ್ತು ಒತ್ತಡ ವ್ಯಕ್ತಿಯ ಆರೋಗ್ಯಕ್ಕೆ ಮಾರಕ. ತಾಳ್ಮೆ ಈ ಎರಡೂ ಕಾಯಿಲೆಗಳಿಗೆ ಔಷಧವಾಗಿದೆ. ತಾಳ್ಮೆಯಿಂದ ಇದ್ದರೆ ಯಾವುದೇ ಸವಾಲಿನ ಪರಿಸ್ಥಿತಿಯನ್ನು ಹೆಚ್ಚು ಉತ್ತಮ ರೀತಿಯಲ್ಲಿ ಜಯಿಸಬಹುದಾಗಿದೆ.

ಒಟ್ಟಾರೆಯಾಗಿ ಹತಾಶೆಯಿಂದ ಹೊರಬರಲು, ತಿಳಿವಳಿಕೆಯುಳ್ಳ ನಿರ್ಧಾರಗಳನ್ನು ತೆಗೆದುಕೊಳ್ಳಲು ತಾಳ್ಮೆ ಅತ್ಯಗತ್ಯ. ಇದು ಸಂತೋಷ ಮತ್ತು ಶಾಂತಿಯುತ ಜೀವನಕ್ಕೆ ದಾರಿ ಮಾಡಿಕೊಡುತ್ತದೆ.

-ಡಾ| ಸುಧಾಕರ ಜಿ.

ಲಕ್ಕವಳ್ಳಿ