Cleanliness: ಪ್ರವಾಸಿ ತಾಣ ನಮ್ಮ ಆಸ್ತಿ: ಸ್ವಚ್ಛವಾಗಿರಿಸೋಣ

Team Udayavani, May 20, 2024, 3:12 PM IST

ಪ್ರೇಕ್ಷಣೀಯ ಸ್ಥಳಗಳು ತನ್ನೊಳಗಿನ ವೈವಿಧ್ಯತೆಯಿಂದ ಎಲ್ಲರ ಕಣ್ಮನ ಸೆಳೆಯುತ್ತದೆ. ಪ್ರವಾಸಿ ತಾಣಗಳ  ಸೌಂದರ್ಯವನ್ನು ನೋಡಲು ಎರಡು ಕಣ್ಣುಗಳು ಸಾಲದು. ನಮ್ಮ ನಾಡಿನಲ್ಲಿ ಸಾಕಷ್ಟು  ಪ್ರೇಕ್ಷಣೀಯ ಸ್ಥಳಗಳಿವೆ. ಅದು ಮಾನವ ಸೃಷ್ಟಿಯಾಗಿದ್ದಿರಬಹುದು, ಇರದೆಯೂ ಇರಬಹುದು.

ಇಂತಹ ಸ್ಥಳಗಳು ಸಾವಿರಾರು ಜನರ ಮನಸ್ಸನ್ನು ಸೆಳೆಯುತ್ತದೆ. ಪ್ರಕೃತಿ ಸೃಷ್ಟಿಯಾಗಿರುವ ನದಿ, ಹೊಳೆ, ಜಲಪಾತಗಳು ನಮಗೆ ನೋಡಲು ಸಿಕ್ಕಂತ ವರವಾಗಿದೆ. ಆ ನೀರಿನ ರಭಸ, ಗಂಭೀರವಾದ ಸದ್ದು, ಹಾಲ್ನೊರೆಯಂತಹ ಬಣ್ಣ ಆಹಾ! ಭೂಮಿಯ ಮೇಲಿನ ಸ್ವರ್ಗ ವೀಕ್ಷಣೆಯೆಂದರೆ ತಪ್ಪಾಗಲ್ಲ.

ಆದರೆ ಆ ಪ್ರವಾಸಿ ತಾಣಗಳ ಸೌಂದರ್ಯತೆ ಹಾಳು ಮಾಡಬಾರದೆಂದು ಎಚ್ಚರಿಸುವ ನಾಮಫ‌ಲಕಗಳನ್ನು ಕಾಣುತ್ತೇವೆ. ಹೀಗಿದ್ದರೂ ಮೂಡರಂತೆ ವರ್ತಿಸುವ  ಕೆಲವರು ಇಂತಹ ಸ್ಥಳಗಳನ್ನು ಹಾಳು ಮಾಡುತ್ತಿದ್ದಾರೆ.

ಪ್ಲಾಸ್ಟಿಕ್‌ಗಳನ್ನು ಹಾಕಿ ಮಣ್ಣಿನ ಮಾಲಿನ್ಯವನ್ನು ಉಂಟು ಮಾಡುತ್ತಾರೆ. ಅರೆಬರೆಯಾಗಿ ಆಹಾರವನ್ನು ತಿಂದು ಮೀನುಗಳಿಗೆ ಹಾಕುತ್ತಾರೆ. ಮಾನವರು ತಿನ್ನುವ ಹಲವು ಆಹಾರಗಳನ್ನು ಮೀನುಗಳಿಗೆ ಅರಗಿಸಿಕೊಳ್ಳುವ ಸಾಮರ್ಥ್ಯವಿರುವುದಿಲ್ಲ. ಹಾಗೆಯೇ  ಜಲಪಾತದ ತಂಪಾದ ನೀರಿನ ಹನಿಗಳಿಂದ ಸೋಪು, ಶಾಂಪುವಿನಿಂದ  ಸ್ನಾನ ಮಾಡುತ್ತಾರೆ.

ರಾಸಾಯನಿಕ ಅಂಶಗಳು ಒಳಗೊಂಡಿರುವ ಈ ವಸ್ತುಗಳಿಂದ ನೀರಿನೊಳಗೆ ವಾಸವಾಗಿರುವ ಮೀನುಗಳಿಗೆ ಹಾನಿಯನ್ನು ಉಂಟುಮಾಡುತ್ತದೆ. ಹೀಗೆ ಮುಂದುವರೆದರೆ ಮತ್ಸ್ಯ ವರ್ಗವೇ ಅಳಿವಿನಂಚಿಗೆ ತಲುಪಲು ಮಾನವರೇ ಕಾರಣವಾಗುತ್ತಾನೆ.

ಒಂದು ರೀತಿಯಾಗಿ ನೋಡಿದರೆ ಸಾಮಾಜಿಕ ಜಾಲತಾಣದ ಅತಿಯಾದ ಬಳಕೆಯೇ ಮೇಲ್ನೋಟಕ್ಕೆ  ಕಾರಣವೆನ್ನಬಹುದು. ದೃಶ್ಯಗಳನ್ನು ಸೆರೆ ಹಿಡಿಯುವ ಮೂಲಕ ಇತರ ಜನರಿಗೆ ತಲುಪಿಸುತ್ತಾರೆ. ಸ್ಥಳದ  ಶ್ರೇಷ್ಠತೆಯನ್ನು ಹೆಚ್ಚಿಸುತ್ತಾರೆ. ಅದನ್ನು ನೋಡಿ ಬರುವ ಮಾನವರು ನೋಡುವ ಬದಲಿಗೆ ಮಾಲಿನ್ಯ ಮಾಡುವುದೇ ಹೆಚ್ಚು.  ಒಟ್ಟಾರೆಯಾಗಿ ಈ ಸುಂದರ ಪ್ರಕೃತಿಯ ವರವಾದ ಇಂಥ ಸ್ಥಳಗಳನ್ನು ಸ್ವಾರ್ಥಿಯಾದ ಮಾನವ ನಾಶಮಾಡುತ್ತಿದ್ದಾನೆ.

ಇದೇ ಪರಿಸ್ಥಿತಿ ಮುಂದುವರೆದರೆ ಮುಂದೊಂದು ದಿನ ಪ್ರವಾಸಿ ತಾಣಗಳು ನೋಡಲು ಸಿಗುವುದೇ ಕಷ್ಟಕರವಾಗಬಹುದು.  ಮಾನವರಿಗೆ ಇಂಥ ಕೃತ್ಯಗಳನ್ನು ಮಾಡಬಾರದೆಂಬ ಮನವರಿಕೆ ಮೂಡಬೇಕಾಗಿದೆ. ತಮ್ಮಂತೆ ಇತರ ಜಲಚರಗಳಿಗೆ ಬದುಕುವ ಅರ್ಹತೆ ಇದೆ ಎಂಬ ಸತ್ಯ ಮನವರಿಕೆಗೆಯಾಗಬೇಕು. ನಮ್ಮೀ ಪ್ರಕೃತಿಯ ಸೌಂದರ್ಯ ಕಾಪಾಡಲು ಮಾನವರೇ ಮುಂದಾಗಬೇಕು. ಪ್ರವಾಸಿ ತಾಣಗಳನ್ನು ಸ್ವಚ್ಛವಾಗಿಡುವ ಜವಾಬ್ದಾರಿ ನಮ್ಮದ್ದಾಗಿದೆ. ಹಾಗಾಗಿ ಇನ್ನಾದರೂ ಪ್ರವಾಸಿ ತಾಣಗಳನ್ನು ಶುಚಿಯಿಂದಿರಿಸಿ.

-ತೃಪ್ತಿ ಗುಡಿಗಾರ್‌

ಎಂ. ಪಿ. ಎಂ. ಕಾಲೇಜು

ಕಾರ್ಕಳ