Brahmin welfare panel; 4 ಮಕ್ಕಳು ಪಡೆದು 1 ಲಕ್ಷ ರೂ. ಬಹುಮಾನ ಗೆಲ್ಲಿ!

Team Udayavani, Jan 13, 2025, 6:07 PM IST

ಇಂದೋರ್: ನಾಲ್ಕು ಮಕ್ಕಳನ್ನು ಪಡೆಯುವ ಬ್ರಾಹ್ಮಣ ಸಮುದಾಯದ ದಂಪತಿಗಳಿಗೆ 1 ಲಕ್ಷ ರೂಪಾಯಿ ಬಹುಮಾನ ನೀಡುವುದಾಗಿ ಮಧ್ಯಪ್ರದೇಶ ಪರಶುರಾಮ ಕಲ್ಯಾಣ ಮಂಡಳಿಯ ಮುಖ್ಯಸ್ಥರು ಆಫರ್ ನೀಡಿ ಸುದ್ದಿಯಾಗಿದ್ದಾರೆ.

ಸಂಧ್ಯಾ ಬ್ರಾಹ್ಮಣ ಸಮುದಾಯದ ವಿವಾಹ ವಯೋಮಾನದ ಪುರುಷ ಮತ್ತು ಮಹಿಳೆಯರಿಗಾಗಿ ರವಿವಾರ ಆಯೋಜಿಸಿದ್ದ ‘ಪರಿಚಯ ಸಮ್ಮೇಳನ’ದಲ್ಲಿ ಪಂಡಿತ್ ವಿಷ್ಣು ರಾಜೋರಿಯಾ ಈ ಘೋಷಣೆ ಮಾಡಿದ್ದಾರೆ.

ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ಉತ್ತಮ ಉದ್ಯೋಗವನ್ನು ಹೊಂದಿದ್ದರೂ ದಂಪತಿಗಳು ಕೇವಲ ಒಂದು ಮಗುವನ್ನು ಹೊಂದುವುದು ಒಳ್ಳೆಯದಲ್ಲ. ಹಿಂದೂಗಳಲ್ಲದವರ ಜನಸಂಖ್ಯೆ ಹೆಚ್ಚಳವಾಗುತ್ತಿದೆ. ನಾವು ನಮ್ಮ ಕುಟುಂಬದತ್ತ ಗಮನ ಹರಿಸುವುದನ್ನು ಬಹುತೇಕ ನಿಲ್ಲಿಸಿದ್ದೇವೆ” ಎಂದು ರಜೋರಿಯಾ ಪ್ರತಿಪಾದಿಸಿದ್ದಾರೆ.

ನನ್ನ ಸ್ವಂತ ಸಾಮರ್ಥ್ಯದಲ್ಲಿ ಅಥವಾ ಸಾಮಾಜಿಕ ಬೆಂಬಲದ ಮೂಲಕ ಬಹುಮಾನದ ಹಣವನ್ನು ವ್ಯವಸ್ಥೆ ಮಾಡುತ್ತೇನೆ. ಮಧ್ಯಪ್ರದೇಶ ಬಿಜೆಪಿ ಸರ್ಕಾರವು ಈ ನಿಟ್ಟಿನಲ್ಲಿ ಯಾವುದೇ ಯೋಜನೆಯನ್ನು ಪ್ರಾರಂಭಿಸಿಲ್ಲ ಎಂದು ರಜೋರಿಯಾ ಪ್ರತಿಪಾದಿಸಿದರು.