Meerut ಬಾಹುಬಲಿ ಸಮೋಸಾ ಸವಾಲು: 30 ನಿಮಿಷಗಳಲ್ಲಿ ತಿನ್ನಿ, 71 ಸಾವಿರ ರೂ.ಗೆಲ್ಲಿ!

Team Udayavani, Jun 18, 2023, 3:40 PM IST

ಮೀರತ್: ಬರೋಬ್ಬರಿ 12 ಕೆ.ಜಿಯಷ್ಟು ತೂಕದ ಬೃಹತ್ ಸಮೋಸಾವನ್ನು ಕತ್ತರಿಸುವ ಮೂಲಕ ನಿಮ್ಮ ಜನ್ಮದಿನವನ್ನು ಆಚರಿಸುತ್ತೀರಾ?!, ಇಲ್ಲವಾದರೆ 30 ನಿಮಿಷಗಳಲ್ಲಿ ಡೀಪ್ ಫ್ರೈ ಮಾಡಿದ ಜನಪ್ರಿಯ ತಿನಿಸನ್ನು ತಿಂದು 71,000 ರೂ.ಗೆಲ್ಲುತ್ತೀರಾ?, ಇಲ್ಲಿದೆ ನಿಮಗೆ ಅವಕಾಶ.

ಲಾಲ್ಕುರ್ತಿ ಮೂಲದ ಕೌಶಲ್ ಸ್ವೀಟ್ಸ್‌ನ ಮೂರನೇ ತಲೆಮಾರಿನ ಮಾಲಕ ಶುಭಂ ಕೌಶಲ್ ಅವರು ಸಮೋಸಾ ಮೂಲಕ ಗಮನ ಸೆಳೆಯಲು ಹೊಸ ಐಡಿಯಾ ಮಾಡಲು ಬಯಸಿದ್ದರು. 12 ಕಿಲೋಗ್ರಾಂ ತೂಗುವ ‘ಬಾಹುಬಲಿ’ ಸಮೋಸಾವನ್ನು ತಯಾರಿಸುವ ಆಲೋಚನೆ ಅವರಿಗೆ ಹೊಳೆಯಿತು.ಜನರು ‘ಬಾಹುಬಲಿ’ ಸಮೋಸಾಗಳನ್ನು ಆರ್ಡರ್ ಮಾಡುತ್ತಾರೆ ಮತ್ತು ಸಾಂಪ್ರದಾಯಿಕ ಕೇಕ್ ಬದಲಿಗೆ ತಮ್ಮ ಹುಟ್ಟುಹಬ್ಬದಂದು ಅದನ್ನು ಕತ್ತರಿಸಲು ಬಯಸುತ್ತಿದ್ದಾರೆ ಎಂದು ಕೌಶಲ್ ಹೇಳಿದರು.

ಆಲೂಗಡ್ಡೆ, ಬಟಾಣಿ, ಮಸಾಲೆ ಪದಾರ್ಥಗಳು, ಪನೀರ್ ಮತ್ತು ಡ್ರೈ ಫ್ರೂಟ್ಸ್ ತುಂಬಿದ ಸಮೋಸಾವನ್ನು 30 ನಿಮಿಷಗಳಲ್ಲಿ ತಿಂದು ಮುಗಿಸಿ 71,000 ರೂಪಾಯಿ ಗೆಲ್ಲುವ ಸವಾಲು ಕೂಡ ಜನರ ಮುಂದಿಡಲಾಗಿದೆ ಎಂದು ಅವರು ಹೇಳಿದರು.

ವಿಶೇಷವೆಂದರೆ ದೈತ್ಯ ಸಮೋಸಾವನ್ನು ತಯಾರಿಸಲು ಕೌಶಲ್ ಅವರ ಅಂಗಡಿಯಲ್ಲಿ ಬಾಣಸಿಗರಿಗೆ ಸುಮಾರು ಆರು ಗಂಟೆಗಳು ಬೇಕಾಗುತ್ತದೆ.
ಪ್ಯಾನ್‌ನಲ್ಲಿ ಸಮೋಸಾವನ್ನು ಕರಿಯಲು ಕೇವಲ 90 ನಿಮಿಷಗಳು ಮತ್ತು ಮೂವರ ಪ್ರಯತ್ನಗಳು ಬೇಕಾಗುತ್ತವೆ.

12 ಕೆಜಿ ತೂಕದ ಸಮೋಸಾದ ಬೆಲೆ ಸುಮಾರು 1,500 ರೂ., ‘ಬಾಹುಬಲಿ’ ಸಮೋಸಾಗಳಿಗೆ ಇದುವರೆಗೆ ಸುಮಾರು 40-50 ಆರ್ಡರ್‌ಗಳು ಬಂದಿವೆ ಎಂದು ಕೌಶಲ್ ಹೇಳಿದ್ದಾರೆ. ಈ ಸಮೋಸಾ ದೇಶದಲ್ಲೇ ಅತಿ ದೊಡ್ಡದಾಗಿದೆ ಎಂದು ಹೇಳಿಕೊಂಡಿದ್ದಾರೆ.