UP: ಆಹಾರ ನೀಡುತ್ತಿದ್ದವನ ಅಂತಿಮ ವಿಧಿಗಳಲ್ಲಿ ಪಾಲ್ಗೊಂಡ ಕೋತಿ: ವೈರಲ್ ವಿಡಿಯೋ

40 ಕಿ.ಮೀ ಅಂತಿಮಯಾತ್ರೆಯಲ್ಲಿ ಸಾಗಿ ಬಂದು ಕಣ್ಣೀರು ಸುರಿಸಿತು

Team Udayavani, Oct 13, 2023, 6:52 PM IST

ಮ್ರೋಹಾ: ‘ಅನ್ನದಾತೋ ಸುಖೀಭವ’ ಎನ್ನುವ ಆಶಯವನ್ನು ಮನುಷ್ಯನಿಗಿಂತಲೂ ಹೆಚ್ಚಾಗಿ ಪ್ರಾಣಿಗಳು ತಮ್ಮ ಜೀವನದಲ್ಲಿ ಅನ್ವಯಿಸಿಕೊಂಡಿವೆ ಎನ್ನುವುದಕ್ಕೆ ಸಾಕ್ಷಿ ಈ ಘಟನೆ. ಉತ್ತರ ಪ್ರದೇಶದ ಅಮ್ರೋಹಾದಲ್ಲಿ ನಿರಂತರವಾಗಿ ಕೋತಿಯೊಂದಕ್ಕೆ ಆಹಾರವನ್ನು ನೀಡುತ್ತಿದ್ದ ರಾಮಕುನ್ವರ್ ಸಿಂಗ್ ಎಂಬ ವ್ಯಕ್ತಿ ಮೃತಪಟ್ಟಿದ್ದಾರೆ.

ಎಲ್ಲಾ ಅಂತಿಮ ವಿಧಿವಿಧಾನಗಳು ಮತ್ತು ಕಾರ್ಯಗಳ ಸಮಯದಲ್ಲಿ ವ್ಯಕ್ತಿಯ ಮೃತದೇಹದ ಪಕ್ಕದಲ್ಲಿದ್ದ ಕೋತಿಯು ಅಂತಿಮ ನಮನ ಸಲ್ಲಿಸಿದ್ದು ಎಲ್ಲರ ಮನಕಲುಕಿತು. ಮೃತನ ಕುಟುಂಬದೊಂದಿಗೆ ಮೃತದೇಹದ ಪಕ್ಕದಲ್ಲಿ ಕುಳಿತಿದ್ದ ಕೋತಿಯು ದುಃಖದಿಂದ ಅಳುತ್ತಿತ್ತು. ಈ ಹೃದಯ ಸ್ಪರ್ಶಿ ವಿಡಿಯೋ ವೈರಲ್ ಆಗಿದೆ.

इससे बड़ी निःस्वार्थ प्रेम की मिसाल क्या हो सकती है. एक व्यक्ति रोज़ इस बन्दर को खाना खिलाता था. उस व्यक्ति की मृत्यु पर ये बन्दर बिलख-बिलख कर रोया. घर से घाट तक के सारे संस्कारों में शामिल रहा. ये वीडियो अमरोहा के थाना डिडौली जोया कस्बे का बताया जा रहा है. #viralvideo pic.twitter.com/M13afMIpWf

— Rana Yashwant (@RanaYashwant1) October 12, 2023

ಶವವನ್ನು ಅಂತ್ಯಕ್ರಿಯೆಯ ಸ್ಥಳಕ್ಕೆ ಸಾಗಿಸುವಾಗ ಅದನ್ನು ಒಂಟಿಯಾಗಿ ಬಿಡಲು ನಿರಾಕರಿಸಿದ ಕೋತಿ ಜತೆಯಲ್ಲೇ ಬಂದಿದೆ. ಸುಮಾರು 40 ಕಿ.ಮೀ ಪ್ರಯಾಣಿಸಿದೆ. ಕಳೆದ ಎರಡು ತಿಂಗಳಿನಿಂದ ಸಿಂಗ್ ಕೋತಿಗೆ ನಿತ್ಯವೂ ಎಂಬಂತೆ ಬ್ರೆಡ್ ತಿನ್ನಿಸುತ್ತಿದ್ದರು. ಪ್ರತಿನಿತ್ಯ ಪರಸ್ಪರ ಆಟವಾಡುತ್ತಾ ಕಾಲ ಕಳೆಯುತ್ತಿದ್ದರು. ಮಂಗಳವಾರ ಬೆಳಗ್ಗೆ ಸಿಂಗ್ ನಿಧನ ಹೊಂದಿದ ಬಳಿಕ ಕೋತಿ ಎಂದಿನಂತೆ ಸ್ಥಳಕ್ಕೆ ಭೇಟಿ ನೀಡಿದಾಗ ಆಘಾತಕಾರಿ ಸುದ್ದಿ ತಿಳಿದು ಕಣ್ಣೀರು ಹಾಕಿದೆ ಎಂದು ಸ್ಥಳೀಯರು ಹೇಳಿದ್ದಾರೆ.

ಚಿತೆಯ ಬಳಿ ಬಹಳ ಹೊತ್ತು ಕಾದ ಕೋತಿ ಅಂತ್ಯಕ್ರಿಯೆಯ ಎಲ್ಲಾ ವಿಧಿವಿಧಾನಗಳಲ್ಲಿ ಭಾಗವಹಿಸಿತು. ದೃಶ್ಯಗಳು ಆನ್‌ಲೈನ್‌ನಲ್ಲಿ ಕಾಣಿಸಿಕೊಂಡಿದ್ದು, ಪಶುಗಳ ಪ್ರೀತಿ ಮತ್ತು ನಿಷ್ಠೆಗೆ ಈ ಘಟನೆ ಸಾಕ್ಷಿಯಾಗಿದೆ.