ಕ್ರಿಕೆಟಿಗರಿಗೆ ಇನ್ನು ಪತ್ನಿಯರ ಸಾಥ್‌!

Team Udayavani, Jun 21, 2019, 5:23 AM IST

ಲಂಡನ್‌: ಭಾರತೀಯ ಕ್ರಿಕೆಟಿಗರ ಪತ್ನಿಯರು ಒಬ್ಬೊಬ್ಬರಾಗಿ ಇಂಗ್ಲೆಂಡ್‌ ವಿಮಾನ ಏರುತ್ತಿದ್ದಾರೆ. ಕಪ್ತಾನ ವಿರಾಟ್‌ ಕೊಹ್ಲಿ ಅವರ ಪತ್ನಿ ಅನುಷ್ಕಾ ಶರ್ಮ ಈಗಾಗಲೇ ಲಂಡನ್‌ ತಲುಪಿಯಾಗಿದೆ. ಕೊಹ್ಲಿ-ಅನುಷ್ಕಾ ಲಂಡನ್‌ನ ಬೀದಿಯಲ್ಲಿ ಜತೆಯಾಗಿ ತಿರುಗಾಡುತ್ತಿರುವ ಫೋಟೊ ಒಂದು ಕೊಹ್ಲಿಯ ಅಭಿಮಾನಿಗಳ ಫೇಸ್‌ಬುಕ್‌ ಪುಟದಲ್ಲಿ ಕಾಣಿಸಿಕೊಂಡಿದೆ.

“ಓಲ್ಡ್‌ ಬಾಂಡ್‌ ಸ್ಟ್ರೀಟ್‌ನಲ್ಲಿ ಕೊಹ್ಲಿ ಮತ್ತು ಅನುಷ್ಕಾ ಓಡಾಡುತ್ತಿರುವುದನ್ನು ಕಂಡೆ. ಅನುಷ್ಕಾ ಹೊಸ ಕೇಶ ವಿನ್ಯಾಸ ಚೆನ್ನಾಗಿದೆ’ ಎಂದು ಅಭಿಮಾನಿಯೊಬ್ಬರು ಈ ಫೊಟೋ ಹಾಕಿ ಬರೆದುಕೊಂಡಿದ್ದಾರೆ.

ಭಾರತ ತಂಡದ ಜೊತೆಗೆ ಅನುಷ್ಕಾ ಪ್ರಯಾಣಿಸುವುದು ಹೊಸದೇನಲ್ಲ. ಕಳೆದ ವರ್ಷಆಸ್ಟ್ರೇಲಿಯ ಮತ್ತು ಇಂಗ್ಲಂಡ್‌ ಪ್ರವಾಸದ ವೇಳೆಯೂ ಅವರು ಜತೆಗಿದ್ದರು.

ಶಿಖರ್‌ ಧವನ್‌ ಪತ್ನಿಯೂ ಲಂಡನ್‌ಗೆ ಹೋಗಿದ್ದಾರೆ. ರೋಹಿತ್‌ ಶರ್ಮ-ರಿತಿಕಾ ಸಜೆª ದಂಪತಿ ಮತ್ತು ಶಿಖರ್‌ ಧವನ್‌-ಆಯೇಷಾ ದಂಪತಿ ತಮ್ಮ ಮಕ್ಕಳ ಜತೆಗೆ ಲೋಕಲ್‌ ರೈಲಿನಲ್ಲಿ ಪ್ರಯಾಣಿಸುತ್ತಿರುವ ಫೋಟೊ ಸೋಶಿಯಲ್‌ ಮೀಡಿಯಾದಲ್ಲಿ ಕಾಣಿಸಿಕೊಂಡಿದೆ. ಧವನ್‌ ಈ ಫೋಟೊವನ್ನು ಫೇಸ್‌ಬುಕ್‌ನಲ್ಲಿ ಹಾಕಿದ್ದಾರೆ. ಗಾಯಾಳಾದರೂ ಸದ್ಯ ಧವನ್‌ ಇಂಗ್ಲೆಂಡ್‌ನ‌ಲ್ಲೇ ಉಳಿಯಲಿದ್ದಾರೆ.

ಮುಗಿಯಿತು 20 ದಿನ…
ವಿಶ್ವಕಪ್‌ ಕೂಟ ಪ್ರಾರಂಭವಾದ 20 ದಿನಗಳ ತನಕ ಆಟಗಾರರು ತಮ್ಮ ಪತ್ನಿಯರನ್ನು ಕರೆಸಿಕೊಳ್ಳಬಾರದು ಎಂಬ ಷರತ್ತನ್ನು ಬಿಸಿಸಿಐ ವಿಧಿಸಿತ್ತು. ಈ ಅವಧಿ ಮುಗಿದಿದೆ.