ಹ್ಯಾಟ್ರಿಕ್‌ ನಿರೀಕ್ಷೆಯಲ್ಲಿ ಕಿವೀಸ್‌

Team Udayavani, Jun 8, 2019, 6:00 AM IST

ಟೌಂಟನ್‌: ಕೂಟದ ಮೊದಲೆರಡು ಪಂದ್ಯಗಳನ್ನು ಗೆದ್ದ ನ್ಯೂಜಿಲ್ಯಾಂಡಿಗೆ ಹ್ಯಾಟ್ರಿಕ್‌ ಅವಕಾಶವೊಂದು ಎದುರಾಗಿದೆ. ಶನಿವಾರ ರಾತ್ರಿಯ ಪಂದ್ಯದಲ್ಲಿ ಕಿವೀಸ್‌ ಪಡೆ ಅಫ್ಘಾನಿಸ್ಥಾನವನ್ನು ಎದುರಿಸಲಿದ್ದು, ಗೆಲುವಿನ ನಿರೀಕ್ಷೆಯಲ್ಲಿದೆ. ಕೂಟದ ಅಪಾಯಕಾರಿ ತಂಡವಾಗಿರುವ ಅಫ್ಘಾನ್‌ ಆಡಿದ ಎರಡೂ ಪಂದ್ಯಗಳಲ್ಲಿ ಎಡವಿದೆ.

ನ್ಯೂಜಿಲ್ಯಾಂಡ್‌ ಮೊದಲ ಪಂದ್ಯದಲ್ಲಿ 10 ವಿಕೆಟ್‌ಗಳಿಂದ ಶ್ರೀಲಂಕಾವನ್ನು ಮಣಿಸಿತ್ತು. ಬಳಿಕ ಬಾಂಗ್ಲಾದೇಶ ವಿರುದ್ಧ ದಿಢೀರ್‌ ಕುಸಿತ ಅನುಭವಿಸಿದರೂ 2 ವಿಕೆಟ್‌ಗಳಿಂದ ಪಂದ್ಯವನ್ನು ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು. ಈಗ ಅಫ್ಘಾನಿಸ್ಥಾನದ ಸರದಿ. ಹೀಗೆ ಕಿವೀಸ್‌ ಮೊದಲ 3 ಪಂದ್ಯಗಳನ್ನು ಏಶ್ಯದ ತಂಡಗಳ ವಿರುದ್ಧವೇ ಆಡುವ ಅವಕಾಶ ಪಡೆದಿದ್ದು, ಇನ್ನಷ್ಟೇ ಬಲಿಷ್ಠ ತಂಡಗಳನ್ನು ಎದುರಿಸಬೇಕಿದೆ. ಅಷ್ಟರಲ್ಲಿ ಪೂರ್ತಿ 6 ಅಂಕಗಳನ್ನು ಸಂಗ್ರಹಿಸಿಡುವುದು ವಿಲಿಯಮ್ಸನ್‌ ಪಡೆಯ ಯೋಜನೆ.